Timfanelo Leti Hi Endlaka Hi Va Vo Hlawuleka

MUAKI la nga ni malembe ya 50 a a yimele xitimela exitichini xa xona le Dorobeni ra New York. Loko a ri kwalaho, jaha rin’wana ri wele exiporweni naswona xitimela a xi ri karhi xi tshinela. Hi ku hatlisa muaki loyi u tsutsumele exiporweni a fika a ri khoma kutani havumbirhi bya vona va pavalala exikarhi ka xiporo loko xitimela xi hundza hi le henhla ka vona.

Hi nkarhi wa mfumo wa Manazi, Timbhoni ta Yehovha ta le Yuropa ti arile ku losa Hitler ti ku, “Heil Hitler” hikuva rito ra Xijarimani leri nge heil, ri vula ku “ponisiwa.” A ti swi tiva leswaku Yesu Kreste i Muponisi wa tona nileswaku “a ku na ku ponisiwa eka un’wana.” (Mintirho 4:12) Hikwalaho ko ala ku gandzela Hitler, to tala ta tona ti yisiwe etinkampeni ta nxaniso, laha ti hambeteke ti hanya hi milawu ya tona ya Vukreste.

Swikombiso leswi swi swi veka erivaleni leswaku munhu a nga swi kota ku ponisa vutomi bya munhu un’wana, hambiloko munhu wa kona a nga n’wi tivi naswona a xixima milawu leyi vekiweke ku tlula ntshunxeko wa yena n’wini. Xana leswi swi kombisa leswaku vanhu va tlakukile eka swiharhi? Xana leswi swi kombisa leswaku hi swivumbiwa swo hlawuleka eka ntumbuluko hinkwawo? Loko u ri karhi u anakanya hi mhaka leyi, tivutise swivutiso leswi landzelaka:

● Ha yini hi ri ni ripfalo leri hi pfunaka ku hambanisa leswinene ni leswo biha?

● Ha yini hi tshamela ku hlamala loko hi vona swilo leswi hlamarisaka swa ntumbuluko?

● Ha yini hi rhandza vunanga, swifaniso, swiphato ni swilo swa ntivo-vuxongi, kasi a swi nge hi pfuni leswaku hi kuma vutomi lebyi nga heriki?

● Ha yini vanhu va mindhavuko hinkwayo va navela ku va ni vuxaka lebyinene ni Xikwembu?

● Ha yini hi tivutisa hi ku: ‘Ha yini hi ri laha?’ ‘Hi xihi xikongomelo xa vutomi?’

● Loko munhu a fa, i yini lexi endlaka leswaku hi endla mikhuva ni mihivahivana yo hambana-hambana?

● Ha yini vanhu va mindhavuko hinkwayo va vula leswaku ku ni vutomi endzhaku ka rifu? Xana ku va hi velekiwe hi navela ku hanya hilaha ku nga heriki swa fambisana ni dyondzo ya ku tihundzukela ka swilo?

Laha Tinhlamulo Ti Nga Kumekaka Kona

Tinhlamulo leti enerisaka ta swivutiso sweswo ti nga kumiwa ebukwini leyi hangalasiweke ku tlula tibuku hinkwato emisaveni hinkwayo, ku nga Bibele. Xiya leswi yi swi vulaka:

Ku vumbiwa ka vanhu. Vanhu va vumbiwe hi “xifaniso xa Xikwembu,” leswi vulaka leswaku hi nga swi kota ku kombisa timfanelo ta Muvumbi wa hina. (Genesa 1:27) Kutani munhu wo sungula a a ri “n’wana wa Xikwembu.”—Luka 3:38.

Xilaveko xo rhandza ni ku rhandziwa. 1 Yohane 4:8 yi ri: “Xikwembu i rirhandzu.” Leswi hi vumbiweke hi xifaniso xa Xikwembu, hi lava ku rhandziwa ku sukela loko ha ha ri tincece kukondza hi fa. Muapostola Pawulo la nga Mukreste u tsale a ku: ‘Loko ndzi nga ri na rirhandzu, a ndzi nchumu.’ (1 Vakorinto 13:2) U tlhele a ku: “Leswi mi nga vana lava rhandzekaka, vanani vatekeleri va Xikwembu.”—Vaefesa 5:1.

Xilaveko xa hina xa moya. “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:4) Leswi tsariweke eBibeleni swi hi byela hi vumunhu bya Xikwembu ni hi xikongomelo xa xona ha hina. Hi fanele hi va ni vuxaka lebyinene ni Xikwembu leswaku vutomi bya hina byi va ni xikongomelo.

Lexi endlaka hi fa. “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki.” (Varhoma 6:23) Xidyoho xi ve kona hikwalaho ka leswi vanhu va tsandzekeke ku va ni mahanyelo lamanene ni ku namarhela milawu ya Xikwembu. Kambe xikongomelo xa Xikwembu i ku herisa xidyoho, ku vuyetela hinkwavo lava xi rhandzaka ni lava xi yingisaka kutani xi va nyika vutomi lebyi nga heriki emisaveni leyi nga Paradeyisi.—Pisalema 37:10, 11, 29; Luka 23:43.

Xana wa swi lava ku tiphina hi vutomi hilaha ku nga heriki, kumbexana u tlhela u va ni vuswikoti lebyi a wu nga lorhi leswaku u nga va na byona? Xana wa swi lava ku dyondza swo tala hi Muvumbi wa wena ni hileswi a tiyimiseleke ku ku endlela swona? Loko swi ri tano, hi ku khutaza leswaku u kambisisa Bibele, ku nga xihlovo xa ntiyiso. A xi kona lexi nga endlaka leswaku u va ni ntsako wa xiviri sweswi ni le nkarhini lowu taka.—Matewu 5:3; Yohane 17:3.

[Bokisi/Xifaniso lexi nga eka tluka 9]

HI LAVA KU RHANDZIWA KU SUKELA LOKO HA HA RI TINCECE

Gerald L. Schroeder mutivi wa sayense u ri: “Vana va lava ku khutaziwa ni ku rhandziwa.” Kutani i swa nkoka leswaku vatswari va yingisa xileriso xa Bibele lexi ngopfu-ngopfu xi kongomisiwaka eka vamanana lexi vulaka leswaku va fanele “va rhandza vana va vona.”—Tito 2:4.

[Xifaniso lexi nga eka matluka 8, 9]

Ku ni swilo swo tala leswi hi tiphinaka ha swona evuton’wini leswi nga ta ka swi nga hi pfuni leswaku hi kuma vutomi lebyi nga heriki

[Xifaniso lexi nga eka tluka 9]

Vanhu a va fanelanga va hanya hi swakudya ni mati ntsena, kambe va fanele va tlhela va kongomisiwa hi Muvumbi wa vona