Thelevhixini
ENDZHAKUNYANA ka loko vanhu va dyondze ku haxa marito eka xiya-ni-moya, vaendli va swilo va tivutisile loko va ta swi kota ku haxa ni swifaniso leswi tshuka-tshukaka eka thelevhixini. Leswaku u twisisa ntlhontlho lowu a va langutane na wona, vona ndlela leyi thelevhixini yi tirhaka ha yona namuntlha.
Xo sungula, khamera ya TV yi vona xifaniso lexi u lavaka ku xi teka hi ndlela leyi na wena u vonaka phepha leri u lavaka ku ri hlaya ha yona. Hambiswiritano, ematshan’weni yo vona xifaniso hi ku helela, yi vona mathonsi lawa loko ma hlangana ma endlaka xifaniso. Kutani yi teka xifaniso xexo yi xi hundzula xi va vhidiyo leyi hundziseriwaka endhawini yin’wana. Muchini lowu amukelaka vhidiyo yoleyo wa yi hundzula yi tlhela yi va xifaniso lexi tshuka-tshukaka.
Ku vuriwa leswaku John Logie Baird wa le tikweni ra Scotland hi yena munhu wo sungula ku komba vanhu ndlela yo haxa swifaniso eka thelevhixini. Loko a boheke ku tshika ntirho wakwe wa ku va munjhiniyara wa gezi hikwalaho ka vuvabyi, u sungule ku dyondza ku endla muchini lowu a wu ta humesa swifaniso leswi tshuka-tshukaka, ku nga nchumu lowu a a lava ku wu endla ku sukela loko a ha ri muntshwa.
Khamera ya thelevhixini ya Baird a yi tirhisa xiphepherhele xa xirhendzevutana (eku sunguleni a a tirhisa bokisi ra xihuku) lexi a xi ri ni timbhovo ta kwalomu ka 30 leti a ti boxeteriwe ti va xirhendzevutana. Loko xiphepherhele xexo xi ri karhi xi rhendzeleka, timbhovo a ti kopa xifaniso kutani ti pfulela ku vonakala ka gezi ku nghena endzeni ka sele ya khamera. Sele yoleyo a yi amukela vhidiyo leyi a yi rhumeriwa eka muchini lowu yi yaka eka wona. Kutani muchini wolowo a wu voninga xiphepherhele xexo lexi a xi kombisa swifaniso loko xi voningiwa. Nchumu wo tika a ku ri ku endla leswaku swiphepherhele sweswo swi kombisa swifaniso. Loko Baird a ri karhi a endla ntirho wolowo, a a tihanyisa hi ku pholichela vanhu tintangu.
Hi October 2, 1925, Baird u haxe swifaniso leswi tshuka-tshukaka eka thelevhixini yo sungula ekamareni rakwe ra le lwangwini swi suka eka tlhelo lerin’wana swi ya eka lerin’wanyana. Munhu wo sungula la humeleleke eka TV a ku ri mufana la chuheke, loyi a a tirha ehofisini leyi a yi ri eka xithezi xa le hansi, loyi a hakeriweke mali yitsongo hikwalaho ka ntirho wakwe. Hi 1928, Baird u haxe swifaniso swo sungula eka thelevhixini ematikweni lama vandzamaneke ni Lwandle ra Atlantiki. Loko John Baird, wanuna wa le Scotland la nga ni tingana a fika eNew York, u nyume swinene loko a hoyozeriwe hi ntlawa wa vachayi va swichayachayana. A a dume ngopfu. Kambe, xana a ku ri yena wo sungula ku kombisa swifaniso leswi tshuka-tshukaka?