Ndzi Khutaziwe Hi Vutshembeki Bya Ndyangu Wa Ka Hina Eka Xikwembu

HI KU VULA KA HORST HENSCHEL

“Tsaka loko u kuma papila leri, hikuva ndzi tiyisele ku fika emakumu. Ndzi ta va ndzi dlayiwile endzhaku ka tiawara timbirhi.” Walawo a ku ri marito yo sungula ya papila ro hetelela leri Tatana a ndzi tsaleleke rona. Hi May 10, 1944, u dlayiwile hikwalaho ka leswi a aleke ku tirha evuthwini ra Hitler. Vutshembeki byakwe lebyi tiyeke eka Xikwembu, kun’we ni bya manana na sesi wa mina Elfriede, byi khumbe vutomi bya mina swinene.

HI 1932, ku nga nkarhi lowu ndzi velekiweke ha wona, Tatana a sungule ku hlaya tibuku ta Timbhoni ta Yehovha. Swin’wana leswi a swi voneke i vukanganyisi bya vafundhisi. Hikwalaho ka sweswo, a nga ha ti tsakelanga tikereke.

Endzhakunyana ka loko Nyimpi ya Vumbirhi ya Misava yi sungurile hi 1939, Tatana u tsarisiwe evuthwini ra Jarimani hi nkani. U byele Manana a ku: “Hi ku ya hi Bibele, a ndzi fanelanga ndzi ya, ku dlayetela loku a ku lulamanga.”

Manana u hlamule a ku: “Va ta ku dlaya loko u nga yi. Kutani ku ta humelela yini hi ndyangu wa wena?” Hikwalaho Tatana u ve socha.

Endzhaku ka sweswo, Manana, loyi ku fikela enkarhini wolowo a nga si dyondza Bibele, u ringete ku tihlanganisa ni Timbhoni ta Yehovha, ku nga xiendlo lexi a xi ri ni khombo swinene enkarhini wolowo. U kume Dora, loyi nuna wakwe a a ri ekampeni ya nxaniso hikwalaho ka ripfumelo ra yena. Dora u n’wi nyike kopi ya Xihondzo xo Rindza, kambe u byele Manana hi ku kongoma a ku: “Tsundzuka leswaku ndzi nga ha dlayiwa loko Magestapo (maphorisa ya le xihundleni) mo swi tiva leswaku ndzi ku nyike magazini lowu.”

Endzhakunyana, Manana u kume tibuku to tala ta Timbhoni ta Yehovha naswona u sungule ku twisisa mintiyiso ya Bibele leyi ti nga na yona. Hi ku famba ka nkarhi, Max Ruebsam, la humaka eDresden leyi a yi ri ekusuhi, u sungule ku hi endzela ekaya ra hina eMeissen. U dyondze Bibele na hina a ri karhi a veka vuhlayiseki byakwe ekhombyeni swinene. Entiyisweni, a ku helanga nkarhi wo leha a nga si khomiwa.

Hikwalaho ka leswi Manana a dyondza Bibele, u sungule ku va ni ripfumelo eka Yehovha ni ku nyiketela vutomi byakwe eka yena, u kombise leswi hi nkhuvulo wa mati hi May 1943. Mina na Tatana hi khuvuriwe endzhaku ka tin’hweti ti nga ri tingani. Elfriede, makwerhu wa xisati la nga ni malembe ya 20 hi vukhale, loyi a a tirha eDresden, na yena u khuvuriwile hi nkarhi wolowo. Xisweswo, loko Nyimpi ya Vumbirhi ya Misava yi ri exikarhi, hinkwerhu ka hina hi ri mune hi nyiketele vutomi bya hina eka Yehovha. Hi 1943, Manana u veleke rikotse ra ka hina ra xisati, ku nga Renate.

Ku Xaniseriwa Ripfumelo Ra Hina

Ndzi nga si khuvuriwa, ndzi tshike ku va xirho xa vandla ra Hitler ra Vantshwa. Loko ndzi ale ku losa Hitler, leswi a swi laveka siku na siku exikolweni, vadyondzisi va mina va ndzi bile. Hambiswiritano, ndzi tsakile hi ku tiva leswaku hikwalaho ka leswi ndzi tiyisiweke hi vatswari va mina, ndzi tshame ndzi tshembekile.

Kambe minkarhi yin’wana, hikwalaho ka ku biwa kumbe ku chava, a ndzi vula ndzi ku “Heil Hitler!” Kutani a ndzi tlhelela ekaya ndzi khavaxele mihloti, naswona vatswari va mina va khongele na mina leswaku ndzi tshama ndzi tiyile ni ku lwisana ni minhlaselo ya nala enkarhini lowu taka. Minkarhi yo tala, hikwalaho ko chava ndzi tsandzekile ku endla leswi lulameke, kambe Yehovha a nga kalanga a ndzi cukumeta.

Siku rin’wana Magestapo ma fikile ivi ma hangunuxa yindlu ya ka hina. Mutirheli wa Magestapo u vutise Manana a ku: “Xana u wun’wana wa Timbhoni ta Yehovha?” Ndza ha n’wi vona loko a tiseketela hi fureme ra rivanti, a hlamula handle ko chava a ku, “Ina”—hambileswi a swi tiva leswaku leswi swi ta vula ku pfaleriwa ka yena.

Endzhaku ka mavhiki mambirhi, Manana a ri karhi a dyisa Renate, loyi a nga si heta ni lembe, loko Magestapo ma nghena ku ta n’wi khoma. Manana u sungule ku ala a ku: “Ndza ha dyisa n’wana wa mina!” Hambiswiritano, wansati la nga ta ni phorisa u teke n’wana emavokweni yakwe ivi hi ku lerisa a ku: “Lungheka! U boheka ku famba.” Entiyisweni leswi swi karhate Manana swinene.

Tanihi leswi Tatana a nga si khomiwa, mina na ndzisana ya mina ya xisati hi sale na yena. Mixo wun’wana endzhaku ka mavhiki mambirhi Manana a fambile, ndzi vukarhe Tatana ndzi nga si ya exikolweni. Esikwini rolero Tatana u khomiwile hikwalaho ka leswi a nga ala ku tlhelela enyimpini. Kutani loko ndzi vuya ekaya ndzhenga wolowo, a a nga ri kona, naswona a ndza ha tlhelanga ndzi n’wi vona.

Vakokwa va mina ni maxaka man’wana—lava hinkwavo ka vona a va lwisana ni Timbhoni ta Yehovha ni lava van’wana va vona a va ri swirho swa vandla ra Manazi—va teke mina ni ndzisana ya mina ya xisati leswaku va ya hi hlayisa. A va nga pfumeli leswaku ndzi hlaya Bibele. Kambe endzhaku ka loko ndzi yi kumile exihundleni eka wansati un’wana wa muakelani, ndzi yi hlayile. Ndzi tlhele ndzi nkhinsama ekusuhi ni byetlelo bya ndzisana ya mina ya xisati ivi ndzi khongela.

Hi nkarhi wolowo, sesi wa mina Elfriede a a tiyisele miringo hikwalaho ka ripfumelo ra yena. A nga ha pfumelanga ku tirha efektri ya le Dresden leyi endlaka matlhari ya nyimpi, kambe u kote ku kuma ntirho wo hlayisa tiphaka ni mintanga eMeissen. Loko a ya ehofisini ku ya kuma muholo wakwe, u arile ku vula a ku “Heil Hitler!” Hi ku famba ka nkarhi, u khomiwile ivi a pfaleriwa.

Lexi khomisaka gome, Elfriede u khomiwe hi vuvabyi bya mikolo ni xifumbu ivi a fa mavhiki ma nga ri mangani endzhaku ka loko a pfaleriwile. A a ri ni malembe ya 21 ntsena hi vukhale. Eka rin’wana ra mapapila ya yena yo hetelela, u tshahe Luka 17:10 leyi nge: “Na n’wina, loko mi endle swilo hinkwaswo leswi mi averiweke swona, vulani mi ku, ‘Hi mahlonga lama nga pfuniki nchumu. Leswi hi nga swi endla hi leswi a hi fanele ku swi endla.’” Ku tshembeka ka yena eka Xikwembu ku tshame ku ri nchumu lowu ndzi tiyisaka.—Vakolosa 4:11.

Ndzingo Wa Tatana

Hi nkarhi wa ku pfaleriwa ka Tatana, kokwana—tata wa manana—u n’wi endzerile hi ku lava ku n’wi endla a cinca mianakanyo yakwe. A bohiwe nenge ni voko hi nketana, Tatana u rhangisiwe emahlweni ka yena. Hi xivindzi Tatana u xi arile xiringanyeto xa leswaku a nghenela vusocha hikwalaho ka vana vakwe. Un’wana wa varindzi va khotso u byele Kokwana a ku: “Hambiloko wanuna loyi o va ni vana va khume, a nge cinci.”

Kokwana u tlhelele ekaya a khunguvanyekile swinene. U huwelerile: “Noyi loyi! Xiphukuphuku lexi! A nga va cukumeta njhani vana vakwe?” Hambileswi Kokwana a khunguvanyekile, a ndzi tsakile ku twa leswaku Tatana u tshame a tiyile.

Eku heteleleni, Tatana u gweveriwe rifu naswona u tsemiwe nhloko. Endzhaku ka nkarhinyana, ndzi kume papila leriyani rakwe ro hetelela. Tanihi leswi a nga ku tivi lomu Manana a pfaleriwe kona, u tsalele mina. Ndzi tlhandlukele ekamareni ra mina ra le henhla ndzi ya hlaya marito wolawo yo sungula lama tshahiweke eku sunguleni ka xihloko lexi. Ndzi ve ni gome ndzi tlhela ndzi rila, kambe a ndzi tsakile ku tiva leswaku u tshame a tshembekile eka Yehovha.

Xirilo Xa Manana

Manana u rhumeriwe ekhotsweni ra le dzongeni wa Jarimani leswaku a ya rindzela ku tengiwa ka nandzu wakwe. Siku rin’wana murindzi u yile exitokisini xakwe, a vulavula hi ndlela ya xinghana leswaku u fanele ku tshama a rhurile. Kambe Manana u suke a yima ivi a ku: “Ndza swi tiva leswaku nuna wa mina u dlayiwile.” Endzhakunyana, va n’wi rhumele swiambalo swakwe leswi nga ni ngati, leswi kombisaka vumbhoni bya leswaku u rhange a xanisiwa a nga si dlayiwa.

Eka xiendlakalo xin’wana, Manana u vitaniwe ehofisini ya le khotsweni ivi a byeriwa xikan’we-kan’we: “N’wana wa wena wa nhwanyana u file ekhotsweni. Xana u lava leswaku a lahliwa hi ndlela yihi?” Xitiviso lexi xi n’wi tseme nhlana naswona eku sunguleni Manana a nga swi tivanga leswi a nga hlamulaka swona. Kambe ripfumelo rakwe leri tiyeke eka Yehovha ri n’wi tiyisile.

Maxaka ya mina ma hi khome kahle mina ni ndzisana ya mina ya xisati. Va hi khome hi malwandla. Entiyisweni, un’wana wa vona u ye eka vadyondzisi va mina a va kombela leswaku va ndzi lehisela mbilu. Hikwalaho vadyondzisi na vona va sungule ku va ni malwandla naswona a va ndzi xupulanga loko ndzi ale ku vula ndzi ku “Heil Hitler!” Kambe tintswalo leti hinkwato a ti endleriwa ku ndzi hundzula eka ripfumelo ra mina leri sekeriweke eBibeleni. Naswona, lexi vavisaka, sweswo swi endlekile.

Loko ku sele tin’hweti ti nga ri tingani leswaku nyimpi yi hela hi May 1945, hi ku tirhandzela ndzi endle mintirho yin’wana ya vandla ra Vantshwa ra Manazi. Ndzi tsalele Manana malunghana ni mhaka leyi, naswona u kume mongo wa mapapila ya mina wa leswaku ndzi tshike pakani ya mina ya ku tirhela Yehovha. Endzhakunyana, u vule leswaku u karhateke ngopfu hi mahungu ya mapapila lawa ku tlula leswi a swi tweke malunghana ni rifu ra Tatana na Elfriede.

Endzhakunyana ka sweswo, nyimpi yi herile, naswona Manana u humile ekhotsweni. Hi ku pfuniwa hi yena ndzi tlhele ndzi kuma matimba hi tlhelo ra moya.

Ku Sungula Ntirho Wa Nkarhi Hinkwawo

Eku heleni ka 1949, endzhaku ka malembe ya mune Nyimpi ya Vumbirhi ya Misava yi herile, mulanguteri la famba-fambaka u hlamusele tsalwa ra Bibele ra Malakiya 3:10: “Tisani ndlwini ya v̌uhlayiselo e ku av̌anyisa ka v̌ukhume ka hikwaswo leŝi mi ŝi fuweke, ŝakudya ŝi v̌a kona e ndlwini ya mina; mi nḍi ringa ha kona, ku v̌ula Yehova wa mav̌andla.” Ndzi susumeteleke ku endla xikombelo xa ntirho wo chumayela wa nkarhi hinkwawo. Xisweswo, hi January 1, 1950, ndzi ve phayona, hilaha vatirheli va nkarhi hinkwawo va vitaniwaka hakona. Endzhakunyana, ndzi rhurhele eSpremberg, laha a ku ri ni xilaveko lexikulu xa maphayona.

Hi August ya lembe rolero, ndzi kume xirhambo xo ya tirha ehofisini ya rhavi ya Timbhoni ta Yehovha eMagdeburg, eJarimani Vuxa. Hambiswiritano, endzhaku ka masiku mambirhi ntsena ndzi fikile, hi August 31, maphorisa ma nghene endhawini ya hina hi ku tsutsuma, ma vula leswaku ku ni swigevenga leswi tumbeleke kona. Timbhoni to tala ti khomiwile ni ku yisiwa ekhotsweni, kambe ndzi kote ku baleka ivi ndzi ya eBerlin Vupela-dyambu, laha Sosayiti ya Watch Tower a yi ri ni hofisi kona. Loko ndzi fika, ndzi rungule swilo leswi humeleleke eMagdeburg. Hi nkarhi lowu fanaka, ndzi byeriwe leswaku Timbhoni to tala ta karhi ta khomiwa eJarimani Vuxa hinkwaro. Entiyisweni, ndzi swi twile leswaku maphorisa ma le ku ndzi laveni leswaku ndzi tlhelela eSpremberg!

Ndzi Khomiwa Ndzi Tlhela Ndzi Khotsiwa

Ndzi averiwe ntirho wa vuphayona eBerlin Vuxa. Endzhaku ka tin’hweti ti nga ri tingani, loko ndza ha tirha tanihi murhumiwa la rhwalaka tibuku ta Bibele ti suka eBerlin Vupela-dyambu ti ya eJarimani Vuxa, ndzi khomiwile ivi ndzi yisiwa edorobeni ra Cottbus, laha ndzi fikeke ndzi tengisiwa ni ku gweveriwa ku tshama malembe ya 12 ekhotsweni.

Xin’wana eka leswi a ndzi hehliwa ha swona a ku ri ku hlohlotela nyimpi. Loko ndzi ri karhi ndzi tengisiwa, ndzi vule marito lawa eku heteleleni: “Swi endleka njhani leswi mina, tanihi un’wana wa Timbhoni ta Yehovha, ndzi hehleriwa ku hlohlotela nyimpi loko tata wa mina a arile ku hlanganyela enyimpini hikwalaho ka leswi a a ri un’wana wa Timbhoni ta Yehovha ni ku tlhela a tsemiwa nhloko hikwalaho ka swona?” Kambe, ku vulavula ntiyiso, vanhu volavo a va nga wu tsakeli ntiyiso.

Tanihi leswi a ndzi ri ni malembe ya 19 hi vukhale a swi nga ndzi oloveli ku ehleketa hi ku ya pfaleriwa malembe ya 12 ekhotsweni. Kambe, ndzi swi tivile leswaku van’wana vo tala swinene va kume swigwevo leswi fanaka. Minkarhi yin’wana, valawuri a va hambanisa hina Timbhoni; kambe hi kote ku burisana ni vabohiwa-kulorhi hi mintiyiso ya Bibele, naswona van’wana va ve Timbhoni.

Minkarhi yin’wana, hina Timbhoni hi pfaleriwe exitokisini xin’we. Kutani hi kote ku dyondza Tibibele ta hina ku antswa. Hi dyondze tindzima hinkwato ta Bibele hi mbilu ni ku ringeta ku nhlokohata tibuku hinkwato ta Bibele. Hi tivekele tipakani malunghana ni leswi hi nga swi endlaka ni ku swi dyondza siku rin’wana ni rin’wana. Minkarhi yin’wana a hi tshama hi khomekile lerova hi byelana hi ku, “A hi na nkarhi,” hambileswi a hi tshama dyambu hinkwaro eswitokisini swa hina hi nga tirhi nchumu!

Minkonaniso ya maphorisa ya le xihundleni a yi karharisa swinene. Minkarhi yin’wana a va tirha vusiku ni nhlikanhi, va ri karhi va hi xungeta hi tindlela to hambana-hambana. Siku rin’wana, ndzi sungule ku karhala swinene ni ku hetiwa matimba, naswona a swi ndzi nonon’hwela ku khongela. Endzhaku ka masiku mambirhi kumbe manharhu, handle ka xivangelo, ndzi suse xiphemu xa bokisi leri a ri ri ekhumbini ra xitokisi xa mina lexi a xi tsariwe milawu ya le khotsweni. Loko ndzi xi hundzuluxa, ndzi vone xi tsariwe swo karhi. Loko ndzi xi tshineta ekusuhi ni rivoninyana leri a ri ri kona, ndzi vone marito lama nge: “Mi nga chavi la dlayaka miri,” ni lama nge “Vo tshembeka i ndzalama, mina ndza va hlayisa.” Marito lawa sweswi i xiphemu xa risimu 27 ebukwini ya tinsimu ya Timbhoni ta Yehovha!

Handle ko kanakana, a ku ri ni makwerhu un’wana la ri eka xiyimo lexi fanaka exitokisini lexi, naswona Yehovha Xikwembu u n’wi tiyisile. Hi ku hatlisa ndzi kume matimba hi tlhelo ra moya ni ku nkhensa Yehovha hikwalaho ka xikhutazo lexi. A ndzi swi lavi ku rivala dyondzo leyi, hikuva yi ndzi dyondzise leswaku a ndzi nge humeleli hi matimba ya mina, hi ku pfuniwa hi Yehovha Xikwembu, ku hava lexi nga ndzi hlulaka.

Hi mpfhuka ka loko Manana a rhurhele eJarimani Vupela-dyambu, a hi nga si tshama hi vonana. Hambiswiritano, a ku ri na Hanna, loyi hi kuleleke evandlheni rin’we loyi a tolovelane ngopfu ni ndyangu wa ka hina. U ndzi endzerile emalembeni wolawo hinkwawo loko ndzi ri ekhotsweni, a tlhela a ndzi tsalela mapapila lama khutazaka ni ku ndzi rhumela swakudya leswinene ngopfu. Ndzi tekane na yena loko ndzi ntshunxiwa ekhotsweni hi 1957, endzhaku ka ku tirha malembe ya 6 eka lama 12 ya xigwevo xa mina.

Loko a ri Hanna nsati wa mina la rhandzekaka, u tirhe hi ku tshembeka a ri na mina eka swiavelo swo hambana-hambana naswona a a ndzi seketela swinene. Leswi a ndzi endleleke swona loko hi ri swin’we entirhweni wa hina wa nkarhi hinkwawo, i Yehovha Xikwembu ntsena la nga kotaka ku n’wi tlherisela swona.

Vutirheli Endzhaku Ka Ku Khotsiwa

Mina na Hanna hi sungule vutirheli bya nkarhi hinkwawo hi ri swin’we ehofisini leyi enkarhini wolowo a yi languteriwa hi Sosayiti ya Watch Tower eBerlin Vupela-dyambu. Ndzi averiwe ku tirha endhawini yo aka ndzi endla vuvatli. Endzhakunyana, hi sungule ku phayona swin’we eBerlin Vupela-dyambu.

Willi Pohl, loyi enkarhini wolowo a langutela ntirho wa hina eBerlin Vupela-dyambu, u ndzi khutaze ku hambeta ndzi dyondza Xinghezi. Ndzi n’wi hlamule ndzi ku: “A ndzi na nkarhi.” Kambe, mayana ndlela leyi a ndzi tsake ha yona leswi hi ku yingisa ndzi hambeteke ndzi dyondza Xinghezi! Hikwalaho ka sweswo, hi 1962, ndzi rhamberiwe eka khoso ya tin’hweti ta khume ya ntlawa wa vu-37 ya Xikolo xa Gilead, eBrooklyn, New York. Endzhaku ka loko ndzi tlhelele eJarimani hi December 2, 1962, mina na Hanna hi hete malembe ya 16 entirhweni wo famba-famba, hi endzela mavandlha eJarimani hinkwaro. Kutani hi 1978, hi rhamberiwe ku ya tirha ehofisini ya rhavi eWiesbaden. Loko mintirho ya rhavi yi rhurhiseriwe emiakweni leyintshwa leyikulu eSelters exikarhi ka va 1980, hi tirhe eka miako yoleyo leyo saseka ku malembe yo hlaya.

Lunghelo Ra Risima Ra Ntirho

Hi 1989 swilo swin’wana leswi a swi nga languteriwanga nikatsongo swi humelerile—Khumbi ra le Berlin ri wile, naswona Timbhoni ta le matikweni ya Yuropa Vuxa ti sungule ku tiphina hi ntshunxeko wa vugandzeri. Hi 1992, mina na Hanna hi rhamberiwe ku ya eLviv, eUkraine, ku ya seketela vahuweleri va Mfumo lava kulaka hi nhlayo endhawini yoleyo.

Elembeni leri tlhandlameke, hi komberiwe ku ya eRussia leswaku hi ya pfuneta ku hlela ntirho wa Mfumo endhawini yoleyo. Le Solnechnoye, ku nga ximutana lexi nga ehandle ka St. Petersburg hi tikhilomitara ta 40, ku akiwe hofisi leswaku yi langutela ntirho wo chumayela eRussia hinkwaro ni le ka swifundzha swin’wana swa khale ka Soviet Union. Loko hi fika, ana se a ku sunguriwe ku akiwa miako yo tshama eka yona ni hofisi leyikulu ni muako wo hlayisa nhundzu.

Ntsako wa hina wu ve lowukulu loko miako ya hina leyintshwa ya rhavi yi nyiketeriwa hi June 21, 1997. Vanhu vo ringana 1492 lava humaka ematikweni ya 42 va hlengeletanile eSolnechnoye leswaku va ta yingisela nongonoko wo hlawuleka. Esikwini leri tlhandlameke ntshungu wo ringana 8400 wu hlengeletanile eXitediyamu xa Petrovsky eSt. Petersburg leswaku ku pfuxetiwa nongonoko wo nyiketela kun’we ni swiviko leswi khutazaka swa vaendzi lava humaka ematikweni man’wana.

Mawaku ku andza loku hlamarisaka loku hi tiphineke hakona eswifundzheni swa 15 swa khale ka Soviet Union! Hi 1946, kwalomu ka vahuweleri va Mfumo vo ringana 4800 a va ri karhi va chumayela endhawini leyi. Kwalomu ka malembe ya 40 endzhakunyana, hi 1985, nhlayo leyi yi fike eka 26 905. Namuntlha, ku ni vahuweleri va Mfumo vo tlula 125 000 eswifundzheni swa khume swa khale ka Soviet Union leswi languteriwaka hi hofisi ya rhavi ra hina eSolnechnoye, naswona vanhu vo tlula 100 000 va karhi va chumayela eswifundzheni swin’wana swa ntlhanu swa khale ka Soviet! Vona ndlela leyi a hi tsake ha yona ku tiva leswaku eswifundzheni swa 15 swa khale ka Soviet, vanhu vo tlula 600 000 va ve kona eXitsundzuxweni xa rifu ra Kreste hi March ya lembe leri nga hela!

Swa ndzi hlamarisa ku vona ndlela leyi Yehovha Xikwembu a kongomiseke ku hlengeletiwa ni ku hleriwa ka vanhu vakwe ha yona ‘emasikwini lawa yo hetelela.’ (2 Timotiya 3:1) Hilaha mupisalema wa Bibele a vulaka hakona, Yehovha u nyika malandza yakwe vutlhari, u va fambisa hi ndlela leyi va faneleke va famba ha yona, naswona u va letela mahlo ya yena ma ri karhi ma va langutile. (Pisalema 32:8) Eka mina i lunghelo lerikulu ku va enhlengeletanweni ya misava hinkwayo ya vanhu va Yehovha!

[Xifaniso lexi nga eka tluka 11]

Ndzi ri ni vamakwerhu vambirhi va xisati, hi 1943

[Xifaniso lexi nga eka tluka 12]

Tatana u tsemiwe nhloko

[Xifaniso lexi nga eka tluka 12]

Manana u ndzi pfunile leswaku ndzi kuma matimba ya moya

[Xifaniso lexi nga eka tluka 13]

Ndzi ri na nkatanga, Hanna

[Xifaniso lexi nga eka tluka 14]

EHolweni ya Mfumo ya rhavi ra le Russia hi nkarhi wa nkulumo yo nyiketela

[Xifaniso lexi nga eka tluka 15]

Ntsendzele lowu nga emahlweni ka miako ni mafasitere ya kamara ro dyela ra rhavi ra hina lerintshwa eRussia