KU LANGUTANA NI KU TLAKUKA KA MINXAVO

Eneriseka

Vanhu lava enerisekaka va tiphina hi vutomi. Loko swiyimo swa vona swi cinca, va fambisana na swona leswaku va hanya hi leswi va nga na swona.

HIKWALAHOKAYINI SWI RI SWA NKOKA KU ENERISEKA?

Jessica Koehler mutivi wa swa mianakanyo, u xiye leswaku vanhu lava enerisekaka va va ni langutelo lerinene hi vutomi. Nakambe u vule leswaku a va va vondzoki vanhu van’wana. Hikwalaho, a swi hlamarisi leswi vanhu lava enerisekaka va tshamaka va tsakile ni ku nga tshikileleki ngopfu. Entiyisweni, vanhu lava tsakeke a va na swilo swo tala. Mhaka leyi i ntiyiso, ngopfungopfu eka vanhu lava rhangisaka swilo leswi mali yi nga taka yi nga swi xavi, swo kota ntsako lowu tisiwaka hi ku heta nkarhi ni ndyangu ni vanghana.

“Loko hi ri ni swakudya ni swiambalo hi ta eneriseka hi swilo leswi.”—1 Timotiya 6:8.

LESWI U NGA SWI ENDLAKA

Papalata ku tiringanisa ni van’wana. Loko u ringanisa swilo leswitsongo leswi u nga na swona ni swilo swo tala leswi munhu un’wana a nga ha vaka na swona, swi nga endla u nga eneriseki hambi ku ri ku n’wi vondzoka. Nilokoswiritano, ku tiringanisa koloko a hi kunene. Kahlekahle, van’wana lava nga ni swilo swo tala swi nga ha endleka va nghene hi nhloko eswikweletini. Nicole wa le Senegal u ri: “A swi lavi ndzi va ni swilo swo tala leswaku ndzi tsaka. Loko ndzi eneriseka, ndzi nga tsaka hambiloko van’wana va ri ni swilo swo tala ku ndzi tlula.”

Ringeta leswi: Papalata swinavetiso kumbe swilo leswi hoxiwaka eka social media leswi kombisaka rifuwo kumbe swilo swo tala leswi van’wana va nga na swona.

“Hambiloko munhu a ri ni swilo swo tala, vutomi byakwe a byi humi eka swona.”—Luka 12:15.

Vana la khensaka. Hakanyingi vanhu lava khensaka va va lava enerisekaka naswona a va titwi va lava kumbe va faneriwa hi swilo swo karhi. Roberton wa le Haiti u ri: “Ndzi tinyika nkarhi wo ehleketa hi swiendlo swa musa leswi van’wana va ndzi kombeke swona mina ni ndyangu wa mina. Kutani, ndzi byela vanhu volavo ndlela leyi ndzi va khensaka hayona eka leswi va ndzi endleleke swona. Nakambe ndzi dyondzisa xifanyetana xa mina xa malembe ya nhungu leswaku xi khensa eka hinkwaswo leswi xi nyikiwaka swona.”

Ringeta leswi: Vana ni dayari leyi u tsalaka “leswi u swi khensaka.” Siku ni siku tsala nchumu lowu u wu khensaka. Ku nga ha va rihanyo lerinene, ndyangu lowu tsakeke, vanghana lavanene kumbe ku pela ka dyambu loku sasekeke.

“La nga ni mbilu leyi tsakeke u tshama a ri ni nkhuvo.”—Swivuriso 15:15.

Mikarhi yo tala, hinkwerhu swa hi tikela ku eneriseka hi leswi hi nga na swona. Kambe matshalatshala ya hina a hi nyuku wa mbyana. Loko hi hlawula ku eneriseka hi ta tsaka, ku nga vumunhu lebyi mali yi nga taka yi nga swi koti ku byi xava.