MISAVA LEYI TALEKE HI MAXANGU

4 | Sirhelelaka Ntshembo Wa Wena

LESWI ENDLAKA SWI VA SWA NKOKA

Loko vanhu va vilela ngopfu hi maxangu ya misava leyi, swi nga va tshikilela. Vo tala lava tshikileriwaka hi maxangu ya misava leyi a va ha ri na ntshembo wa leswaku swilo swi ta cinca. Xana va endla yini hikwalaho ka sweswo?

Van’wana a va lavi na ku ehleketa hi vumundzuku.
Van’wana va kukutlela byala ni ku tirhisa swidzidzirisi leswaku va balekela swiphiqo swa vona.
Kasi van’wana va vona swi antswa ku fa, ku ri ni ku hanya. Va tivutisa va ku: “Ndzi hanyela yini.”

Leswi U Faneleke U Swi Tiva

Swiphiqo swin’wana leswi u langutanaka na swona swi nga ha va swi ri swa xinkarhana naswona ku ta fika nkarhi swi kuma ndzhuti swi yima.
Hambiloko xiyimo xa wena xi nga cinci hi ku helela, ku ni swin’wana leswi nga ku pfunaka leswaku u tiyisela.
Bibele yi nyika vanhu ntshembo wa ndlela leyi swiphiqo hinkwaswo swi nga ta lulamisiwa hayona.

Leswi U Faneleke U Swi Endla Sweswi

Bibele yi ri: “Mi nga tshuki mi vilela hi siku leri landzelaka hikuva siku leri landzelaka ri ta va ni mivilelo ya rona. Siku rin’wana ni rin’wana ri ni swiphiqo swa rona leswi swi ri ringaneke.”—Matewu 6:34.

Tiphine hi siku ra namuntlha. U nga vileli ngopfu hi vumundzuku lerova u tsandzeka ni ku tiphina hi siku ra namuntlha.

Ku vilerisiwa hi swilo leswi nga tsakisiki leswi nga si endlekaka, swi to ku vangela gome ni ku heleriwa hi ntshembo wo va ni vumundzuku lebyinene.

NDLELA LEYI U NGA SWI ENDLAKA HAYONA—Switsundzuxo Leswi Nga Ku Pfunaka

EHLEKETA NTSENA HI SWILO LESWINENE

Bibele yi ri: “Masiku hinkwawo ya munhu la xanisekaka a ma tsakisi, kambe la nga ni mbilu leyi tsakeke u tshama a ri ni nkhuvo.” (Swivuriso 15:15) Loko u ehleketa ngopfu hi xiphiqo lexi u nga na xona, u nga ha tsandzeka ku vona tindlela leti nga ku pfunaka ku xi tlhantlha. Kambe loko u ehleketa ntsena hi leswinene, swi ta ku pfuna leswaku u kuma tindlela to tlhantlha xiphiqo xa wena.

Hunguta nkarhi lowu u wu hetaka eka mahungu.
Eku heleni ka siku, xaxameta swilo swimbirhi kumbe swinharhu leswi u nga khensaka hikwalaho ka swona.
Swi tsale ehansi swilo leswi u lavaka ku swi endla hi siku. Hunguta mitirho yo tika hakatsongotsongo leswaku u ta vona mbuyelo wa ku tikarhata ka wena eku heleni ka siku.

KUMA NSEKETELO

Bibele yi ri: “Loyi a tihambanisaka ni van’wana . . . u bakanya vutlhari hinkwabyo.” (Swivuriso 18:1) U nge swi koti ku huma hi wexe eka khele ro enta kambe hi mpfuno wa van’wana u nga swi kota.

Kombela vandyangu ni vanghana va wena leswaku va ku seketela.
Nakambe lava tindlela leti u nga va pfunaka hatona. Ku endlela van’wana swilo leswinene, swi ta ku pfuna leswaku u kota ku tiyisela swiphiqo swa wena.
Loko u nga ha ri na ntshembo naswona u vona onge ku hanya a swi pfuni nchumu, anakanyisisa hi ku ya eka dokodela. Mikarhi yin’wana loko u titwa u tshamela ku tshikileriwa swi nga ha kombisa leswaku u na xiphiqo xa rihanyo, xo tanihi ntshikilelo wa miehleketo. Vanhu vo tala va pfuniwe hi ku kuma vutshunguri.a

a Xalamuka! leyi a yi ndhundhuzeli vutshunguri byo karhi bya swa rihanyo.

Bibele Yi Hi Nyika Ntshembo Wa Xiviri

Mupisalema wa le nkarhini wa ku tsariwa ka Bibele, u khongele eka Xikwembu a ku: “Rito ra wena i rivoni enengeni wa mina, ni ku vonakala endleleni ya mina.” (Pisalema 119:105) Xiya tindlela leti Rito ra Xikwembu ku nga Bibele, yi nga rivoni ha tona.

Loko nivusiku ku ri ni xinyami, rivoni ri hi voningela laha hi nga fambaka kona. Hilaha ku fanaka, Bibele yi fuwile hi vutlhari lebyi nga hi pfunaka loko hi lava ku teka xiboho lexi nga ha vonakaka xi tika.

Rivoni ri nga hi voningela ndlela leswaku hi kota ku vona leswi nga emahlweni ka hina. Hilaha ku fanaka, Bibele yi hi komba ndlela ya leswaku vumundzuku byi hi khomele yini.

Bibele i buku yo hlawuleka leyi nga vulavuriki hi matimu ya vanhu ntsena kambe yi tlhela yi hi nyika ntshembo wa xiviri hi vumundzuku. Yi hlamula swivutiso leswi:

Njhani?

Ndlela leyi ku xaniseka ku sunguleke hayona: Bibele yi vula leswaku “leswi xidyoho xi ngheneke emisaveni hi munhu un’we, ni rifu ri ngheneke hikwalaho ka xidyoho, kutani rifu ri tlulele vanhu hinkwavo hikuva hinkwavo va dyohile.”—Varhoma 5:12.

Hikwalahokayini?

Leswi endlaka mifumo ya vanhu yi nga swi koti ku lulamisa swiphiqo swa hina: Bibele yi vula leswaku “munhu la fambaka a nga ka a nga ma kongomisi magoza yakwe.” (Yeremiya 10:23) Leswi endlekaka namuntlha laha misaveni swi tiyisekisa marito lawa.

Yini?

Ndlela leyi Xikwembu xi nga ta lulamisa xiyimo hayona: Bibele yi vula leswaku Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona.”—Nhlavutelo 21:4.