DYONDZO 34
Hi Nga Swi Kombisa Njhani Leswaku Ha N’wi Rhandza Yehovha?
Ku sukela loko u sungule ku dyondza Bibele, xana u titwa u ri ekusuhi ni Xikwembu? Xana u nga tsakela ku ya emahlweni u tiyisa vunghana bya wena na xona? Loko swi ri tano, tsundzuka leswaku loko Yehovha a vona ndlela leyi u n’wi rhandzaka ha yona yi kula, na yena u ta ya a ku rhandza a tlhela a ku khathalela. U nga swi kombisa njhani leswaku wa n’wi rhandza?
1. Hi nga swi kombisa njhani leswaku ha n’wi rhandza Yehovha?
Hi kombisa leswaku hi rhandza Yehovha loko hi n’wi yingisa. (Hlaya 1 Yohane 5:3.) A nga sindzisi munhu leswaku a n’wi yingisa. Kambe u tshika un’wana ni un’wana wa hina a tihlawulela loko a lava ku n’wi yingisa kumbe a nga swi lavi. Hikwalaho ka yini? Yehovha u lava hi n’wi yingisa “hi mbilu hinkwayo.” (Varhoma 6:17) Leswi swi vula leswaku u lava u n’wi yingisa hileswi u n’wi rhandzaka ku nga ri hi leswi u bohekaka ku endla tano. Xiyenge 3 na 4 xa buku leyi, swi endleriwe ku ku pfuna leswaku u kombisa ndlela leyi u rhandzaka Yehovha ha yona hi ku endla swilo leswi n’wi tsakisaka ni ku papalata ku endla swilo leswi nga n’wi tsakisiki.
2. Hikwalaho ka yini swi nga hi tikelaka ku kombisa ndlela leyi hi rhandzaka Yehovha ha yona?
“Makhombo ya lowo lulama ma tele.” (Pisalema 34:19) Hinkwerhu hi lwisana ni ku nga hetiseki ka hina. Hi nga ha tlhela hi tikeriwa hi swiyimo swa timali, hi nga khomiwi kahle ni ku langutana ni swiphiqo swin’wana. Loko hi ri ni swiphiqo, swi nga hi tikela ku endla leswi Yehovha a lavaka hi swi endla. Sweswo swi vangiwa hileswi swi olovaka ku endla swo biha. Kambe loko u endla leswi Yehovha a ku byelaka leswaku u swi endla u kombisa leswaku wa n’wi rhandza ku tlula swilo hinkwaswo. U kombisa leswaku u tshembekile eka Yehovha. Na yena u ta tshembeka eka wena a nge pfuki a ku tshikile.—Hlaya Pisalema 4:3.
ANAKANYISISA
Kambisisa leswaku hikwalaho ka yini Yehovha a lava u n’wi yingisa, u tlhela u dyondza leswi nga ku pfunaka leswaku u tshama u tshembekile eka yena.
3. Mhaka leyi ku khumbaka
Hi ku ya hi buku ya Bibele ya Yobo, Sathana a nga hehlanga Yobo ntsena kambe u hehle ni vanhu hinkwavo lava lavaka ku tirhela Yehovha. Hlaya Yobo 1:1, 6–2:10, ivi mi bula hi swivutiso leswi:
Hi ku ya hi Sathana, hikwalaho ka yini Yobo a yingise Yehovha?—Vona Yobo 1:9-11.
Sathana u hehla vanhu hinkwavo ku katsa na wena a ku yini?—Vona Yobo 2:4.
Hlaya Yobo 27:5b, ivi mi bula hi xivutiso lexi:
Yobo u swi kombise njhani leswaku u rhandza Yehovha hi mbilu hinkwayo?
Yobo u kombise leswaku u rhandza Yehovha hi ku tshama a tshembekile eka yena
Hi kombisa leswaku hi rhandza Yehovha hi ku tshama hi tshembekile eka yena
4. Tsakisa mbilu ya Yehovha
Hlaya Swivuriso 27:11, ivi mi bula hi swivutiso leswi:
Yehovha u titwa njhani loko u tlharihile u tlhela u n’wi yingisa? Hikwalaho ka yini u vula tano?
5. U nga swi kota ku tshembeka eka Yehovha
Hi byela van’wana hi Yehovha hikwalaho ka leswi hi n’wi rhandzaka. Hi endla leswi hambiloko swi nga olovi hikwalaho ka leswi hi tshembekaka eka yena. Tlanga VHIDIYO, ivi mi bula hi swivutiso leswi landzelaka.
Xana swi pfa swi ku tikela ku byela van’wana hi Yehovha?
I yini leswi pfuneke Grayson wa le ka vhidiyo leyi leswaku a nga ha chavi?
Swa olova ku tshembeka eka Yehovha loko hi rhandza leswi a swi rhandzaka ni ku venga leswi a swi vengaka. Hlaya Pisalema 97:10, ivi mi bula hi swivutiso leswi:
Hi ku ya hi leswi se u swi dyondzeke, hi swihi swin’wana leswi Yehovha a swi rhandzaka? Hi swihi swin’wana leswi a swi vengaka?
U nga endla yini leswaku u rhandza leswinene kutani u venga leswo biha?
6. Ha vuyeriwa loko hi yingisa Yehovha
I swinene ku yingisa Yehovha mikarhi hinkwayo. Hlaya Esaya 48:17, 18, ivi mi bula hi swivutiso leswi:
U vona onge hi nga swi tshemba leswaku mikarhi hinkwayo Yehovha wa swi tiva leswi hi faneleke? Hikwalaho ka yini u vula tano?
Ku dyondza Bibele ni ku tiva Yehovha Xikwembu xa ntiyiso, swi ku vuyerise njhani ku ta fikela sweswi?
VAN’WANA VA RI: “Swiendlo swa mina a swi xi khumbi helo Xikwembu.”
Hi rihi tsalwa leri u nga ri tirhisaka leri kombisaka leswaku Yehovha u ni mhaka ni leswi hi swi endlaka?
NKATSAKANYO
U nga kombisa leswaku u rhandza Yehovha hi ku n’wi yingisa ni ku tshama u tshembekile hambiloko u ri ni swiphiqo.
Mpfuxeto
U dyondze yini eka mhaka ya Yobo?
U ta swi kombisa njhani leswaku u rhandza Yehovha?
I yini leswi nga ta ku pfuna leswaku u tshama u tshembekile eka Yehovha?
KUMA LESWI ENGETELEKEKE
Twana leswi u nga swi endlaka leswaku u tshembeka eka Yehovha ni le ka nhlangano wakwe.
Twana swo tala hi swihehlo leswi Sathana a hehlaka vanhu ha swona.
“Yobo U Tshame A Tshembekile” (Bibele—Yi Tamele Rungula Rihi? xiyenge 6)
Xiya ndlela leyi vana na vona va nga swi kombisaka ha yona leswaku va rhandza Yehovha.
Muntshwa a nga swi kotisa ku yini ku tshama a tshembekile eka Xikwembu hambiloko a tshikileriwa hi vantshwakuloni?