Xana Misava Leyi Yi Ta Helela Kwihi?

Swiphiqo leswikulu ni swiendlakalo leswi tsemaka nhlana i tshamelo maxelo emisaveni hinkwayo! Xana swi hi byela yini?

KU SIRHELELEKA KA WENA N’WINI: Ku bulukisiwa tibomo etindhawini ta mabindzu. Vadyondzisi ni swichudeni va duvuriwa exikolweni. Tincece ta tlhakisiwa loko vatswari va nga langutanga. Vavasati ni vakhalabye va hlaseriwa va tekeriwa ni swilo swa vona dyambu ri lo hosi!

ETIKEREKENI: Tikereke ti seketela mintlawa yo karhi loko yi lwa. Vafundhisi va hehliwa hi ku hlanganyela eku yayarheriweni ka rixaka. Vaprista va pfinya vana; kambe kereke yi tshama hi swona. Vanhu a va ha yi etikerekeni; kutani tikereke ta xavisiwa.

MBANGO: Mirhi ya tsemeleriwa ivi ku akiwa tindhawu ta mabindzu. Emakhwatini ku sala ku nga ha ri na mirhi hikwalaho ka leswi swisiwana swi rhotelaka tihunyi. Mati ya le swihlobyeni ma thyakisiwa, naswona a ma nweki. Thyaka leri cukumeteriwaka elwandle ni maphaselo man’wana ya tinhlampfi ya manguva lawa ma dlayetela tinhlampfi to tala. Moya a wu hefemuleki hi leswi wu thyakisiweke.

SWO TIHANYISA: Ku vikiwe leswaku eDzonga wa Sahara laha Afrika muholo wa munhu un’we wu kwalomu ka R3 070 hi lembe. Makwanga ya vakongomisi va ta mabindzu ma vanga ku wa ka mabindzu, kutani magidi ya vanhu ma sala ma nga ha ri na mintirho. Vukanganyisi byi endla leswaku vanhu va lahlekeriwa hi mali leyi va tihlengeleteleke yona vutomi bya vona hinkwabyo.

KU PFUMALEKA KA SWAKUDYA: Vanhu va kwalomu ka 800 000 000 emisaveni hinkwayo va tala ku etlela va nga dyanga.

NYIMPI: Yi dlaye vanhu vo tlula 100 000 000 eka lembe-xidzana ra vu-20. Ku ni matlhari yo tala ya nyutliya lama nga dlayetelaka vanhu ko tala! Ku ni tinyimpi ta xin’wana-manana. Kasi vutherorisi byi le kusuhi ni ku hlasela misava hinkwayo.

MINTUNGU NI MAVABYI MAN’WANA: Ku sukela hi 1918 chachalaza ya le Spain yi dlaye vanhu va 21 000 000. Sweswi AIDS i “ntungu lowu hetaka vanhu ematin’wini.” Vuvabyi bya khensa ni bya mbilu byi dyisa vanhu mbitsi.

Loko u hlalele mahungu u nga anakanyi hi nchumu wun’we ntsena lowu u wu vonaka. Xana xo va xiendlakalo xa nkarhi wolowo ntsena? Kumbe xana xi yelana ni swin’wana leswi endlekaka emisaveni hinkwayo leswi vulaka mhaka yo karhi ya nkoka?

[Bokisi/Xifaniso lexi nga eka tluka 5]

Xana Hakunene Xikwembu Xa Khathala Hi Hina?

Loko vanhu va kayakayisiwa hi swiendlakalo leswi tsemaka nhlana kumbe va feriwa, vo tala va tivutisa leswaku ha yini Xikwembu xi nga ngheneleli xi sivela swilo swo tano.

Xikwembu xa khathala. Xa va pfuna vanhu xi tlhela xi va nyika nkongomiso lowu tiyeke sweswi. (Matewu 11:28-30; 2 Timotiya 3:16, 17) Xi endle lunghiselelo ro herisa madzolonga, mavabyi ni rifu hilaha ku nga heriki. Malunghiselelo ya xona ma kombisa leswaku xa khathala hi vanhu va matiko hinkwawo, va tinxaka hinkwato ni va tindzimi hinkwato.—Mintirho 10:34, 35.

Xana hina hi khathala ku fikela kwihi hi Xikwembu? Xana wa n’wi tiva Mutumbuluxi wa matilo ni misava? I mani vito ra yena? Hi xihi xikongomelo xa yena? Swivutiso leswi u swi hlamula hi yexe eBibeleni. Eka yona u hi byela magoza lawa a ma tekaka leswaku a herisa madzolonga, mavabyi ni rifu. I yini lexi hi faneleke hi xi endla leswaku hi ta vuyeriwa? Hi fanele hi dyondza ha yena ni hi xikongomelo xakwe. Phela hi ta kota ku vuyeriwa hi malunghiselelo lawa a hi endleleke wona loko hi kombisa ripfumelo eka yena. (Yohane 3:16; Vaheveru 11:6) Nakambe i swa nkoka ku yingisa milawu ya yena. (1 Yohane 5:3) Xana wena wa khathala hakunene hi yena lerova u navela ku n’wi yingisa?

Leswaku hi twisisa xivangelo xa leswaku ha yini Xikwembu xi pfumelele swiyimo leswi nga kona sweswi, hi fanele hi twisisa mhaka yin’wana ya nkoka swinene. Bibele ya yi hlamusela. Mhaka ya kona yi hlamuseriwe eka tluka 15 ra broxara leyi.