Hikwalaho Ka Yini Swiambalo Swa Hina Ni Ndlela Leyi Hi Langutekaka Ha Yona Swi Ri Swa Nkoka?

Hinkwerhu ku ni ndlela leyi hi lavaka ku languteka ha yona naswona hi rhandza swiambalo swo karhi. Loko hi yingisa misinya ya milawu ya le Bibeleni, hi nga kota ku hlawula swiambalo leswi hi tsakisaka swi tlhela swi tsakisa na Yehovha. A hi kambisiseni yin’wana ya milawu yoleyo.

1. Hi yihi misinya ya milawu leyi hi pfunaka ku hlawula swiambalo ni ndlela leyi hi tilunghisaka ha yona?

Hi fanele hi hlawula “swiambalo leswi xiximekaka, [hi] ringanisela ni hi mianakanyo leyinene,” hi tlhela hi tshama hi basile leswaku van’wana va ta vona ‘ku tinyiketela ka hina eka Xikwembu.’ (1 Timotiya 2:9, 10) Xiya misinya ya milawu leyi ya mune: (1) Swiambalo swa hina swi fanele swi ‘xiximeka.’ Hilaha u swi xiyeke hakona etinhlengeletanweni ta vandlha, vanhu va Yehovha va ambala hi tindlela to hambanahambana, kambe ndlela leyi hi ambalaka ha yona ni switayele swa hina swa misisi swi kombisa leswaku hi xixima Xikwembu lexi hi xi gandzelaka. (2) Ku ambala hi ku “ringanisela” swi vula leswaku ndlela leyi hi langutekaka ha yona a yi nge endli van’wana va sungula ku ehleketa hi swa masangu kumbe swi hi kokela mahlo. (3) Hi kombisa “mianakanyo leyinene” loko hi nga landzeleli switayele kumbe fexeni yin’wana ni yin’wana. (4) Mikarhi hinkwayo ndlela leyi hi ambalaka ni ku tisasekisa ha yona yi fanele yi swi kombisa ni le ka van’wana leswaku hi “tinyiketele eka Xikwembu.”—1 Vakorinto 10:31.

2. Ndlela leyi hi ambalaka ha yona ni ku tisasekisa yi nga va khumba njhani vamakwerhu?

Hambileswi hi nga ni tshunxeko wo hlawula leswi hi lavaka ku swi ambala, hi fanele hi ehleketa hi ndlela leyi swiambalo swa hina swi nga ta va khumba ha yona van’wana. Hi ringeta hilaha hi nga kotaka hakona leswaku hi nga khunguvanyisi munhu kambe hi ‘endlela van’wana leswinene leswaku hi va aka.’—Hlaya Varhoma 15:1, 2.

3. Ndlela leyi hi ambalaka ha yona ni ku tisasekisa yi nga va kokela njhani van’wana evugandzerini bya ntiyiso?

Mikarhi hinkwayo hi ringeta ku ambala hi ndlela leyi faneleke, kambe hi endla tano ngopfungopfu loko hi ya etinhlengeletanweni ta vandlha ni loko hi ya eku chumayeleni. A hi lavi leswaku vanhu va nga ma yingisi mahungu lamanene hikwalaho ka ndlela leyi hi langutekaka ha yona. Ku ri na sweswo, hi lava leswaku ndlela leyi hi langutekaka ha yona yi endla vanhu va lava ku dyondza swo tala hi Xikwembu lexi hi xi gandzelaka ni ku “sasekisa dyondzo ya Muponisi wa hina.”—Tito 2:10.

ANAKANYISISA

4. Maambalelo lamanene ma kombisa leswaku hi xixima Yehovha

Hi xihi xivangelo xa nkoka swinene lexi endlaka hi yi tekela enhlokweni ndlela leyi hi ambalaka ha yona? Hlaya Pisalema 47:2, ivi mi bula hi swivutiso leswi:

• Mhaka ya leswaku hi yimela Yehovha yi fanele yi yi khumba njhani ndlela leyi hi ambalaka ha yona?

• U ehleketa leswaku swa boha ku khathala hi ndlela leyi hi langutekaka ha yona loko hi ya etinhlengeletanweni ta vandlha ni le ku chumayeleni? Hikwalaho ka yini u vula tano?

5. I yini lexi nga hi pfunaka ku hlawula swiambalo ni ndlela leyi hi tisasekisaka ha yona?

Tlanga VHIDIYO.

VHIDIYO: “Endlani Hinkwaswo Leswaku Mi Dzunisa Xikwembu” (10:18)

Swiambalo swa hina swi fanele swi va swi basile swi tlhela swi fanela xiendlakalo lexi hi nga eka xona, ku nga khathariseki leswaku hi swi xave hi mali muni. Hlaya 1 Vakorinto 10:24 na 1 Timotiya 2:9, 10. Endzhaku bulani hi leswi endlaka hi papalata ku ambala timpahla leti . . .

• nga langutekiki kumbe leti nga faneliki xiendlakalo.

• manyaka, leti vonikelaka kumbe leti nga endlaka vanhu va ehleketa hi swa masangu.

Hambileswi Vakreste va nga riki ehansi ka Nawu wa Muxe, kambe Nawu wolowo wu va pfuna ku tiva ndlela leyi Yehovha a ehleketaka ha yona. Hlaya Deteronoma 22:5, ivi mi bula hi xivutiso lexi:

• Hikwalaho ka yini hi fanele hi papalata swiambalo ni ku tisasekisa hi ndlela leyi endlaka vavanuna va languteka onge i vavasati kumbe vavasati va languteka onge i vavanuna?

Hlaya 1 Vakorinto 10:32, 33 na 1 Yohane 2:15, 16, ivi mi bula hi swivutiso leswi:

• Hikwalaho ka yini hi fanele hi va ni mhaka loko ndlela leyi hi ambalaka ha yona yi khunguvanyisa van’wana laha hi tshamaka kona kumbe evandlheni?

• Hi swihi switayele swa maambalelo ni ku tilunghisa leswi tolovelekeke laha u tshamaka kona?

• U ehleketa leswaku eka switayele sweswo swi kona leswi nga fanelangiki eka Vakreste? Hikwalaho ka yini u vula tano?

NKATSAKANYO

Loko hi ambala kahle ni ku tisasekisa hi ndlela leyinene, hi kombisa leswaku hi xixima Yehovha ni van’wana.

Mpfuxeto

• Hikwalaho ka yini maambalelo ya hina ni ku tisasekisa ka hina swi ri swa nkoka eka Yehovha?

• Hi yihi misinya ya milawu leyi hi pfunaka loko swi ta eka maambalelo ni ku tisasekisa?

• Maambalelo ya hina ni ku tisasekisa swi yi khumba njhani ndlela leyi van’wana va tekaka vugandzeri bya ntiyiso ha yona?

KUMA LESWI ENGETELEKEKE

Xana maambalelo ya wena ma vula yini hi wena?

“Ndzi Languteka Njhani?” (Nhlokomhaka leyi kumekaka eka website)

Dyondza leswaku hikwalaho ka yini ku ri vutlhari ku ehleketisisa u nga si titsalatsala miri.

“Bibele Yi Ri Yini Malunghana Ni Ku Tifungha Nhlonge?” (Nhlokomhaka leyi kumekaka eka website)

Kambisisa misinya yin’wana ya milawu leyi nga hi pfunaka ku endla swiboho.

“Xana Ndlela Leyi U Ambalaka Ha Yona Yi Vangamisa Xikwembu?” (Xihondzo xo Rindza, September 2016)

Wansati un’wana u swi kotise ku yini ku va ni langutelo lerinene loko swi ta eka ndlela leyi van’wana va ambalaka ha yona?

“A Ndzi Khunguvanyisiwa Hi Ndlela Leyi Vanhu Van’wana Va Ambalaka Ni Ku Tisasekisa Ha Yona” (Xalamuka!, December 22, 2003)