DYONDZO 45
Leswi Vulaka Swona Ku Nga Katseki Eka Tipolitiki
Yesu u dyondzise leswaku valandzeri vakwe a va fanelanga va va “xiphemu xa misava.” (Yohane 15:19) Leswi swi katsa ku nga katseki eka tipolitiki ni tinyimpi. Entiyisweni, a hi mikarhi hinkwayo swi olovaka ku nga katseki eka swona. Hi nga ha hlekiwa hikwalaho ka sweswo. Hi nga swi kotisa ku yini ku nga katseki eka swona ni ku tshama hi tshembekile eka Yehovha Xikwembu?
1. Vakreste va ntiyiso va yi teka njhani mifumo ya vanhu?
Vakreste va xixima mifumo. Hi endla hilaha Yesu a vuleke hakona kutani hi “[tlherisela] swilo swa Khezari eka Khezari” hikuva hi yingisa milawu ya tiko yo fana ni ku hakela swibalo. (Marka 12:17) Bibele yi dyondzisa leswaku mifumo ya vanhu yi fuma hikwalaho ka leswi Yehovha a yi pfumeleleke ku fuma. (Varhoma 13:1) Hikwalaho, ha swi tiva leswaku mifumo ya vanhu a yi hi lawuli eka hinkwaswo. Hi tshemba leswaku Xikwembu xa hina xi ta tirhisa Mfumo wa xona wa le tilweni ku tlhantlha swiphiqo swa vanhu.
2. Hi nga swi kombisa njhani leswaku a hi katseki eka tipolitiki?
Ku fana na Yesu, a hi katseki eka tipolitiki. Loko vanhu va vone rin’wana ra masingita lawa Yesu a ma endleke loko a ri laha misaveni kutani va ringeta ku n’wi endla hosi ya vona, a nga pfumelanga. (Yohane 6:15) Hikwalaho ka yini a nga pfumelanga? Hikuva, u te: “Mfumo wa mina a hi xiphemu xa misava leyi.” (Yohane 18:36) Leswi hi nga vadyondzisiwa va Yesu, hi kombisa leswaku a hi katseki eka swilo leswi endlekaka laha misaveni hi tindlela to hlayanyana. Hi xikombiso, a hi yi enyimpini. (Hlaya Mikiya 4:3.) Ha yi xixima mijeko kambe a hi yi gandzeli. (1 Yohane 5:21) Nakambe a hi seketeli kumbe ku lwisana ni nhlangano wo karhi wa tipolitiki kumbe lava wu rhangelaka. Hi tindlela leti na tin’wana, hi kombisa leswaku hi tshembeka hi ku helela eka Mfumo wa Xikwembu.
ANAKANYISISA
Kambisisa swiyimo leswi nga endlaka swi tika ku nga katseki eka tipolitiki, ivi u vona ndlela leyi u nga swi endlaka ha yona swiboho leswi tsakisaka Yehovha.
3. Vakreste va ntiyiso a va katseki eka tipolitiki ni tinyimpi
Yesu ni valandzeri vakwe va hi vekele xikombiso. Hlaya Varhoma 13:1, 5-7 na 1 Petro 2:13, 14. Endzhaku, tlanga VHIDIYO ivi mi bula hi swivutiso leswi landzelaka.
Hikwalaho ka yini hi fanele hi xixima mifumo ya vanhu?
Hi tihi tindlela tin’wana leti hi kombisaka ha tona leswaku ha titsongahata eka yona?
Hi nkarhi wa nyimpi, matiko man’wana ma nga ha vula leswaku a ma katseki, kambe ma pfuneta lava nga le ku lweni. Kahlekahle swi vula yini ku nga katseki enyimpini? Hlaya Yohane 17:16. Endzhaku, tlanga VHIDIYO ivi mi bula hi xivutiso lexi landzelaka.
Swi vula yini ku nga katseki eka swa tipolitiki?
Ku vuriwa yini loko mfumo wu lava leswaku u endla nchumu wo karhi lowu lwisanaka ni nawu wa Xikwembu? Hlaya Mitirho 5:28, 29. Endzhaku, tlanga VHIDIYO ivi mi bula hi swivutiso leswi landzelaka.
Loko nawu wa vanhu wu lwisana ni nawu wa Xikwembu, hi fanele hi yingisa nawu wa mani?
Hi swihi swiyimo leswi u vonaka onge Mukreste a nge wu yingiseli mfumo eka swona?
4. U nga katseki hi mianakanyo ni hi swiendlo
Hlaya 1 Yohane 5:21. Endzhaku, tlanga VHIDIYO ivi mi bula hi swivutiso leswi landzelaka.
Eka vhidiyo leyi, hikwalaho ka yini Ayenge a hlawule ku nga wu joyini nhlangano wa politiki kumbe ku katseka eka mikhuvo ya tiko yo fana ni ku losa mujeko?
U ehleketa leswaku u endle xiboho xa vutlhari?
Hi swihi swiyimo swin’wana leswi nga endlaka swi hi tikela ku nga katseki eka tipolitiki? Tlanga VHIDIYO, ivi mi bula hi swivutiso leswi landzelaka.
Hi nga swi kotisa ku yini ku nga seketeli tiko ro karhi loko swi ta eka mitlangu leyi tlangiwaka hi matiko yo hambanahambana?
Hi nga swi kotisa ku yini ku nga katseki eka tipolitiki hambiloko swiboho leswi endliwaka hi van’watipolitiki swi hi khumba?
Swilo leswi hi swi twaka eka mahungu kumbe eka vanhu lava hi va toloveleke swi nga xi khumba njhani xiboho xa hina xa ku nga katseki eka tipolitiki?
Hi le ka swiyimo swihi laha Mukreste a faneleke a nga katseki eka tipolitiki ni tinyimpi hi mianakanyo ni hi swiendlo?
UN’WANA A NGA HA KU VUTISA A KU: “Hikwalaho ka yini u nga wu losi mujeko kumbe ku yimbelela risimu ra rixaka?”
A wu ta n’wi hlamula njhani?
NKATSAKANYO
Vakreste va tikarhatela ku nga katseki eka tipolitiki hi mianakanyo, marito ni hi swiendlo.
Mpfuxeto
I yini leswi hi swi kolotaka mifumo ya vanhu?
Hikwalaho ka yini hi nga katseki eka tipolitiki?
I swiyimo swihi leswi nga endlaka swi hi tikela ku nga katseki eka tipolitiki?
KUMA LESWI ENGETELEKEKE
Hi swihi swilo leswi hi nga ha bohekaka ku swi tshika leswaku hi nga katseki eka tipolitiki?
I yini leswi mindyangu yi nga swi endlaka leswaku yi tilunghiselela swiyimo leswi nga endlaka swi tika ku nga katseki eka tipolitiki?
U Nga Ngheneleli Eka Tipolitiki Loko U Ri Eka Swiendlakalo Swa Mani Na Mani (4:25)
Hikwalaho ka yini ku lwela tiko swi nga tisi ku dzuneka evuton’wini bya munhu?
Twana leswi u nga swi endlaka leswaku u tshama u nga ri xiphemu xa misava loko swi ta eka ntirho.
“Un’wana Ni Un’wana U Ta Rhwala Ndzhwalo Wakwe” (Xihondzo xo Rindza, March 15, 2006)