Leti Humaka Eka Vahlayi

Leswi Ndzi Endleke Ndzi Tshika Ku Va Xiyimbeleri Lexi Dumeke (June 2010) A ndzi nga tikoti hi ku tsaka loko ndzi hlaya xihloko lexi. Ndzi ni malembe ya 39 naswona ndzi kurisa vana vanharhu ndzi ri ndzexe. Endhawini leyi ndzi tshamaka eka yona eRhaxiya swa tika ku kuma ntirho. Kambe xikombiso xa Martha Teresa Márquez xi ndzi susumetele ku endla swo karhi. Xihloko xexo xi vule leswaku a a endla ti-tamale ekaya ivi a ti xavisa exitarateni leswaku a kuma swo tihanyisa tanihi leswi a a ri entirhweni wa nkarhi hinkwawo. Xisweswo, ndzi landzele xikombiso xakwe kutani ndzi endla swikhekhana swa le Rhaxiya leswi vuriwaka piroshki. Rhengu rero ri tirhile! Sweswi ndyangu wa mina wu tihanyisa hi bindzu leri. Leswi swi pfuna vana va mina leswaku va dyondza mintirho ya mavoko naswona se va ya va va ni vutihlamuleri.

G. M. wa le Rhaxiya

Ndlela Yo Lwisana Ni Manghanghamela (May 2010) Ndzi ba mandla ndzi vuyelela hikwalaho ko hi tsalela rungula leri vulavulaka hi manghanghamela. Hi tirha hi matimba leswaku hi pfuna vanhu lava nga ni manghanghamela ku tiva leswaku ku ni tindlela to tala leti nga va pfunaka.

J. F. wa le United States, la nga presidente wa Nhlangano wa Vanhu va Manghanghamela

Vantshwa Va Vutisa . . . Xana Ndzi Nga Ri Hlamusela Njhani Langutelo Ra Bibele Hi Vusodoma? (December 2010) Ndzi ni malembe ya khume ndzi catile naswona ndzi ni n’wana un’we. Siku ni siku ndzi lwisana ni “mutwa enyameni.” Ndzi ni ku navela ka vusodoma. Vukati a byi swi cincanga sweswo. A ndzi nga ha ri na ntshembo hikuva a swi tikomba onge a ndzi nge ku hluli ku navela loku ndzi nga na kona. Kambe, endzhaku ko hlaya xihloko xexo, ku navela koloko ku hungutekile. Ndzi swi kotile ku fikelela pakani ya mina hi ku ka ndzi nga endli nchumu leswaku ndzi hetisisa ku navela koloko.—2 Vakorinto 12:7.

Vito ri susiwile, wa le United States

Ndzi sungule ku va ni ku navela ka vusodoma loko ndzi ri ni malembe ya ntlhanu. Sweswi ndzi ni malembe ya 61 naswona ku navela koloko ndza ha ri na kona. Ndzi tsakisiwe hi yinhla ya leswaku hambi ku ri vanhu va rimbewu leri hambaneke va fanele va balekela vumbhisa ni leyi vulaka leswaku “vanhu vo tala lava nga si nghenelaka vukati naswona va nga ni ntshembo lowutsongo swinene wo nghenela vukati swin’we ni vanhu vo tala lava tekaneke ni munhu la lamaleke loyi a nga ta ka a nga swi koti ku endla timhaka ta masangu,” va nga swi kota ku hanya va tsakile handle ko enerisa ku navela ka vona ka rimbewu. Hikwalaho, vanhu lava nga ni ku navela ka vusodoma va nga swi kota ku va ni mahanyelo lamanene loko hakunene va lava ku tsakisa Xikwembu. Kutani ndza mi nkhensa swinene hileswi mi khutazaka hina lava nga ni ku tsana loku.

Vito ri susiwile, wa le United States