Phuphu Leyikulu eLwandle

◼ Xana u tshame u xi vona xihuhuri xa le lwandle? Xi tshame xi va kona hi December 25, 2005 ekusuhi ni ribuwa ra xihlala xa Tahiti. Xihuhuri xolexo lexi a xi sukela emapapeni xi ya fika evuandlalweni bya lwandle xi teke kwalomu ka 30 wa timinete. Kutani hakatsongo-tsongo xi hungutekile ivi xi nyamalala.

Minkarhi yin’wana ku vuriwa leswaku swihuhuri i swidzedze swa le lwandle, kambe hi ntolovelo a swi na matimba swinene ku fana ni swidzedze. Hakanyingi swi teka kwalomu ka khume ra timinete, hambileswi swin’wana swi tekeke awara. Leswi swihuhuri sweswo swi vaka kona elwandle, hakanyingi u swi vona ntsena hi xiwelo. Leswi swi endla leswaku swi va tikela vativi va ta maxelo ku twisisa swihuhuri sweswo hi ku helela. Hi ku ya hi swiviko swin’wana, ku vuriwa leswaku swi nga ha ba pongo lerikulu leri fanaka ni ra xitimela lexi rhwalaka nhundzu.

Loko mutsari wa khale wa tipisalema ta le Bibeleni a hlamusela ndlela leyi a a pfilunganyeke ha yona, u tsale a ku: “Xidziva xa mati xi vitana xidziva xa mati hi mpfumawulo wa maboboma . . . ya wena.” (Pisalema 42:7) Hambileswi hi nga ta ka hi nga vuli leswaku swihuhuri swa muxaka lowu hi swona leswi mutsari wa tipisalema ta le Bibeleni a a vulavula ha swona, kambe swihuhuri leswi swi yi hlamusela kahle ndlela leyi a a titwa ha yona. U vule leswaku moya-xiviri wakwe a wu ri “ni gome” naswona a a ‘tlhavekile’ endzeni ka yena. Kambe Xikwembu xa yena xi n’wi chavelerile. U byele moya-xiviri wakwe a ku: “Rindzela Xikwembu, hikuva ndza ha ta xi dzunisa leswi xi nga ku ponisiwa ka mina lokukulu ni Xikwembu xanga.”—Pisalema 42:11.

Ku fana ni mutsari wa tipisalema, na hina hi nga ha va ni swiphiqo leswi nga fanisiwaka ni xihuhuri lexi hungaka elwandle. Kambe loko hi rindzela Xikwembu, xi ta va muponisi wa hina lonkulu.