Leti Humaka Eka Vahlayi
Xiphiqo Lexikulu Xa Mati—I Yini Leswi Endliwaka Leswaku Xi Tlhantlhiwa? (January 2009) Ndzi karhatiwe hi ndlela leyi xihloko lexi xi gimeteke ha yona. Ematshan’weni yo khutaza vahlayi va n’wina leswaku va pfuna van’wana hi ku cela swihlovo, ku seketela minongonoko yo hlayisa mati kumbe ku xi kambisisa hi vuenti xiphiqo lexi, xihloko lexi xi ri: “Loyi a nga ta tlhantlha xiphiqo lexi lexikulu xa mati i Xikwembu, ku nga ri munhu” naswona xi ta “‘endla swilo hinkwaswo swi va leswintshwa.’ (Nhlavutelo 21:5)” Hambileswi lawa ku nga mahungu lama khutazaka, xana a swi nga ta antswa ku nyikela mpfuno wa sweswinyana? Emisaveni leyi ku tele swiphiqo. Hambileswi Xikwembu xi tiyimiseleke ku swi tlhantlha, a hi nge khondli mavoko loko Diyavulosi a ri karhi a endla ku rhandza.
S. S., United States
“Xalamuka!” ya hlamula: Xikongomelo xa xihloko lexi boxiweke laha henhla a ku nga ri ku vula leswaku vanhu a va na byona vutihlamuleri byo endla matshalatshala yo antswisa xiyimo xexo sweswi. Hilaha xihloko lexi xi vuleke hakona, “ Xikwembu xi nyike vanhu vutihlamuleri byo khathalela pulanete leyi.” Xisweswo, hi kandziyise swihloko swo tala eka timagazini ta hina leswi khutazaka vahlayi leswaku va teka magoza yo hlayisa swilo leswi nga emisaveni ni yo sirhelela mbango. Hambiswiritano, lexi vavisaka hileswaku matshalatshala ya vanhu yo sirhelela swilo leswi nga emisaveni hakanyingi ma siveriwa hi milawu leyi seketelaka ku kula ka ikhonomi, ematshan’weni yo tlhantlha swiphiqo swa vanhu malunghana ni mbango, ni leswi vanhu lava nga hetisekangiki va velekiweke va ri ni makwanga ni vutianakanyi. Hikwalaho, hi yona mhaka leyi hi vulaka leswaku “loyi a nga ta tlhantlha xiphiqo lexi lexikulu xa mati i Xikwembu.”
Misava—Yi Tumbuluxeriwe Leswaku Ku Hanyiwa Eka Yona (February 2009) Loko vahaxi va mahungu va tsala ntsena hi swilo leswi endlaka hi chava hikwalaho ka ku hisa ka misava, ku hlaya swihloko leswi swa nxaxamelo swi ndzi rhurise mbilu hakunene. Nakambe ndzi khutazeke ngopfu ku tiva leswaku vumundzuku bya misava leyi a byi le khombyeni kambe yi ta va paradeyisi laha vanhu va nga ta hanya hi ku rhula. Ndza mi nkhensa swinene.
M. H., Japani
Vuvabyi Byo Tsandzeka Ku Hlaya A Byi Ndzi Sivelanga Ku Fikelela Tipakani Leti A Ndzi Tivekele Tona (February 2009) Na mina ndzi ni vuvabyi byo tsandzeka ku hlaya naswona lexi vavisaka hileswaku a ndzi nga swi twisisi leswaku xiphiqo xa mina a xi ri xikulu ku fikela kwihi, kukondza mina ni nsati wa mina hi va varhumiwa kutani ndzi ringeta ku dyondza ririmi rin’wana. Xihloko lexi xi ndzi khutaze swinene, ngopfu-ngopfu bokisi leri nga eka tluka 22, leri ndzi pfuneke ku twisisa leswaku vuvabyi lebyi byi njhani. Swi ndzi khutazile ku hlaya ndlela leyi Michael Henborg a swi koteke ha yona ku dyondza tindzimi to hlayanyana. Ndza mi nkhensa swinene.
M. M., Tanzania
Vantshwa Va Vutisa . . . Ndzi Nga Endla Yini Leswaku Ndzi Tsakela Ku Hlaya Bibele? (April 2009) A ndzi voni kutani ndzi tirhisa Braille exikolweni. Ndza yi rhandza hakunene minkandziyiso ya n’wina hikuva yi ndzi pfune ku hlula swiphiqo swo tala. Hi ntolovelo ndzi yingisela tikhasete ni ti-CD ta n’wina ndzi nga si etlela. Ti endla leswaku ndzi etlela ndzi ri ni timhaka leti khutazaka emianakanyweni. Ndzi yingisele xihloko lexi minkarhi ya kwalomu ka ntlhanu naswona ndzi kume swiringanyeto swin’wana swa ndlela leyi ndzi nga sungulaka dyondzo ya mina n’wini ha yona.
S. H., Furwa