Vantshwa Va Vutisa

Xana Ndzi Fanele Ndzi Wu Teka Njhani Nkarhi Lowu Ndzi Vekeriweke Ku Vuya Ha Wona eKaya?

U vuya ekaya endzhaku ko dzumba ni vanghana va wena nimadyambu. Nkarhi lowu a wu fanele u vuya ha wona se wu hundzile. U hundzisenyana nkarhi lowu u vekeriweke wona leswaku u va u vuyile, kutani sweswi u fanele u hlamusela eka vatswari va wena. Wa kanakana u nga si nghena endlwini. U tibyela u ku, ‘Kumbexana Tatana na Manana se va etlele.’ U pfula rivanti hakatsongo-ntsongo hiloko u va kuma va yimile va ri eku languteni ka wachi, va rindze leswaku u va hlamusela.

XANA u tshame u humeleriwa hi mhaka yo fana ni leyi nga laha henhla? Xana wena ni vatswari va wena mi pfa mi holovela nkarhi lowu u nga ta kota ku vuya ha wona ekaya? Debora loyi a nga ni malembe ya 17 u ri: “Hi tshama endhawini leyi sirhelelekeke, kambe loko ko kala ku va xikarhi ka vusiku ndzi nga si vuya ekaya vatswari va mina va ta sungula ku vilela.”a

Ha yini swi nga tikaka ku landzela nkarhi lowu u vekeriweke wona leswaku u va u vuyile ekaya? Xana swi hoxile ku lava ntshunxeko lowu engetelekeke? Xana u nga swi kotisa ku yini ku wu landzela nkarhi lowu u vekeriweke wona leswaku u va u vuyile ekaya?

Leswi U Vilelaka Ha Swona

Nkarhi lowu u vekeriweke wona leswaku u va u vuyile ekaya wu nga ku nyangatsa, ngopfu-ngopfu loko wu endla leswaku u nga swi koti ku dzumba ni vanghana va wena. Natasha loyi a nga ni malembe ya 17, u ri: “Nkarhi lowu ndzi vekeriweke wona hi vatswari va mina wa ndzi nyangatsa. Siku rin’wana vatswari va mina a va swi tiva leswaku ndzi le ku voneni ka filimi ni vanghana va mina ekusuhi ni le kaya. Nilokoswiritano, loko ndzi hlwele ku vuya hi timinete timbirhi, va ndzi bele riqingho va ndzi vutisa leswaku ha yini ndzi nga si vuya ekaya!”

Nhwanyana un’wana la vuriwaka Stacy u hlamusela xiphiqo xin’wana. U ri: “A ku languteriwe leswaku ndzi va ndzi vuyile ekaya Manana na Tanana va nga si ya eku etleleni. Loko vo kala va ndzi rindza, a swi ta vula leswaku ndzi ta kuma vatswari va mina va nyangatsekile swinene.” Xana a ku ta endleka yini? Stacy wa engetela a ku: “A va ta ndzi vona nandzu, naswona sweswo a swi nyenyetsa. A ndzi nga swi twisisi leswaku ha yini a va nga yi eku etleleni loko ndzi nga si vuya!” Ku nga twisisani ko tano ni vatswari va wena swi nga endla u titwa ku fana na Katie wa malembe ya 18, la nge: “Ndzi navela onge vatswari va mina va nga ndzi nyika ntshunxeko lowu engetelekeke leswaku ndzi nga titwi onge ndzi va sindzisa leswaku va ndzi nyika ntshunxeko lowu engetelekeke.”

Kumbexana u titwa hi ndlela leyi fanaka ni ya vantshwa lava ka ha ku vulavuriwaka ha vona. Loko swi ri tano, tivutise xivutiso lexi:

◼ Ha yini ndzi nga swi rhandzi ku dzumba ekaya? (Fungha nhlamulo yin’we.)

□ Swi endla leswaku ndzi kota ku tilawula.

□ Swi ndzi pfuna leswaku ndzi hunguta ntshikilelo.

□ Swi endla leswaku ndzi kota ku dzumba ni vanghana va mina.

Swivangelo leswi swi tolovelekile. I swa ntumbuluko leswaku loko u ri karhi u kula u lava ku tilawula naswona vuhungasi lebyinene byi nga phyuphyisa. Ku tlula kwalaho, Bibele yi ku khutaza leswaku u endla xinghana ni vanhu lava nga ta ku khutaza leswinene. (Pisalema 119:63; 2 Timotiya 2:22) Sweswo swi nga tika loko u boheka ku va ekaya minkarhi hinkwayo!

Kutani, xana u nga wu kuma njhani ntshunxeko wo tano loko u boheka ku landzela nkarhi lowu u vekeriweke wona leswaku u vuya ekaya? Xiya swiphiqo leswi landzelaka.

Xiphiqo xo sungula: Nkarhi lowu u vekeriweke wona leswaku u va u vuyile ekaya, hi wona wu ku endlaka u titwa onge wa ha ri n’wana. Andrea loyi sweswi a nga ni malembe ya 21 u ri: “A ndzi titwa onge ndza ha ri n’wana loko ndzi fanele ku karhata munhu wo karhi nimadyambu leswaku a ndzi yisa ekaya nkarhi wa mina wo muka wu nga si hundza.”

Lexi nga pfunaka: A hi nge wa ha ku kuma layisense yo chayela. Ematikweni man’wana ku ni nawu wa leswaku u fanele u chayela kwihi, rini kumbe u ri na vamani—kukondza u fika emalembeni yo karhi. Xana u nga endla xiboho xo tshika ku va ni layisense yoleyo, u tibyela u ku: “Loko ndzi nga pfumeleriwi ku chayela hi ku ntshunxeka, swa antswa ndzi nga chayeli hi ku helela”? Nikatsongo! U ta swi teka ku ri lunghelo lerikulu ku va ni layisense.

Hilaha ku fanaka ringeta ku teka ku landzela nkarhi lowu vatswari va wena va ku vekeleke wona ku ri xikombiso xo endla nhluvuko—goza lerinene. U nga languti ntsena leswi wu ku sivelaka swona kambe languta ni ntshunxeko lowu u wu kumaka. Xana sweswi a wu na ntshunxeko lowu engetelekeke ku tlula lowu a wu ri na wona loko wa ha ri ntsongo?

Lexi endlaka swi pfuna: Swi nga ku olovela ku landzela nkarhi lowu u vekeriweke wona leswaku u va u vuyile ekaya ha wona loko u wu teka wu ri lunghelo ku nga ri xihinga. Loko u wu landzela kahle sweswi, hi ku famba nkarhi swi ta endla leswaku vatswari va wena va ku nyika ntshunxeko lowu engetelekeke.—Luka 16:10.

Xiphiqo xa vumbirhi: A wu swi twisisi leswaku ha yini u fanele u hatla u vuya ekaya. Nikki loyi a nga tshama a nga wu tsakeli nkarhi lowu a vekeriweke wona, u ri: “Ndzi tsundzuka ndzi ri karhi ndzi anakanya leswaku Manana u veke milawu hileswi a tsakisiwaka hi ku veka milawu.”

Lexi nga pfunaka: Tirhisa nawu lowu kongomisaka lowu kumekaka eka Swivuriso 15:22 lowu nge: “Makungu ma pfilunganyeka laha ku nga riki na ku kanerisana ka le xihundleni, kambe laha ku nga ni vatsundzuxi vo tala swilo swa humelela.” Burisana ni vatswari va wena hi ndlela yo rhula. Ringeta ku kuma xivangelo lexi endlaka leswaku va ku vekela nkarhi wolowo.b

Lexi endlaka swi pfuna: Ku yingisa swivangelo swa vatswari va wena swi nga ku pfuna. Stephen u ri: “Tatana u ndzi byele leswaku vurhongo bya Manana a byi nga phahi kukondza ndzi vuya ekaya ndzi hlayisekile. A ndzi nga si tshama ndzi anakanya hi mhaka yoleyo.”

Tsundzuka: Minkarhi hinkwayo swa antswa ku burisana hi mhaka ya kona hi ndlela yo rhula ematshan’weni yo holova, hikuva loko wo holova swi nga ha tisa vuyelo byo biha. Natasha, loyi a boxiweke eku sunguleni u ri: “Ndzi kume leswaku loko ndzi hlundzukela vatswari va mina, swi endla leswaku va tiyisa voko kutani va ndzi alela ku endla swilo swo hlayanyana leswi a ndzi lava ku swi endla.”

Xiphiqo xa vunharhu: U vona onge vatswari va wena va lawula vutomi bya wena. Minkarhi yin’wana vatswari va vula leswaku milawu ya le kaya, leyi nga ha katsaka nkarhi lowu va ku vekelaka wona, yi endleriwe ku ku pfuna. Brandi la nga ni malembe ya 20, u ri: “Loko vatswari va mina va ndzi byela sweswo, swi endla ndzi titwa onge a va swi lavi leswaku ndzi tihlawulela swilo swo karhi kumbe ku phofula mavonelo ya mina.”

Lexi nga pfunaka: U nga hlawula ku landzela marito ya Yesu lama tsariweke eka Matewu 5:41 lama nge: “Loko un’wana loyi a nga ni vulawuri a ku sindzisa ku endla ntirho wo famba khilomitara yin’we, famba na yena tikhilomitara timbirhi.” Ashley ni buti wa yena va kume ndlela leyi tirhaka yo tirhisa nawu wolowo lowu kongomisaka. U ri: “Nkarhi hinkwawo hi ringeta ku vuya ekaya ka ha sele 15 wa timinete leswaku ku fika nkarhi lowu hi vekeriweke ku vuya ha wona ekaya.” Xana u nga tivekela pakani leyi fanaka?

Lexi endlaka swi pfuna: Swi tsakisa ngopfu ku endla swilo hi leswi hi lavaka ku swi endla, ku ri ni ku va hi swi endla hileswi hi bohekaka! Nakambe anakanya hi mhaka leyi: Loko u hlawula ku vuya ekaya ri nga si pela, u lawula nkarhi wa wena. Ku tlula kwalaho, u nga ha tsundzuxiwa hi nawu lowu wu kongomisaka: “Xiendlo xa wena lexinene xi nga vi xa ku sindzisiwa, kambe xi va xa ku tirhandzela.”—Filemoni 14.

Ku vuya ekaya ri nga si pela swi endla leswaku vatswari va wena va ku tshemba leswi endlaka leswaku va ku nyika ntshunxeko lowu engetelekeke. Wade loyi a nga ni malembe ya 18 u ri: “Loko vatswari va wena va ku tshemba, va ta ku nyika ntshunxeko lowu engetelekeke.”

Tsala xiphiqo xin’wana lexi vangiwaka hi nkarhi lowu u vekeriweke wona leswaku u va u vuyile ekaya ha wona.

․․․․․

I yini lexi nga ku pfunaka leswaku u hlula xiphiqo lexi?

․․․․․

Ha yini u anakanya leswaku mhaka leyi yi nga pfuna?

․․․․․

Siku rin’wana u ta huma muti kutani u va ni ntshunxeko wo tala. Sweswi, lehisa mbilu. Tiffany loyi sweswi a nga ni malembe ya 20 u ri: “Swi nga endleka u nga ri na wona hinkwawo ntshunxeko lowu u wu lavaka kambe loko wo dyondza ku xixima swipimelo leswi u vekeriweke swona, a wu nge dyi mbitsi emalembeni ya wena hinkwawo ya kondlo-a-ndzi-dyi.”

Swihloko swin’wana leswi nge “Vantshwa Va Vutisa” swi kumeka eka Web site leyi nge, www.watchtower.org/ype

[Tinhlamuselo ta le hansi]

SWIVUTISO SWO ANAKANYISISA HA SWONA

◼ Xana nkarhi lowu u vekeriweke wona leswaku u va u vuyile ekaya ha wona wu swi kombisa njhani leswaku vatswari va wena va khathala hi wena?

◼ Loko u vuye endzhaku ka nkarhi lowu u vekeriweke wona leswaku u va u vuyile ekaya, xana u nga endla njhani leswaku vatswari va wena va tlhela va ku tshemba?

[Bokisi leri nga eka tluka 27]

LESWI TINTANGHA TA WENA TI SWI VULAKA

“Ndzi anakanya leswaku nkarhi lowu vatswari va mina va ndzi vekeleke wona wa twisiseka hikuva loko ndzi nga kumi nkarhi lowu eneleke wo etlela, ndzi va ni ximbilwambilwana!”—Gabe wa malembe ya 17.

“Nkarhi lowu vatswari va mina va ndzi vekeleke wona wu ndzi pfunile leswaku ndzi nga weli ekhombyeni. Hi xikombiso, siku rin’wana vantshwa van’wana va te ni byala exinkhubyanini xin’wana kasi malembe ya vona a ma nga si va pfumelela ku byi nwa. Mina na munghana wa mina hi te loko hi vona byala ho namba hi vula leswaku nkarhi wa leswaku hi muka se wu fikile.”—Katie wa malembe ya 18.

[Bokisi leri nga eka tluka 28]

TWISISA VATSWARI VA WENA KAHLE

Ha yini u nga buli ni vatswari va wena hi ta nkarhi lowu u vekeriweke wona leswaku u va u vuyile ekaya, kutani u vona loko hi vumbirhi bya n’wina mi ta pfumelelana eka tinhla leti landzelaka?

◼ Ndzi ta vuya ekaya hi ․․․․․ eka masiku lawa: ․․․․․, naswona hi ․․․․․ eka masiku lawa: ․․․․․.

◼ Ndza swi twisisa leswaku loko ndzi nga vuyi ekaya hi nkarhi lowu ndzi vekeriweke wona, nkarhi wa mina wu ta hungutiwa wu va ․․․․․ ku ringana mavhiki ya ․․․․․.

◼ Nkarhi lowu ndzi vekeriweke wona leswaku ndzi va ndzi vuyile ekaya wu ta kambisisiwa loko ndzo vuya ekaya hi nkarhi ku ringana tin’hweti ta ․․․․․.

[Bokisi/Xifaniso lexi nga eka tluka 28]

LOKO U LAVA KU PFUMELERIWA KU VUYA EKAYA NIVUSIKU . . .

◼ Phofula mhaka yoleyo hi nkarhi lowu faneleke.—Eklesiasta 3:1, 7.

◼ Tiendlele vito lerinene hi ku vuya hi nkarhi.—Matewu 5:37.

◼ Kombela vatswari va wena leswaku va pfa va ku pfumelela ku hlwelanyana ku vuya ekaya leswaku u va kombisa leswaku u ni vutihlamuleri.—Matewu 25:23.

[Bokisi leri nga eka tluka 29]

EKA VATSWARI

◼ N’wana wa wena se u hlwele hi 30 wa timinete ku vuya ekaya kutani u twa rivanti ri pfuriwa hakatsongo-ntsongo. U tibyela u ku, ‘U ehleketa leswaku ndzi ye eku etleleni.’ Kambe a wu si etlela. Entiyisweni a wu tshame ekusuhi ni nyangwa ku sukela loko ku hundze nkarhi lowu n’wana wa wena a vekeriweke wona leswaku a vuya ha wona. Rivanti ri pfuriwa hi ku helela, kutani u kotlana ni n’wana wa wena wa jaha hi mahlo. U ta n’wi byela yini? U ta endla yini?

U nga tihlawulela leswaku u ta endla yini. U nga swi ba hi makatla leswi n’wana wa wena a nga vuyangiki hi nkarhi lowu u n’wi vekeleke wona. U nga ha tibyela u ku, ‘Minkarhi yin’wana vafana va endla swiboho leswi hoxeke.’ Kumbe, u nga ha ku, “A ndzi nge he ku pfumeleli leswaku u ya eku tihungaseni ku ringana nkarhi wo leha.” Ematshan’weni yo kariha, rhanga hi ku yingisela xivangelo lexi endleke leswaku a nga vuyi hi nkarhi lowu a vekeriweke wona, kumbexana i xivangelo lexi twalaka. Kutani u nga tirhisa nkarhi wolowo leswaku u dyondzisa n’wana wa wena dyondzo ya nkoka. Njhani?

Xiringanyeto: Byela n’wana wa wena leswaku mi ta bula hi mhaka yoleyo mundzuku. Kutani, hi nkarhi lowu faneleke tshama ehansi na yena mi vulavula hi ndlela leyi u nga ta yi tamela ha yona mhaka yoleyo. Vatswari van’wana va ringete endlelo leri landzelaka. Loko n’wana wa vona o vuya ekaya endzhaku ka nkarhi lowu va pfumelelaneke ha wona, nkarhi lowu a va n’wi vekele wona wu ta hungitiwa hi timinete ta 30. Hi tlhelo rin’wana, loko n’wana wa wena a tshamela ku vuya ekaya hi nkarhi naswona a endla leswaku u n’wi tshemba, u nga ha vona swi fanerile ku n’wi nyika ntshunxeko lowu engetelekeke—minkarhi yin’wana u pfa u engetela nkarhi lowu u n’wi vekeleke wona leswaku a va a vuyile ekaya. I swa nkoka leswaku n’wana wa wena a wu tiva kahle nkarhi lowu u languteleke leswaku a vuya ha wona ekaya ni leswaku u ta xupuriwa njhani loko a nga vuyi hi nkarhi lowu a vekeriweke wona. Kutani loko a nga landzeli swiletelo leswi u fanele u n’wi xupula.

Xiya: Bibele yi ri: “Ku anakanyela ka n’wina a ku tiviwe.” (Vafilipiya 4:5) Loko u nga si veka nkarhi lowu n’wana wa wena a faneleke a vuya ha wona ekaya, u nga ha rhanga u bula na yena hi mhaka leyi, u n’wi pfumelela leswaku a ringanyeta nkarhi lowu a lavaka ku vuya ha wona ni swivangelo swo va a hlawule nkarhi wolowo. Tiyimisele ku anakanyisisa hi xikombelo xolexo. Loko n’wana wa wena a kombise leswaku u ni vutihlamuleri, u nga ha amukela swiringanyeto swa yena loko swi twala.

Ku hlayisa nkarhi i swa nkoka evuton’wini. Kutani loko u vekela n’wana wa wena nkarhi lowu a faneleke ku vuya ha wona ekaya a wu endleli leswaku a nga humeleriwi hi khombo ntsena. U n’wi dyondzisa dyondzo leyi nga ta n’wi pfuna hambiloko se a hume muti.—Swivuriso 22:6.

[Xifaniso lexi nga eka tluka 27]

Ku fana ni layisense yo chayela, nkarhi lowu u vekeriweke wona leswaku u va u vuyile ekaya i xikombiso xo endla nhluvuko