Leswi Nga Pfunaka Lava Xanisiwaka Hi Varhandziwa Va Vona

Nhlangano Wa Rihanyo Wa Misava Hinkwayo wu ri “ku na xiphiqo xa ku xanisiwa ka vavasati emisaveni hinkwayo naswona swi lava ku tekeriwa magoza.” Nhlangano wolowo wu ringanyeta leswaku kwalomu ka 30 wa tipensete ta vavasati lava nga tekiwa va xanisiwa hi varhandziwa wa vona hi swa masangu ni ku tlhela va biwa. Xiviko xa UN xi ringanyeta leswaku hi lembe, siku na siku ku fa vavasati va 137 emisaveni hinkwayo hikwalaho ka ku xanisiwa hi varhandziwa va vona.a

Tinhlayo ti nga ha kombisa ku andza ka xiphiqo xa ku xanisiwa ka vanhu kambe a ti hi hlamuseli hi ntshikelelo ni ku vava loku va ku twaka.

Xana wa xanisiwa ekaya? Kumbe ku ni loyi u n’wi tivaka a xanisiwaka? Loko swi ri tano, xiya tinhla leti landzelaka ta le Bibeleni leti nga ku pfunaka.

U nga tivoni nandzu hi leswi u xanisiwaka

U nga kuma mpfuno

A wu wexe

Ku xanisiwa ka vanhu swi ta hela

Ndlela yo pfuna loyi a xanisiwaka

U nga tivoni nandzu hi leswi u xanisiwaka

Leswi Bibele yi swi vulaka: “Un’wana ni un’wana u ta tihlamulela eka Xikwembu.”—Varhoma 14:12.

Tsundzuka: Loyi a ku xanisaka hi yena a nga na nandzu.

Swi ta va swi hoxile ku va murhandziwa wa wena a ku sola hi leswi yena a ku xanisaka. Vavasati va fanele va rhandziwa ku nga ri ku xanisiwa.—Vakolosa 3:19.

Mikarhi yin’wana munhu loyi a xanisaka murhanziwa wa yena u swi endla hikwalaho ka leswi a nga ni ntshikilelo wa miehleketo, ndlela leyi a kurisiweke ha yona kumbe hikwalaho ka leswi a nwaka ngopfu byala. Hambiswiritano, u ta ti hlamulela eka Xikwembu hikwalaho ka ndlela leyi a ku khomaka hayona. Naswona i vutihlamuleri byakwe ku cinca ndlela leyi a ku khomaka hayona.

U nga kuma mpfuno

Leswi Bibele yi swi vulaka: “Laha ku nga ni vatsundzuxi vo tala swilo swa humelela”—Swivuriso 15:22.

Tsundzuka: Loko u titwa u nga sirhelelekanga kumbe u nga swi tivi leswi u nga swi endlaka, van’wana va nga ku pfuna.

Hikwalahokayini u nga ha lavaka ku pfuniwa hi van’wana? Loko u xanisiwa ku ni swo tala leswi u ehleketaka ha swona. Swi nga ha ku tikela ku teka xiboho hi leswi u nga swi tiviki leswaku hi wihi nchumu wa nkoka eka leswi landzelaka:

Vuhlayiseki bya wena
Vuhlayiseki bya vana va wena
Swiyimo swa wena swa timali
Ku va u rhandza murhandziwa wa wena
Ku navela leswaku murhandziwa wa wena a cinca mahanyelo leswaku mi ta ya emahlweni mi rhandzana

Hi ntolovelo u nga ha titwa u pfilunganyekile naswona u nga swi tivi leswaku u endla yini. I mani loyi a nga ku pfunaka?

Xirho xa ndyangu kumbe munghana loyi u n’wi tsembeka a nga ku pfuna. Ku vulavula ni munhu loyi a khathalaka hi wena swi nga ku pfuna swinene.

Tinomboro ta tiqingho leti vanhu lava xanisiwaka va nga ti tirhisaka ti nga endla leswaku u kuma mpfuno hi xihatla. Lava u nga ta va kuma loko u foyina va ta ku pfuna leswaku u tiva leswi u nga swi endlaka leswaku u ti sirhelela. Loko murhandziwa wa wena a swi xiya leswaku u na xiphiqo naswona u fanele a tshika ku ku xanisa, tinomboro leti ti nga n’wi pfuna leswaku a kuma mpfuno.

Van’wana lava nga ku pfunaka hi xihatla loko u ri ekhombyeni. Va nga ha katsa madokodela, manese kumbe van’wana lava leteriweke.

A wu wexe

Leswi Bibele yi swi vulaka: “Yehovhab u le kusuhi ni lava tshovekeke timbilu; u ponisa lava hetiweke matimba.”—Pisalema 34:18.

Tsundzuka: Xikwembu xi tshembhisa leswaku xi ta ku pfuna.

Yehovha wa khathala swinene hi wena. (1 Petro 5:7) Wa yi twisisa swinene ndlela leyi u titwaka hi yona. A nga ku chavelela hi ku tirhisa rito rakwe ku nga Bibele. Naswona u lava leswaku u khongela eka yena. Loko u khongela u nga n’wi kombela leswaku a ku nyika vutlharhi ni matimba ya leswaku u kota ku langutana ni xiyimo lexi u nga eka xona.—Esaya 41:10.

Ku xanisiwa ka vanhu swi ta hela

Leswi Bibele yi swi vulaka: “Un’wana ni un’wana u ta tshama ehansi ka murhi wakwe wa madiriva ni le hansi ka nkuwa wakwe, A va nge chavisiwi hi munhu.”—Mikiya 4:4.

Tsundzuka: Bibele yi tshembhisa leswaku ku nga ri khale hikwerhu ka hina hi ta tshama endhawini leyi rhuleke.

Yehovha Xikwembu u ta swi herisa hi ku helela swiphiqo hinkwaswo leswi hi langutanaka na swona. Bibele yi tshembisa leswaku: “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona.” (Nhlavutelo 21:4) Hi nkarhi wolowo a hi nge he swi tsundzuki swilo swo biha leswi nga tshama swi hi humelela, hikuva swi tava swi siviwe hi leswinene. (Esaya 65:17) Bibele yi hi tshembisa vumundzuku lebyi nga ta va ni ku rhula.

a Xihloko lexi xi vulavula hi ku xanisiwa ka vavasati kambe tinhla leti ku vulavuriwaka ha tona ti nga pfuna ni vavanuna lava xanisiwaka.

b Yehovha i vito ra Xikwembu hilaha Bibele yi vulaka ha kona.

Ndlela yo pfuna loyi a xanisiwaka

Xana ku ni loyi u n’wi tivaka loyi a xanisiwaka? U nga swi kota ku n’wi pfuna hambiloko u nga swi dyondzelanga.c

Rhiya ndleve loko a vulavula. (Yakobo 1:19) N’wi byele leswaku u tiyimisele ku n’wi yingisela kambe u nga n’wi sindzisi ku vulavula. N’wi tiyisekise leswaku wa swi tshemba leswi a swi vulaka.—Swivuriso 20:5.

Un’wana loyi a tirhaka hi vanhu lava nga tshama va xanisiwa u ri: “Swi nga ha tika leswaku a tiphofula eka wena. Mikarhi yo tala vanhu lava xanisiwaka a va vuli leswaku va xanisiwa kambe va swi tumbeta. Swi nga ha tika ku tshemba leswaku munhu loyi u n’wi tivaka u xanisa van’wana. Kambe munhu loyi a xanisaka van’wana a nga ku khoma hi ndlela leyi hambaneke ni ndlela leyi a khomaka loyi a n’wi xanisaka ha yona.”

N’wi khutaze. (1 Vatesalonika 5:11) Loko u vulavula na yena n’wi tiyisekise leswaku i wa nkoka. N’wi byele leswaku wa khathala hi yena. N’wi tsundzuxe hi vumunhu byakwe lebyinene. Naswona n’wi khutaze leswaku a kuma mpfuno.

N’wi pfune. (Swivuriso 17:17) N’wi pfune hi tindlela tin’wana to tanihi ku n’wi salela na vana kumbe u n’wi lunghiselela swakudya. N’wi vutise leswaku i yini leswi a nga ta swi endla loko a ri ekhombyeni, ni leswaku u ta ya kwihi laha a nga ta va a sirhelelekile.

N’wi tiyisekise leswaku a nga swi kota ku ti endlela swiboho. (Vagalatiya 6:5) N’wi nyike vuxokoxoko lebyi nga n’wi pfunaka ni ku tlhela u bula na yena hi mpfuno lowu a nga wu kumaka. Kambe u nga n’wi byeli leswi a faneleke a swi endla.

c Loko u tiva munhu wa xisati loyi a lavaka ku pfuniwa, swi nga va swinene leswaku u n’wi khutaza leswaku a kombela munghana wa yena wa xisati ku a n’wi pfuna.