Xana Wu Lo Endliwa?

Nxakwa Wa Ndlopfu

● Valavisisi va le ku endleni ka voko leri nga ta tirha ku fana ni muchini, leri nga ta va ni vuswikoti naswona ri tirha hi ku olova. Murhangeri wa khampani leyi endlaka michini u vula leswaku voko rero ri ta “tlula michini hinkwayo leyi nga kona.” I yini lexi va susumeteleke? Murhangeri yoloye u ri: “I ndlela leyi nxakwa wa ndlopfu wu tirhaka ha yona.”

Xiya: Nxakwa wu tika tikhilogiramu ta kwalomu ka 140 naswona wu vuriwa “nchumu lowu tirhaka hi ndlela yo olova emisaveni hinkwayo.” Wu tirha tanihi nhompfu, xo nwa ha xona mati, voko kumbe xandla. Ndlopfu yi hefemula ha wona, yi nun’hwetela, yi nwa, yi khoma naswona yi tirhisa wona ku bokoloka!

Kambe a swi heleli kwalaho. Nxakwa wu ni misiha ya kwalomu ka 40 000 leyi wu pfunaka leswaku wu ya eka matlhelo hinkwawo. Hi ku tirhisa nxakwa wa yona, ndlopfu yi nga swi kota ku khoma mali ya nsimbi leyitsongo. Hi hala tlhelo, wu nga rhwala swilo leswi tikaka tikhilogiramu ta 270!

Valavisisi va tshemba leswaku loko vo tekelela ndlela leyi nxakwa wa ndlopfu wu nga endliwa ha yona ni leswi wu kotaka ku swi endla, sweswo swi nga va pfuna ku endla michini ya xiyimo xa le henhla leyi nga ta tirhisiwa emakaya ni le tikhampanini. Mutirhi un’wana wa le ka khampani leyi boxiweke laha henhla u ri: “Hi endle muchini lowuntshwa lowu nga ta tirha hi ndlela leyi hambaneke swinene ni michini leyin’wana naswona ku ta va ro sungula ku endliwa muchini lowu nga ta kota ku tirhisana ni vanhu handle ko vanga khombo.”

U anakanya yini? Xana nxakwa wa ndlopfu wu lo tiendlekela kumbe wu lo endliwa?