Ndlela Leyi Ndzi Langutanaka Ha Yona Ni Manghanghamela

Hi ku vula ka Sven Sievers

A NDZI ri ni manghanghamela ku sukela evutsongwanini. Loko ndzi tsundzuka swa nkarhi lowu nga hundza, ndzi tlangela ndlela leyi vatswari va mina va langutaneke ni xiphiqo lexi ha yona. Loko ndzi nghanghamela, minkarhi hinkwayo a va yingiserisisa leswi ndzi lavaka ku vula swona ku nga ri ku ndzi dyondzisa ku vulavula. Hi ku ya hi vatshila va ndlela yo vulavula, vatswari lava yisaka nyingiso ngopfu eka manghanghamela ya n’wana wa vona va nga ha xi nyanyisa xiphiqo lexi.a

Mana wa mina u ve un’wana wa Timbhoni ta Yehovha loko ndzi ri ni malembe manharhu hi vukhale. Loko ndzi ri emalembeni ya kondlo-a-ndzi-dyi, ndzi kunguhate ku landzela xikombiso xa yena naswona u ndzi pfune ku endla dyondzo ya Bibele hi rixaladza. Hi July 24, 1982, ndzi khuvuriwile tanihi nandza wa Xikwembu la tinyiketeleke entsombanweni eNeumünster, le Jarimani. Endzhaku, ndzi rhurhele eAfrika Dzonga, laha ndzi yeke emahlweni ndzi hlanganyela entirhweni wo chumayela, ku nga wona lowu Vakreste hinkwavo va ntiyiso va lerisiwaka ku wu endla. (Matewu 28:19, 20) U nga ha tivutisa leswaku ndzi swi kotisa ku yini tanihi leswi ndzi nga ni manghanghamela?

Vuyelo Bya Ku Va Ni Langutelo Lerinene

Ndza pfumela leswaku minkarhi yin’wana swa ndzi tikela ku va ni langutelo lerinene, kambe ndzi xiye leswaku ku va ni langutelo lerinene swa pfuna swinene. Nchumu wa nkoka hi leswaku hi ndlela yo karhi ndza swi kota ku burisana ni vanhu. Loko ndzi nga vulavuli na vona hi nomu, ndzi vulavula na vona hi ku tsala rungula kumbe hi ku kombisa van’wana tibuku ta Bibele. Langutelo lerinene ra ndzi pfuna leswaku ndzi hlula xiphiqo xa ku tsandzeka ku sungula bulo. Ndzi ringeta ku olovisa xingheniso xa mina. Loko bulo ra ha sungula, ndzi tshika n’wini wa muti a vulavula hilaha swi nga kotekaka hakona. Vanhu va rhandza ku vulavula, kutani leswi swi ndzi nyika nkarhi wa ku tiva leswi va swi anakanyaka. Kutani ndzi ya emahlweni ndzi vulavula na vona hi swilo leswi va tsakisaka, hi ku kandziyisa rungula ra Bibele. Hi ku rhiya ndleve eka leswi va swi vulaka, swa ndzi pfuna ku rivala hi xiphiqo xa mina xa ririmi, hikwalaho a ndzi nghanghameli ngopfu.

Langutelo lerinene ra ndzi pfuna leswaku ndzi hlamula eminhlanganweni ya Vukreste. Ndzi swi xiyile leswaku loko ndzi hlanganyela ngopfu edyondzweni ya Bibele, vayingiseri ni mufambisi wa dyondzo va sungula ku ndzi tolovela ivi va yingisa leswi ndzi swi vulaka ku nga ri ndlela leyi ndzi swi vulaka ha yona.

Leswaku ndzi kuma ntsako hi ku va la humelelaka, a ndzi tshiki ku endla matshalatshala. Leswi swi ndzi sivela ku tiputa vusiwana ni ku tiendla mbuyangwana. Ku lwisana ni ku tiputa vusiwana i nyimpi ya nkarhi na nkarhi. Ku vuriwa leswaku loko munhu la gadeke hanci a wa, i swa nkoka leswaku a tlhela a yi gada leswaku a nga lahlekeriwi hi ku titshemba. Hikwalaho loko ndzi boheka ku miyela loko ndza ha ri eku nyikeleni ka nhlamulo hikwalaho ka manghanghamela, hi marito man’wana ndzi tlhela ndzi gada hanci, hi ku nyikela nhlamulo endzhaku ka ku miyelanyana koloko.

Ndlela Leyi Van’wana Va Pfunaka Ha Yona

Loko ndzi boheka ku bela van’wana riqingho kumbe ku kombela rungula ro karhi eka vanhu vambe, ndzi wu tlangela ngopfu mpfuno lowu nyikeriwaka hi ndlela ya vutlharhi. Kambe vanhu van’wana va hundzeleta swilo loko va navela ku ndzi pfuna, va ndzi khoma tanihi n’wana la tsandzekaka ku endla swiboho.

Nakambe ndzi tlangela mpfuno wa Tracy, nsati wa mina wa rirhandzu. Loko a nga si teka goza ro va “muvulavuleri” wa mina, hi burisana hi xiyimo hi ku helela leswaku a tiva leswi ndzi navelaka leswaku swi endliwa. (Ringanisa Eksoda 4:10, 14, 15.) Hi ndlela leyi u ndzi kombisa xichavo tanihi nuna wakwe, naswona u ndzi endla ndzi swi vona leswaku ndza ha swi kota ku lawula vutomi bya mina.

Kasi xin’wana lexi nga ni mpfuno lowukulu swinene i Xikolo xa Vutirheli bya le Tilweni. Eka nhlangano lowu wa vhiki na vhiki, swichudeni swa hlanganyela eku hlayeni ka Bibele ka le rivaleni ni ku nyikela tinkulumo to koma ta tinhloko-mhaka ta Bibele. Ndzi hlamarisiwe hi ku xiya leswaku hakanyingi ndza swi kota ku hlaya kahle ni ku vulavula kahle emahlweni ka vayingiseri. Loko a ndzi nga tsarisanga exikolweni, a ndzi ta va ndzi nga byi xiyanga vuswikoti lebyi.

Loko ndzi nyikele tinkulumo eXikolweni xa Vutirheli bya le Tilweni, a swi ndzi khutaza swinene loko muleteri a yise nyingiso eka leswi ndzi swi vuleke ku nga ri ndlela leyi ndzi swi vuleke ha yona. Ndzi pfuniwe ngopfu hi Buku Yo Letela Ya Xikolo Xa Vutirheli Bya Le Tilweni,b hambileswi swiyenge swin’wana swa buku leyi swi nga oloviki eka lava nga ni manghanghamela, ku tlula eka lava kotaka ku vulavula kahle. Hi xikombiso, minkarhi yin’wana, hikwalaho ka ku nghanghamela, ndza tsandzeka ku heta nkulumo ya mina hi nkarhi lowu vekiweke. Hambiswiritano, swa ndzi khutaza loko muleteri a kandziyisa tinhla leti ndzi tirheke kahle eka tona.

Malunghelo Lamakulu Ya Ntirho

Eminkarhini leyi nga hundza, ndzi ve ni lunghelo ra ku hlayela van’wana tibuku ta Vukreste leti hi ti dyondzaka eminhlanganweni ya hina. Ndzi ve ni lunghelo ra ku fambisa dyondzo loko makwerhu la fanelekaka a nga ri kona, naswona namuntlha se ndzi endla tano nkarhi na nkarhi. Hambileswi eku sunguleni a ndzi chuha, ndzi vone mpfuno wa Xikwembu loko ndzi endla swiavelo leswi.

Hambiswiritano, emalembeni yo tala malunghelo ya ku hlaya kumbe ku dyondzisa vandlha ndzi ri exitejini a ma ri matsongo. Leswi swa twala, hikuva minkarhi yin’wana a swi ndzi tekela nkarhi wo leha ku vula marito lama twisisekaka hi ku olova. Hikwalaho ndzi tirhe hi matimba eku khathaleleni ka swiavelo swin’wana. Eku sunguleni, ndzi tirhe tanihi mupfuneti eku languteleni ka mphakelo wa timagazini ta vandlha ta Xihondzo xo Rindza ni Xalamuka! Kutani, endzhaku ka loko ndzi hlawuriwe ku va nandza wa vutirheli, a ndzi khathalela mphakelo wa Tibibele swin’we ni tibuku tin’wana. Endzhaku, ndzi averiwe ku hlayisa makhadi ya nsimu lama tirhisiwaka entirhweni wa hina wa le rivaleni wa ku nyikela vumbhoni. Hi ku yisa nyingiso wa mina eka swiavelo leswi ni ku ringeta ku tirha hi matimba, swi ndzi tisele ntsako lowukulu.

Se ndzi ni malembe ya nhungu ndzi ri phayona ra nkarhi hinkwawo swin’we na Tracy. Entiyisweni Yehovha u ndzi katekisile ni le ka ntirho lowu. Kahle-kahle, minkarhi yin’wana ndza tivutisa leswaku hakunene Yehovha a nga va a tirhisa manghanghamela ya mina. Eka vanhu va ntlhanu lava ndzi veke ni lunghelo ra ku va pfuna leswaku va va Vakreste lava tinyiketeleke, vambirhi va ni manghanghamela.

Ndza ha ri tsundzuka hi ntsako swinene siku leri ndzi hlawuriweke ku va nkulu wa vandlha. Hambileswi vuswikoti bya mina byo dyondzisa exitejini byi nga nyawuriki, ndzi ringeta ku yisa nyingiso eku pfuneni ka vanhu van’wana eka swiyimo swa munhu hi xiyexe. Ku nghanghamela a ku byi kavanyeti vuswikoti bya mina byo endla ndzavisiso wa Matsalwa leswaku ndzi pfuna swirho swa vandlha leswi nga ni swiphiqo leswikulu.

Emalembeni ya ntlhanu lama hundzeke, ndzi komberiwe ko tala leswaku ndzi ya nyikela tinkulumo. Handle ko nyikela tinkulumo eXikolweni xa Vutirheli bya le Tilweni, ndza swi kota ku nyikela switiviso swo koma eka minhlangano yin’wana. Hakatsongo-tsongo, vulavulelo ra mina ri ye ri antswa. Kambe endzhakunyana xiyimo xa mina xi tlhele xi nyanya ku biha. Hi mbilu yo vava, ndzi anakanye leswaku, ‘a ndzi nge he nyikiwi tinkulumo tin’wana,’ kambe lexi ndzi hlamariseke, vito ra mina a ri ri kona eka xiyimiso xa nkarhi lowu taka! Muungameri wa vandlha ra ka hina u vule leswaku loko ndzi nga ha swi koti ku ya emahlweni ndzi vulavula, ndzi fanele ndzi n’wi languta ntsena u ta ta exitejini ivi a ya emahlweni ni nkulumo. Mpfuno lowu wa rirhandzu ndzi wu tirhise kan’we kumbe kambirhi, kambe a ndzi kalanga ndzi boheka ku endla tano eka tin’hweti ta sweswinyana. Tanihi leswi ku vulavula ka mina ku antsweke, ndzi averiwe tinkulumo to leha, ku katsa ni tinkulumo ta le rivaleni. Nhluvuko lowu ndzi wu endleke ndzi wu xiye sweswinyana loko ndzi komberiwe ku hlanganyela eka minkombiso mimbirhi enhlengeletanweni ya xifundzha ya Timbhoni ta Yehovha.

Kahle-kahle, a ndzi swi twisisi hi ku helela leswaku ha yini ku vulavula ka mina ku antswile. Nakambe ku nga ha tlhela ku nyanya ku biha enkarhini lowu taka. Entiyisweni, hambileswi swi tikombaka onge ndzi endle nhluvuko lowukulu wa ku nyikela tinkulumo exitejini, manghanghamela ya mina ma tlhela ma nyanya ku biha loko ndzi vulavula ni vanhu. Hikwalaho leyi a hi mhaka yo kombisa leswaku ndzi humelerile eku hluleni ka manghanghamela. Loko ma ndzi karhata ndzi ringeta ku titsundzuxa ku amukela xiphiqo xa mina “ni ku famba hi ku tiṭongahata e mahlweni ka Šikwembu.”—Mikiya 6:8.

Ku nga khathariseki leswaku ku ta humelela yini enkarhini lowu taka, ndzi ta hambeta ndzi endla matshalatshala, hikuva ndza swi tiva leswaku emisaveni leyintshwa ya Xikwembu leyi tshineleke, manghanghamela ma ta herisiwa hi ku helela. Bibele yi ri: “Ririmi ra lava nghanghamelaka, ri ta hatlisa ku vulavula leswi twalaka.” Ndza tshemba leswaku leswi swi ta va tano hi xiviri swin’we ni hi tlhelo ra moya ni leswaku “ririmi ra mbev̌ev̌e ri ta yimbelela hi ku ṭaka.”—Esaya 32:4, NW; 35:6.

[Tinhlamuselo ta le hansi]

[Xifaniso lexi nga eka tluka 18]

Ndzi ri na Tracy, nsati wa mina