Langutelo Ra Bibele

Xana U Fanele U Ya eTempeleni, eNdhawini Yo Kwetsima Kumbe eKerekeni Leswaku U Ya Khongela Eka Xikwembu?

HAKANYINGI vanhu vo tala va ya emiakweni yo karhi ya vukhongeri leswaku va ya khongela eka Xikwembu. Van’wana va famba maendzo yo leha loko va ya emiakweni yo tano. Xana u ehleketa leswaku u fanele u ya etempeleni, endhawini yo kwetsima kumbe ekerekeni leswaku u ya khongela eka Xikwembu? Kumbe, xana u ehleketa leswaku u nga khongela eka xona nkarhi wun’wana ni wun’wana kumbe endhawini yin’wana ni yin’wana? Xana Bibele yi ri yini hi mhaka leyi?

Loko vanhu vo sungula va tumbuluxiwa, miako ya vukhongeri a yi nga ri kona. Vatswari va hina vo sungula a va tshama entangeni wo saseka. (Genesa 2:8) Kwalaho a va kota ku vulavurisana ni Muvumbi wa vona, Yehovha Xikwembu. Endzhaku ka nkarhi loko vanhu se va andzile emisaveni, vavanuna vo lulama vo tanihi Nowa, va “[fambe] ni Xikwembu xa ntiyiso” handle ko tirhisa miako ya vukhongeri. (Genesa 6:9) Hambiswiritano, Yehovha u va amukerile hikuva a va n’wi rhandza naswona a va khongela eka yena.

Xikwembu A Xi Tshami eMiakweni Leyi Akiweke Hi Vanhu

Vavanuna va khale vo tshembeka a va swi tiva leswaku Muvumbi wa misava ni vuako hinkwabyo a nga tshami emiakweni leyi akiweke hi vanhu. Hosi yo tlhariha Solomoni u vutise a ku: “Xana entiyisweni Xikwembu xi nga tshama ni vanhu emisaveni?” U tlhele a tihlamula a ku: “Waswivo! Tilo, ina, tilo ra matilo a ri nge ku ringani.” (2 Tikronika 6:18) I ntiyiso leswaku Vaisrayele va khale a va ri ni tabernakela naswona endzhaku ka nkarhi va ve ni tempele leyi a va hlangana eka yona lembe ni lembe leswaku va tlangela minkhuvo ya vukhongeri hilaha Nawu wa Xikwembu a wu vula hakona. (Eksoda 23:14-17) Kambe a va khongela eka Xikwembu nkarhi wun’wana ni wun’wana—loko va ri eku riseni ka mintlhambi ya vona, loko va ri eku tirheni emasin’wini ya vona, loko va ri eku tihungaseni tanihi ndyangu kumbe loko va ri voxe.—Pisalema 65:2; Matewu 6:6.

Hilaha ku fanaka, hi nga khongela eka Xikwembu kun’wana ni kun’wana hi nkarhi wun’wana ni wun’wana. Yesu Kreste loyi a nga xikombiso xa hina, hakanyingi a a ya etindhawini leti nga riki na pongo leswaku a ya khongela. (Marka 1:35) Hi xikombiso, siku rin’wana “[u ye] entshaveni ku ya khongela, kutani a hambeta a khongela Xikwembu vusiku hinkwabyo.”—Luka 6:12.

I ntiyiso leswaku tanihi leswi Yesu a a ri Muyuda, u ye eminkhubyeni ya vukhongeri etempeleni le Yerusalema. (Yohane 2:13, 14) Hambiswiritano, u profete leswaku a ku ta fika nkarhi lowu tempele a yi nga ha ta tirhisiwa tanihi ntsindza wa vugandzeri bya ntiyiso. Loko Yesu a vulavula ni wansati wa Musamariya ekusuhi ni ntshava ya Samariya, laha tempele ya Vasamariya a yi akiwe kona, u te: “Nkarhi wa ta lowu n’wina mi nga ta ka mi nga gandzeli Tatana entshaveni leyi kumbe eYerusalema.” U tlhele a vula leswaku vagandzeri va ntiyiso va ta “gandzela Tatana hi moya ni ntiyiso.”—Yohane 4:21, 23.

Xisweswo, Yesu a a nga ri na mhaka ni miako leyi akiweke hi switina ni semendhe kambe a a ri ni mhaka ni vugandzeri bya ntiyiso lebyi a byi huma embilwini leyi rhandzaka Xikwembu. Kambe, xana sweswo a swi vula leswaku valandzeri va Yesu lava hi ku famba ka nkarhi va vuriweke Vakreste, a va nga ta xi gandzela Xikwembu emiakweni ya vukhongeri nikatsongo? (Mintirho 11:26) A swi tano naswona ku ni swivangelo leswi twalaka swo vula tano.

Vanhu Va Xikwembu I Ndyangu Wa Moya

Malandza ya Xikwembu ya ntiyiso i ndyangu wa moya. (Luka 8:21) Ndyangu lowu nga ni vun’we wu endla swilo swo tala swin’we, swo tanihi ku dya swin’we naswona sweswo swi tiyisa vun’we bya wona. Swi tano ni hi ndyangu wa moya. Minhlangano ya Vukreste yi fana ni nkhuvo wa moya hikuva eka yona malandza ya Xikwembu ma dya swakudya leswi enerisaka timbilu ta wona ni ku tiyisa vuxaka bya wona bya moya. Muapostola Pawulo u tsale a ku: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana.”—Vaheveru 10:24, 25.

Hikokwalaho, vagandzeri va ntiyiso va swi xiya leswaku vandlha i ra nkoka hikuva ri endla leswaku xirho ha xin’we xi hlakulela timfanelo ta Vukreste leti a xi nga ta kota ku ti hlakulela hi ku helela loko a xi gandzela Xikwembu xi ri xoxe. Timfanelo teto ti katsa rirhandzu, ku rivalela, musa, ku olova ni ku rhula.—2 Vakorinto 2:7; Vagalatiya 5:19-23.

Hi kwihi laha Vakreste vo sungula a va hlengeletana kona leswaku va khutazana ni ku gandzela Xikwembu? Hakanyingi a va hlangana emakaya ya Vakreste-kulobye. (Varhoma 16:5; Vakolosa 4:15) Hi xikombiso, loko muapostola Pawulo a tsalela Mukreste-kulobye papila, u vulavule ni hi ‘vandlha leri nga endlwini ya yena.’a—Filemoni 1, 2.

Ninamuntlha, vanhu va Xikwembu a va lavi miako ya vukhongeri leyi khavisiweke ku tlula mpimo, kambe va lava tindhawu leti nga exiyin’weni lexinene leti nga kotaka ku rhurhela hinkwavo lava teke eminhlanganweni ya Vukreste. Timbhoni ta Yehovha ti ni miako yo tano, leyi ti yi vitanaka Tiholo ta Mfumo. Entiyisweni, swi nga ha endleka leswaku endhawini ya ka n’wina yi kona Holo ya Mfumo. Miako yoleyo a yi khavisiwanga ku tlula mpimo, a hi swimbindzimbindzi naswona minhlangano leyi khomeriwaka eka yona a yi rharhangananga—yi katsa risimu, xikhongelo ni tinkulumo leti sekeriweke eBibeleni.

Timbhoni ta Yehovha ta swi tsakela ku vulavula ni Xikwembu ti ri toxe. Hi yona mhaka leyi siku ni siku ti khongelaka eka xona ti ri toxe niloko ti hlanganile tanihi ndyangu. Yakobo 4:8 yi ri: “Tshinelani eka Xikwembu, kutani xi ta tshinela eka n’wina.”

[Nhlamuselo ya le hansi]

XANA U TSHAME U TIVUTISA?

● Xana Xikwembu xi tshama emiakweni leyi akiweke hi vanhu?—2 Tikronika 6:18.

● Hi kwihi laha Yesu a heteke vusiku hinkwabyo a ri karhi a khongela?—Luka 6:12.

● Ha yini vagandzeri va ntiyiso va hlengeletana swin’we?—Vaheveru 10:24, 25.

[Marito lama tshahiweke exihlokweni lama nga eka tluka 15]

Xana swikhongelo swa wena swi ta twiwa ngopfu loko u khongela u ri etindhawini to karhi?