Swichudeni Leswi Tshikilelekeke

JENNIFER la nga ni malembe ya 17 minkarhi hinkwayo a a ri un’wana wa swichudeni leswi paselaka ehenhla. A a hlanganyela eka mintlango yin’wana leyi a yi endliwa loko xikolo xi humile naswona a a xiximiwa hi vadyondzisi na hi vatsundzuxi. Kambe loko ka ha sele lembe leswaku a heta xikolo, u sungule ku pandziwa hi nhloko swinene naswona a a tshamela ku hlamba timbilu. U vona onge nkarhi wo tala lowu a wu hetaka a ri karhi a endla mintirho ya xikolo nileswi a a nga kumi nkarhi lowu eneleke wo etlela, a swi n’wi vabyisa.

Ku ni swichudeni swo tala leswi nga ni swiphiqo swo fana ni swa Jennifer. Nhlayo ya swichudeni leswi tshikilelekeke exikolweni yi vonaka yi andza, lerova swin’wana swi kala swi ya lava mpfuno eka madokodela lama tshungulaka vuvabyi bya mianakanyo. Hikwalaho ka sweswo, ntlawa wa vadyondzisi va le Amerika va sungule nongonoko lowu pfunaka ku hunguta ntshikilelo eswikolweni. Nongonoko wolowo wu vitaniwa Ntlhontlho Wa Leswaku Swilo Swi Ku Fambela Kahle eVuton’wini.

Loko u ri xichudeni, kumbexana u ni ntshikilelo ku fana ni Jennifer. Kumbe loko u ri mutswari, u nga ha va u vona ntshikilelo lowukulu lowu n’wana wa wena a nga na wona leswaku swi n’wi fambela kahle exikolweni. Xana ku kona laha swichudeni swoleswo ni vatswari va swona va nga wu kumaka kona nkongomiso lowu tirhaka?