Yesu I Mani?

Yesu i wun’wana wa vanhu lava dumeke swinene ematin’wini. Kambe vanhu vo tala vo ti tivela vito ra yena ntsena, a va tivi swo tala hi yena naswona va ni mavonelo yo hambanahambana hi yena. Bibele yi vula yini hi yena?

1. Yesu i mani?

Yesu i ntsumi ya matimba leyi tshamaka etilweni. Yehovha Xikwembu u rhange a tumbuluxa yena a nga si tumbuluxa swilo leswin’wana hinkwaswo. Hikwalaho ka sweswo, u vitaniwa “mativula ya ntumbuluko hinkwawo.” (Vakolosa 1:15) Bibele yi vula leswaku Yesu i “N’wana wa [Xikwembu] loyi a tswariweke a ri swakwe” hikuva hi yena ntsena loyi a vumbiweke hi Yehovha hi ku kongoma. (Yohane 3:16) Yesu u tirhe ni Tata wakwe Yehovha, a N’wi pfuna ku vumba swilo leswin’wana hinkwaswo. (Hlaya Swivuriso 8:30.) Yesu wa ha tiphina hi ku va munghana lonkulu wa Yehovha. U tirha hi ku tshembeka tanihi muvulavuleri wa Xikwembu, “Rito,” a hundzisa rungula ra xona ni swileriso swa xona.—Yohane 1:14.

2. Yesu a a tela yini emisaveni?

Kwalomu ka malembe yo tlula 2 000 lama hundzeke, Yehovha u endle singita hi ku tirhisa moya wakwe lowo kwetsima leswaku a hundzisela vutomi bya Yesu, loyi a a ri etilweni ekhwirini ra nhwana la vuriwaka Mariya. Yesu u velekiwe hi ndlela yoleyo a ri munhu wa nyama. (Hlaya Luka 1:34, 35.) Yesu u te la misaveni leswaku a ta va Mesiya la tshembisiweke kumbe Kreste ni ku tlhela a ponisa vanhu.a U hetisise vuprofeta hinkwabyo bya le Bibeleni lebyi vulavulaka hi Mesiya leswi endleke ku vanhu va kota ku swi vona leswaku hi yena “Kreste, N’wana wa Xikwembu lexi hanyaka.”—Matewu 16:16.

3. Yesu u le kwihi sweswi?

Endzhaku ka loko Yesu a file, Xikwembu xi n’wi pfuxile a ri ni miri wa moya kutani a tlhelela etilweni. Loko a ri kwale, “Xikwembu xi n’wi tlakusile hi ku n’wi nyika xikhundlha lexi tlakukeke.” (Vafilipiya 2:9) Sweswi xikhundlha lexi Yesu a nga na xona xi tlakuke ngopfu, hi yena ntsena a landzelaka Yehovha hi matimba.

4. Yesu a hi Xikwembu xa Matimba Hinkwawo

Bibele yi vula leswaku hambileswi Yesu a nga ntsumi ya matimba etilweni u yingisa Tata wakwe, Yehovha Xikwembu. Hikwalaho ka yini hi vula tano? Tlanga VHIDIYO leswaku u vona leswi Bibele yi swi dyondzisaka hi ndlela leyi xikhundlha xa Yesu ni xa Xikwembu xa matimba hinkwawo swi hambanaka ha yona.

VHIDIYO: Xana Yesu Kreste I Xikwembu? (3:22)

Matsalwa lama landzelaka ma hi pfuna ku twisisa vuxaka lebyi nga kona exikarhi ka Yehovha na Yesu. Hlaya tsalwa ha rin’we ivi mi bula hi swivutiso leswi landzelaka.

Hlaya Luka 1:30-32.

• Ntsumi yi byi hlamusele njhani vuxaka lebyi Yesu na Yehovha Xikwembu loyi a “Nga Le Henhlahenhla” va nga na byona?

Hlaya Matewu 3:16, 17.

• Rito leri a ri huma etilweni ri te yini loko Yesu a khuvuriwa?

• U ehleketa leswaku a ku ri rito ra mani?

Hlaya Yohane 14:28.

• Eka tatana ni n’wana, i mani lonkulu naswona a nga ni vulawuri lebyikulu?

• Ku va Yesu a vitane Yehovha Tata wakwe swi hi byela yini?

Hlaya Yohane 12:49.

• Xana Yesu u tibyela leswaku yena ni Tata wakwe va ringana? Wena u ri yini?

5. Yesu u swi veke erivaleni leswaku hi yena Mesiya

VHIDIYO: Yesu U Hetisise Vuprofeta (3:03)

Hlaya vuprofeta lebyi bya le Bibeleni ivi mi bula hi swivutiso leswi landzelaka:

Hlaya Mikiya 5:2 u twa leswaku Mesiya a a ta velekiwa kwihi.b

• Xana vuprofeta lebyi byi hetisekile loko Yesu a velekiwa?—Matewu 2:1.

Hlaya Pisalema 34:20 na Zakariya 12:10 u vona leswi a ku profetiwe leswaku swi ta endlaka loko Mesiya a fa.

• Xana vuprofeta lebyi byi endlekile?—Yohane 19:33-37.

• U vona onge Yesu u endle leswaku byin’wana bya vuprofeta lebyi byi endleka?

• Leswi swi ku byela yini hi Yesu?

NKATSAKANYO

Yesu i ntsumi leyi nga ni matimba. I N’wana wa Xikwembu la vuriwaka Mesiya.

Mpfuxeto

• Hikwalaho ka yini Yesu a vitaniwa “mativula ya ntumbuluko hinkwawo”?

• Yesu a a endla yini loko a nga si ta laha misaveni?

• Hi swi tivisa ku yini leswaku Yesu i Mesiya?

KUMA LESWI ENGETELEKEKE

Dyondza leswi engetelekeke leswi endlaka hi tshemba leswaku Yesu i Mesiya.

“Xana Vuprofeta Lebyi Vulavulaka Hi Mesiya Byi Ni Vumbhoni Bya Leswaku Yesu A Ri Mesiya?” (Nhlokomhaka leyi kumekaka eka website)

Kambisisa loko Bibele yi dyondzisa leswaku Xikwembu xi ve tata wa Yesu ku fana ni ndlela leyi vanhu va vaka na vana ha yona.

“Hikwalaho Ka Yini Yesu A Vitaniwa N’wana Wa Xikwembu?” (Nhlokomhaka leyi kumekaka eka website)

Kambisisa leswaku hikwalaho ka yini dyondzo ya Vunharhu-un’we yi nga humi eBibeleni.

“Xana Yesu I Xikwembu?”(Xihondzo xo Rindza, April 1, 2009)

Twana ndlela leyi wansati un’wana a cinceke vutomi byakwe ha yona endzhaku ka loko a kambisise leswi Bibele yi swi vulaka hi Yesu.

“Wansati Wa Muyuda A Tlhela A Kambisisa Ripfumelo Rakwe” (Xalamuka!, May 2013)