Ku Khoma Tinhlengeletano Ta Vandlha Hi Ku Tirhisa Videoconference

Mimfumo yi endle swipimelo swa leswaku vanhu va nga hlangani hi mitlawa leyikulu. Timbhoni ta Yehovha ti fanele ti swi landzelela swipimelo sweswo kambe ti ri karhi ti ya emahlweni ti gandzela Yehovha. Leswaku sweswo swi koteka mavandlha ma sungule ku tirhisa ti-app to khoma tinhlengeletano ta vandlha to fana na Zoom.

Leswaku hi swi kota ku khoma tinhlengeletano ta vandlha nkarhi ni nkarhi Huvo Leyi Fumaka yi nyike mpfumelelo leswaku ku xaviwa Zoom akhawunti leyi nga ta tirhisiwa hi mavandlha. Leswi swi pfune mavandlha lama a swi ta ma tikela ku hakelela swikoxo swa videoconference. Mavandlha yo tala a ma tirhisa ti-app ta mahala leti a ti nga pfumeleli vanhu vo tala leswaku va khonekta naswona vuhlayiseki bya kona a byi nga tiyanga. Kambe sweswi mavandlha lama tirhisaka Zoom leyi hakeleriweke hi nhlangano ma swi kota ku endla leswaku ku va ni vuhlayiseki naswona ma khonekta vanhu vo tala hi nkarhi wun’we. Namuntlha mavandlha yo tlula 65 000 ematikweni yo ringana 170 ma tirhisa yona akhawunti leyi.

Vandlha ra Kairagi, leri nga eManado, North Sulawesi, eIndonesia ri tshike ku tirhisa app ya mahala ya videoconference kutani ri sungula ku tirhisa akhawunti ya Zoom leyi nga hakeleriwa hi nhlangano. Makwerhu Hadi Santoso u ri: “Hambi ku ri vamakwerhu lava nga swi kotiki kahle ku tirhisa swi tirhisiwa swa thekinoloji, sweswi va tiphina hi tinhlengeletano leti ta vandlha naswona a swa ha bohi ku va joyina mithini wun’we ko tala hileswi xi va khahlelaka.”

Lester Jijón, Jr., nkulu evandlheni ra le Guayacanes Oeste eGuayaquil, eEcuador, u ri: “Hikwalaho ka leswi vamakwerhu vo tala va hanyaka evuswetini, a swi ta va tikela leswaku va swi kota ku hakelela Zoom akhawunti leswaku va khoma tinhlengeletano ta vandlha. Ha wu khensa nhlangano hileswi wu koteke ku hi hakelela Zoom akhawunti leswaku hi swi kota ku khonekta vanhu vo tala eka tinhlengeletano ta vandlha, handle ko chava ku hundza mpimo lowu vekiweke wa vanhu lava faneleke va khonekta.”

Johnson Mwanza, nkulu evandlheni ra Ngwerere North leri nga eLusaka, eZambia, u tsale a ku: “Vamakwerhu vo tala va ri va wu khensa swinene nhlangano hileswi wu koteke ku va hakelela Zoom leswaku va khoma tinhlengeletano hikuva sweswo swi endla leswaku va titwa va ri ekusuhi ni vamakwerhu ku nga ri sweswo ntsena va kota ku vona ndlela leyi Yehovha a va rhandzaka ha yona ni ku va khathalela ha yona.”

Mali leyi tirhisiweke ku hakelela akhawunti leyi, i mali leyi vekiweke leswaku yi tirhiseriwa ku phalala vamakwerhu. Mali yoleyo yi huma eka minyikelo ya misava hinkwayo. Yin’wana ya yona hi leyi nga nyikeriwa hi ku tirhisa xiyenge xa minyikelo lexi nga eka jw.org. Hi yi tlangela swinene minyikelo ya n’wina minyikelo leyi yi tlhela yi tirhiseriwa ku pfuna vamakwerhu emisaveni hinkwayo.—2 Vakorinto 8:14.