NDLELA YO HLULA XITIRESE
Hi Nga Swi Kota Ku Hanya Hi Nga Ri Na Xitirese
Vutlhari byale Bibeleni byi nga hi pfuna leswaku hi papalata xitirese lexi nga bohiki. Hambiswiritano, a hi nge swi koti ku herisa swilo hinkwaswo leswi hi vangelaka xitirese. Kambe muvumbi wa hina a nga swi kota. Hikuva u rhumele un’wana leswaku a ta hi pfuna. Munhu yoloye i Yesu Kreste. Ku nga ri khale, emisaveni hinkwayo u ta endla swilo swo saseka ku tlula leswi a swi endleke loko a ha ri laha misaveni. Hi xikombiso:
YESU U TA HORISA LAVA VABYAKA HILAHA A ENDLEKE HA KONA.
“Va n’wi tisela hinkwavo lava nga pfukangiki kahle, lava karhatiwaka hi swifo swo hambana-hambana, a va hanyisa.”—MATEWU 4:24.
YESU U TA ENDLA LESWAKU VANHU HINKWAVO VA VA NI TINDLU NI SWAKUDYA.
“[Lava nga ta fumiwa hi Yesu] va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana.”—ESAYA 65:21, 22.
MFUMO WA YESU WU TA ENDLA LESWAKU KU VA NI KU RHULA NI NSIRHELELO.
“Emasikwini ya yona lowo lulama u ta hluka, ni ku rhula ku ta andza ku fikela n’weti wu nga ha vi kona. Yi ta fuma ku suka elwandle rin’wana ku ya elwandle rin’wanyana ku suka eNambyeni ku ya emakumu ka misava. . . . Valala va yona va ta nantswa ritshuri.”—PISALEMA 72:7-9.
YESU U TA HERISA VUHOMBOLOKI.
“Yi ta va ni nsovo eka loyi a pfumalaka ni loyi a nga xisiwana, Yi ta ponisa moya-xiviri wa swisiwana. Yi ta kutsula moya-xiviri wa vona eku tshikileriweni ni le madzolongeni.”—PISALEMA 72:13, 14.
YESU U TA TLHELA A HERISA KU XANISEKA NI RIFU.
“Rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—NHLAVUTELO 21:4.