Vantshwa Va Vutisa

Ha Yini Vatswari Va Mina Va Nga Ndzi Twisisi?

ANAKANYA HI XIYIMO LEXI.

I Ravuntlhanu nimadyambu hi awara ya tsevu naswona Amukelani loyi a nga ni malembe ya 17 wa ganyula a ya enyangweni wa le mahlweni ka yindlu. U lela vatswari vakwe, u tibyela leswaku va ta rivala ku n’wi vutisa leswaku u ta vuya hi nkarhi muni, u ri: “Ndza vuya ku nga ri khale!”

Wa swi tiva leswaku a nga si tshama a famba vatswari vakwe va nga n’wi vutisi leswaku u ta vuya hi nkarhi muni.

Mana wakwe wa n’wi vutisa: “Amu, u ta vuya hi nkarhi muni?”

Hiloko Amukelani a yima, ivi hi ku nghanghamela a ku: “Eeh . . . , ndzi ta hlwelanyana, mi nga karhateki ha mina.” Kutani a pfula rivanti a humela ehandle. Hiloko tata wakwe a n’wi vitana: “Amukelani, yima kwalaho!”

Loko a yima, tata wakwe u vulavula na yena a hlundzukile: “Wa wu tiva nawu wa laha kaya. A wu fanelanga u vuya endzhaku ka awara ya khume—ndzi hetile!”

Amukelani u hundzuluka a ri karhi a gungula a ku: “Papa, phela swi khomisa tingana ku byela vanghana va mina leswaku ndzi fanele ndzi vuya ekaya hi nkarhi.”

Tata wakwe a nga n’wi tweli vusiwana, u tlhela a ku: “Ndzi ri a wu fanelanga u vuya endzhaku ka awara ya khume!”

KUMBEXANA u tshame u va eka xiyimo lexi fanaka. Ku nga khathariseki leswaku mhaka ya kona yi khumba nkarhi wo vuya ekaya, vuyimbeleri, vanghana kumbe swiambalo, loko vatswari va wena va ku vekele nawu a va swi lavi ku wu cinca. Hi xikombiso:

“Endzhaku ka loko tata wa mina wa vumbirhi a tekane na Manana, u ndzi tshikise vuyimbeleri hinkwabyo lebyi a ndzi byi rhandza. Ndzi hetelele hi ku lahla ti-CD ta mina hinkwato!”—Brandon.a

“Manana wa ndzi sola hileswi ndzi nga riki na vanghana. Kambe loko ndzi kombela ku tihumesa ni munhu loyi a nga n’wi tiviki, wa ala. Leswi swa ndzi borha!”—Carol.

“Tatana ni mana wa mina wa vumbirhi a va ndzi pfumeleli ku ambala swikipa leswi ndzi swi rhandzaka. Naswona Tatana u vula leswaku xin’wana ni xin’wana lexi nga ehenhla ka matsolo ya mina xi komile!”—Serena.

I yini leswi u nga swi endlaka loko wena ni vatswari va wena mi nga pfumelelani? Xana u fanele u vulavula na vona hi mhaka leyi? Joanne wa malembe ya 17 u ri: “Hakanyingi vatswari va mina a va ndzi yingiseli.” Amy wa malembe ya 15 u ri: “Loko ndzi swi vona leswaku vatswari va mina a va ndzi twisisi, ndzo miyela.”

U nga hatli u lan’wa! Vatswari va wena va tiyimiserile ku ku yingisela.

Tsundzuka: Hambi ku ri Xikwembu xa yingisa loko vanhu va xi byela swiphiqo swa vona. Hi xikombiso, Yehovha u yingise Muxe loko a kombelela Vaisrayele lava nga yingisiki.—Eksoda 32:7-14; Deteronoma 9:14, 19.

U nga ha vona onge vatswari va wena a va anakanyeli hi ndlela leyi Xikwembu xi anakanyelaka ha yona. Swi nga ha endleka wa swi xiya leswaku ku ni ku hambana lokukulu eka ndlela leyi Muxe a vulavuleke na Yehovha ha yona malunghana ni leswi a swi humelela erixakeni ra Israyele ni ndlela leyi wena u vulavulaka ha yona ni vatswari va wena, hi mhaka yo vuya nivusiku. Kambe swiyimo leswi swa yelana:

Loko u lava ku vula yinhla ya nkoka, vanhu lava nga ni vutihlamuleri—vo tanihi vatswari va wena—swi nga ha endleka va tiyimisela ku ku yingisa.

Ndlela leyi u yi vekaka ha yona mhaka ya wena hi yona yi nga ta ku pfuna. Magoza lama landzelaka ma ta ku pfuna leswaku u endla tano:

1. Tiva xiphiqo xa kona. Laha hansi, tsala mhaka leyi wena ni vatswari va wena mi nga pfumelelaniki eka yona.

․․․․․

2. Tiva ndlela leyi u titwaka ha yona. Laha hansi, tsala rito leri kombisaka vonelo ra vatswari va wena eka mhaka leyi ku khunguvanyisaka, leyi ku tsanisaka, leyi ku khomisaka tingana, leyi endlaka u tivona onge a wu tshembeki kumbe swin’wana. (Hi xikombiso: Eka xikombiso lexi boxiweke eku sunguleni ka xihloko lexi, Amukelani u kombise leswaku nkarhi wo vuya ekaya lowu vatswari vakwe va n’wi vekeleke wona wu endla a titwa a khomiwa hi tingana emahlweni ka vanghana vakwe.)

․․․․․

3. Anakanya ku fana ni mutswari. Tivone hi mahlo ya mianakanyo u ri ni n’wana wa malembe ya kondlo-a-ndzi-dyi la langutaneke ni xiphiqo lexi fanaka ni lexi u xi boxeke eka Goza 1. Loko a wo va mutswari, i yini lexi a wu ta karhateka ngopfu ha xona naswona ha yini? (Hi xikombiso: Eka xikombiso xa le sunguleni, swi nga ha endleka vatswari va Amukelani a va vilerisiwa hi vuhlayiseki byakwe.)

․․․․․

4. Kambisisa mhaka ya kona. Hlamula swivutiso leswi landzelaka:

U nga vuyeriwa njhani eka vonelo ra vatswari va wena?

․․․․․

I yini leswi u nga swi endlaka leswaku va nga karhateki ha wena?

․․․․․

5. Bula ni vatswari va wena hi mhaka ya kona ivi mi fikelela makumu man’we. Hi ku tirhisa magoza lama boxiweke laha henhla ni ku kambisisa swiringanyeto leswi nga ebokisini leri nge “Switsundzuxo Swo Vulavurisana,” u nga swi kota ku vulavurisana ni vatswari va wena hi ndlela leyinene. Leswi swi n’wi pfunile Kellie leswaku a antswisa ndlela leyi a vulavurisanaka ha yona ni vatswari vakwe. U ri: “Ku phikizana a swi tlhantlhi xiphiqo naswona a swi nge endli leswaku u hlula. Ndzi lulamisa xiphiqo hi ku vulavurisana ni vatswari va mina. Hakanyingi hi endla xiboho lexi hi pfumelelanaka ha xona.”

Swihloko swin’wana leswi nge “Vantshwa Va Vutisa” swi kumeka eka Web site ya www.watchtower.org/ype

[Nhlamuselo ya le hansi]

[Bokisi leri nga eka tluka 20]

SWITSUNDZUXO SWO VULAVURISANA

“Ku yingisela swa vuyerisa swinene ku tlula ku holova. Loko u lava vatswari va wena va ku yingisa ni ku ku twisisa, na wena endla tano.”—Rianne.

Hlaya Vafilipiya 2:3, 4.

“U nga kanetani na vona! Sweswo ndzi swi endlile ko hlayanyana, kambe ndzi xiye leswaku a ndzi ta va ndzi swi papalatile loko a ndzi lo lawula ririmi ra mina.”—Danielle.

Hlaya Swivuriso 17:27; 21:23.

“Va yimele va rhurisa timbilu kutani u vulavula na vona hi nkarhi lowu va nga ta ku yingisela.”—Collette.

Hlaya Swivuriso 25:11.

“Kombisa vatswari va wena leswaku wa va xixima naswona wa va yingisa. Loko u nga si va byela ndlela leyi u titwa ha yona, va tiyisekise leswaku u swi twile leswi va swi vuleke naswona wa swi twisisa.”—Emily.

Hlaya Swivuriso 23:22; Yakobo 1:19.

[Bokisi leri nga eka tluka 20]

MHAKA YA XIHERI

A hi hinkwato timhaka leti mi nga pfumelelaniki eka tona leti mi faneleke mi vulavula ha tona. Eka swiyimo swin’wana u nga ha “vula leswi nga embilwini ya wena, . . . kutani u miyela.” (Pisalema 4:4) Xinhwanyetana lexi vitaniwaka Beatrice xi ri: “Minkarhi yin’wana loko ndzi swi vona leswaku mhaka ya kona a yi nyawuli, naswona a yi nge vi xiphiqo mundzuku, ndzi yi tshika yi hundza ni moya.”

[Bokisi leri nga eka tluka 21]

HA YINI U NGA VUTISI VATSWARI VA WENA?

Xana a wu swi tlhantlha njhani swiphiqo leswi a wu va na swona ni vatswari va wena? Loko u languta endzhaku, xana swi kona leswi u nga navelaka ku swi cinca? Loko swi ri tano, i yini?

[Bokisi/Swifaniso leswi nga eka tluka 21]

LESWI TINTANGHA TA WENA TI SWI VULAKA

Wyndia—Ndzi ringeta ku anakanya ndzi nga si vulavula. Ndzi anakanya hi vonelo ra vatswari va mina kutani ndzi khongela ndzi nga si vula nchumu. Loko ndzi swi xiya leswaku leswi ndzi nga ta swi vula swi ta pfuxa mholovo, ndza miyela kukondza ndzi tiphofula handle ko kanetana na vona.

Ross—Loko ndzi titwa ndzi hlundzuka, ndza swi tshika leswi hi vulavulaka ha swona hikuva swi nga ndzi onhela siku ku phikizana ni vatswari va mina. Kutani ndzi xiye leswaku a ndza ha hatli ndzi hlundzuka ku fana ni loko ndza ha ri ntsongo.

Ramona—Ndzi xiye leswaku minkarhi hinkwayo i swinene ku yingisa vonelo ra vatswari va mina. Minkarhi yin’wana mavonelo ya mina ni ya vona a ma hambani ngopfu naswona ku nga twanani ka hina a ku vi mhaka leyikulu.