Xana Vanhu Va Ta Pfuxiwa Eku Feni?

EKA filimi yin’wana ya khalenyana, ku kombisiwe jaha rin’wana ri yime esirheni ra munhu loyi ri n’wi rhandzaka. Ri te: “Manana a a tshamela ku vula leswaku ku fa i swa ntumbuluko.” Kutani loko khamera yi kombisanyana mfungho lowu a wu ri esirheni, ri tlhele ri ku: “Ndzi navela onge loko a swi nga ri tano.”

Marito lawa ma kombisa ndlela leyi vanhu va tibiliyoni va titwaka ha yona loko va feriwe hi varhandziwa va vona. Rifu i nala lonkulu! Kambe Xikwembu xa tshembisa: “Rifu i nala wo hetelela la nga ta herisiwa.” (1 Vakorinto 15:26) Kambe, ha yini hi fa hambileswi a hi vumbiwe leswaku hi hanya hilaha ku nga heriki? Xana rifu ri ta herisiwa njhani?

Lexi Endlaka Hi Dyuhala Hi Tlhela Hi Fa

Loko Bibele yi vulavula hi Yehovha Xikwembu la nga Muvumbi wa hina, yi ri: “Ntirho wakwe wu hetisekile.” (Deteronoma 32:4; Pisalema 83:18) Adamu wanuna wo sungula u vumbiwe a hetisekile, naswona a a ri ni ntshembo wo hanya hilaha ku nga heriki aEdeni, ku nga ntanga lowu nga Paradeyisi wa laha misaveni laha Xikwembu a xi n’wi veke kona. (Genesa 2:7-9) I yini lexi endleke leswaku Adamu a lahlekeriwa hi kaya leri nga Paradeyisi kutani a dyuhala ivi a fa?

Hi ku kongoma: Adamu a nga yingisanga nawu wa leswaku a nga dyi mbhandzu wa murhi wo karhi. Xikwembu xi byele Adamu ka ha ri emahlweni hi vuyelo lebyi a a ta langutana na byona loko o wu dya, xi ku: “U ta fa hakunene.” (Genesa 2:16, 17) Adamu u yingise nsati wakwe Evha kutani a tlula nawu wolowo wa Xikwembu, hiloko xi va hlongola aEdeni. Xivangelo lexi endleke leswaku Xikwembu xi teka goza hi ku hatlisa i xa nkoka. Bibele yi ri: “Leswaku [Adamu] a nga tshambuluti voko a teka mbhandzu wa murhi wa vutomi [entangeni] a dya kutani a hanya hilaha ku nga heriki.”—Genesa 3:1-6, 22.

Adamu na Evha va file hikwalaho ka ku nga yingisi, kutani ha yini vatukulu va vona hinkwavo va dyuhala va tlhela va fa? Hikuva va tswariwe va ri ni xidyoho xa Adamu, naswona xidyoho xi endle leswaku vanhu va nga hetiseki ni leswaku vana va vona hinkwavo va fa. Bibele yi ri: “Leswi xidyoho xi ngheneke emisaveni hi munhu un’we [ku nga Adamu], ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.”—Varhoma 5:12.

Hi Ta Swi Kota Ku Tlhela Hi Hanya Hilaha Ku Nga Heriki

Hilaha hi swi tweke hakona eku sunguleni, “rifu [ri] ta herisiwa”—a ri nge he vi kona. (1 Vakorinto 15:26) Njhani? Bibele yi ri: “Hikwalaho ka xiendlo xin’we ntsena xa ku tsetselela, vanhu va mixaka hinkwayo va vuriwa lava lulameleke vutomi.” (Varhoma 5:18) I yini lexi endlaka leswaku munhu a amukeleka eka Xikwembu ni ku va ni ntshembo wo tiphina hi vutomi lebyi nga heriki?

I lunghiselelo ra ku herisa xidyoho lexi vanhu hinkwavo va xi kumeke eka munhu wo sungula, Adamu. Bibele yi ri: “Nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Loko Yesu a vulavula hi lunghiselelo leri, leri endleke leswaku vanhu va va lava lulameleke vutomi u te: “Xikwembu xi rhandze misava [ya vanhu] swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:16.

Wa nga ehleketa hi ndlela leyi Xikwembu swin’we ni N’wana wa xona Yesu Kreste, loyi a xanisekeke ngopfu hikwalaho ka hina va hi rhandzaka ha yona. Muapostola Pawulo u tsarile, a ku: ‘N’wana wa Xikwembu u ndzi rhandzile kutani a tinyiketa hikwalaho ka mina.’ (Vagalatiya 2:20) Kambe ha yini Yesu ku ri yena ntsena munhu loyi a a faneleka ku “nyikela moya-xiviri wakwe wu va nkutsulo” wa hina kutani a hi kutsula eka vuyelo lebyi dlayaka bya xidyoho?—Matewu 20:28.

Yesu hi yena ntsena loyi a a ta nyikela hi moya-xiviri wa yena tanihi nkutsulo hikuva hi yena ntsena munhu loyi a nga tswariwa a nga ri na xidyoho xa munhu wo sungula, ku nga Adamu. Ha yini a tswariwe a nga ri na xidyoho? Hikuva vutomi bya Yesu bya le tilweni byi hundziseriwe hi singita embelekweni wa Mariya loyi a a nga si tshama a etlela ni wanuna. Kutani, hilaha ntsumi yi byeleke Mariya hakona, n’wana wakwe wa mufana a a ri ‘N’wana wa Xikwembu la kwetsimaka.’ (Luka 1:34, 35) Leswi hi swona swi endleke leswaku Yesu a vuriwa “Adamu lowo hetelela” naswona a tswariweke a nga ri na xidyoho xa “munhu wo sungula Adamu.” (1 Vakorinto 15:45) Tanihi leswi Yesu a a nga ri na xidyoho, a a faneleka ku nyikela vutomi byakwe tanihi “nkutsulo lowu yelanaka”—vutomi byakwe a byi fana ni bya munhu wo sungula la hetisekeke, loyi a a nga ri na xidyoho.—1 Timotiya 2:6.

Hi lunghiselelo leri ra nkutsulo, Xikwembu xi endle leswaku hi swi kota ku kuma leswi Adamu wo sungula a swi lahleke, ku nga vutomi lebyi nga heriki emisaveni leyi nga paradeyisi. Leswi vanhu va timiliyoni lava nga tshama va hanya se va feke, va fanele va pfuxiwa leswaku va ta kuma nkateko lowu. Lowu i ntshembo lowu tsakisaka hakunene! Kambe xana swa tika ku swi pfumela sweswo?

Leswi Nga Ku Pfunaka Leswaku U Pfumela

Xana swa ku tikela ku pfumela leswaku Yehovha Xikwembu, loyi a nga musunguri wa vutomi, u na wona matimba yo tlhela a vumba munhu loyi a nga tshama a hanya? Anakanya hi vuswikoti lebyi Xikwembu xi byi nyikeke wansati wo sungula, bya leswaku ku vumbeka n’wana embelekweni wa yena. ‘Adamu u tivane ni nsati wakwe Evha,’ kutani endzhaku ka tin’hweti ta kaye u tivurile hi n’wana loyi a fanaka na vona. (Genesa 4:1) Leswi endlekeke embelekweni wa Evha loko a tikile swa ha tekiwa tanihi singita leri munhu a nga ta ka a nga ri twisisi hi ku helela!—Pisalema 139:13-16.

Vanhu a va ha swi teki swi ri singita ku velekiwa ka n’wana tanihi leswi hi siku ku velekiwaka vana va madzana ya magidi. Kambe vanhu vo tala a va pfumeli leswaku munhu loyi a nga tshama a hanya a nga pfuxiwa eku feni. Loko Yesu a byela vanhu lava a va ri eku rileni ka rifu ra n’wana leswaku va tshika ku rila, ‘va sungule ku n’wi hleka hi ku hlekula’ hikuva a va swi tiva leswaku u file. Kambe Yesu u vulavule ni n’wana loyi a feke a ku: “‘Pfuka!’ Hi ku hatlisa nhwanyana a pfuka kutani a sungula ku famba.” Hi byeriwa leswi: “Xikan’we-kan’we [lava a va ri kona] a va nga ha tikoti hi ku tsaka lokukulu.”—Marka 5:39-43; Luka 8:51-56.

Loko Yesu a kombela leswaku sirha-bako ra xitsundzuxo ra munghana wakwe Lazaro la rhandzekaka ri pfuriwa, Marta makwavo wa Lazaro u arile a ku eka yena: “U fanele se a nun’hwa hikuva swi endla mune wa masiku.” Hambiswiritano, endzhaku ka loko Yesu a pfuxe Lazaro, vanhu a va nga ha tikoti hi ku tsaka! (Yohane 11:38-44) Vanhu vo tala va sungule ku tolovelana ni masingita ya Yesu. Loko Yohane Mukhuvuri a ri ekhotsweni, vadyondzisiwa va Yohane va n’wi vikele hi ta mintirho ya Yesu va ku: “Ni lava feke va pfuxiwa.”—Luka 7:22.

Ku Pfuxiwa Eku Feni

Ha yini Yesu a endle masingita wolawo, kasi endzhakunyana vanhu lava a va pfuxeke eku feni va tlhele va vabya kutani va fa? U ma endlele ku kombisa leswaku leswi Adamu munhu wo sungula a swi lahleke, ku nga vutomi lebyi nga heriki emisaveni leyi nga paradeyisi, swi ta tlhela swi kondleteriwa. Loko Yesu a pfuxa vafi a a kombisa ndlela leyi vanhu va timiliyoni va nga ta hetelela va “[dye] ndzhaka ya misava” ha yona ni ku “tshama eka yona hi masiku.”—Pisalema 37:29.

Lexi tsakisaka, na hina hi nga va exikarhi ka lava nga ni ntshembo lowukulu wa ku hanya hilaha ku nga heriki loko ho ‘tinyiketela eka Xikwembu.’ Bibele yi vula leswaku ku tinyiketela koloko, “ku . . . ni xitshembiso xa vutomi bya sweswi ni lebyi nga ta ta.” ‘Vutomi byebyo byi nga ta ta,’ byi tlhela byi vuriwa ‘vutomi bya xiviri.’—1 Timotiya 4:8; 6:19.

A hi kambisiseni leswi vutomi bya xiviri, vutomi lebyi nga ta va kona emisaveni leyintshwa ya ku lulama byi nga ta va xiswona.

[Xifaniso lexi nga eka tluka 6]

“A va nga ha tikoti hi ku tsaka lokukulu”