Xana Ku Kombisa Van’wana Xichavo Swi Helele Kwihi?

LESWI ENDLAKA KU KOMBISA VAN’WANA XICHAVO SWI RI SWA NKOKA

Loko hi kombisa van’wana xichavo hi hunguta timholovo naswona a hi nyanyisi xiyimo.

Xivuriso xa Bibele xi ri: “Nhlamulo leyinene yi tlherisa vukarhi, kambe rito leri tlhavaka ri vanga ku hlundzuka.” (Swivuriso 15:1) Swiendlo ni mavulavulelo lama kombisaka ku delela swi nyanyisa xiyimo naswona mikarhi yo tala swi ni vuyelo lebyi nga tsakisiki.
Yesu u te: “Nomu wu vulavula leswi mbilu yi taleke swona.” (Matewu 12:34) Mavulavulelo lama nga kombisiki xichavo ma nga kombisa ndlela leyi hi titwaka hayona hi rixaka, ndhavuko kumbe ndlela leyi munhu a kurisiweke hayona leyi hambaneke ni leyi hina hi kurisiweke hayona.

Hi ku ya hi ndzavisiso wa sweswinyana lowu endliweke eka vanhu vo tlula 32 000 ematikweni ya 28, vanhu lava ringanaka 65 wa tiphesente va vule leswaku ku pfumelaka ka xichavo namuntlha swi nyanye no tlurisa.

LESWI U NGA SWI ENDLAKA

Kombisa vanhu hinkwavo xichavo, exikolweni kumbe entirhweni hambiloko mi ri ni mavonelo lama hambaneke. Kuma swilo leswi mi pfumelelanaka eka swona. Sweswo swi ta ku pfuna leswaku u nga va xopaxopi kumbe ku va avanyisa.

“Tshikani ku avanyisa van’wana leswaku mi nga avanyisiwi.”—Matewu 7:1.

Khoma van’wana hi ndlela leyi u lavaka ku khomiwa hayona. Loko u khoma van’wana hi musa ni ku tlhela u va anakanyela, na vona va ta ku khoma hi ndlela leyi fanaka.

“Leswi mi lavaka van’wana va mi endlela swona na n’wina va endleleni swona.”—Luka 6:31.

Vana la rivalelaka. Papalata ku xopaxopa van’wana, hi ku swi ba hi makatla swiendlo swa vona leswi hoxeke ni marito ya vona lama nga riki manene.

“Ku twisisa ka munhu ku vohlisa ku hlundzuka kakwe, naswona swi sasekile eka yena loko a bakanya xihoxo.”—Swivuriso 19:11.

Endzeni ka Holo Ya Mfumo Ya Timbhoni Ta Yehovha tinhlengeletano ta vandlha ti nga si sungula. Vanhu lava nga ni malembe yo hambanahambana naswona va humaka eka mindhavuko yo hambanahambana va ri karhi va xewetana.

LESWI TIMBHONI TA YEHOVHA TI SWI ENDLAKA

Timbhoni Ta Yehovha ti kondletela xichavo laha ti tshamaka kona ni le mintirhweni.

Hi dyondzisa vanhu hinkwavo Bibele mahala kambe a hi sindzisi munhu leswaku a pfumela eka leswi hi pfumelaka eka swona. Ematshan’wini ya sweswo, hi landzela xitsundzuxo xa le Bibeleni hikuva hi chumayela “hi moya wo rhula ni hi xichavo lexi enteke.”—1 Petro 3:15; 2 Timotiya 2:24.

A hina xona xihlawuhlawu naswona hi amukela vanhu hinkwavo lava lavaka ku dyondza Bibele etinhlengeletan’wini ta hina, swi nga ri na mhaka leswaku va huma eka mindhavuko yihi. Hi tikarhatela ku ‘xixima vanhu va mixaka hinkwayo.’—1 Petro 2:17, Bibele Mahungu Lamanene.

Hi xixima vulawuri bya mfumo lowu hi fumaka laha hi tshamaka kona. (Varhoma 13:1) Hi yingisa nawu ni ku hakela swibalo. Naswona hambiloko hi nga katseki eka swa tipolitiki, hi xixima malunghelo ya van’wana yo ti endlela swiboho etimhakeni ta tipolitiki.