Hi Nga Endla Yini Leswaku Hi Tshama Hi Basile eMatihlweni Ya Xikwembu?

Ehleketa hi mhani loyi a pfunaka xifanyetana xa yena leswaku xi lunghekela ku ya exikolweni. Wa tiyiseka leswaku xi hlambile nileswaku mpahla ya xona yi basile. Sweswo swi endla leswaku xi va ni rihanyo lerinene naswona vanhu va swi vona leswaku vatswari va xona va xi khathalela. Swi tano na hi Yehovha Tatana wa hina la nga ni rirhandzu, u lava hi basa emirini ni le mahanyelweni. Loko hi basile, swa hi vuyerisa naswona swi endla leswaku a dzunisiwa.

1. Hi nga endla yini leswaku hi basa emirini?

Yehovha u ri: “Mi fanele mi kwetsima.” (1 Petro 1:16) Leswaku hi kwetsima, hi fanele hi basa emirini ni le mahanyelweni. Ha basa emirini loko hi hlamba masiku hinkwawo, hi hlantswa swiambalo swa hina, hi basisa makaya ni timovha ta hina. Hi fanele hi basisa ni Tiholo ta hina ta Mfumo. Hi dzunisa Yehovha loko hi tshama hi basile emirini.—2 Vakorinto 6:3, 4.

2. Hi yihi mikhuva leyi hi faneleke hi yi papalata leswaku hi tshama hi basile?

Bibele yi hi khutaza ku ‘tibasisa eka swilo hinkwaswo leswi thyakisaka nyama ni moya.’ (2 Vakorinto 7:1) Hikwalaho, hi tikarhatela ku papalata swilo leswi nga thyakisaka miri ni mianakanyo ya hina. Leswi hi swi ehleketaka swi fanele swi tsakisa Yehovha kutani hi fanele hi tikarhatela ku papalata ku ehleketa swilo swo biha. (Pisalema 104:34) Hi tlhela hi papalata nhlambha kumbe mavulavulelo lama thyakeke.—Hlaya Vakolosa 3:8.

Hi swihi swin’wana leswi nga hi thyakisaka emirini ni le mahanyelweni? Ku ni swilo swo karhi leswi nga thyakisaka mimiri ya hina. Hikwalaho, a hi dzahi fole kumbe mbangi ni ku tirhisa tidraksi. Hi va ni rihanyo lerinene loko hi papalata swilo leswi naswona hi kombisa leswaku ha yi xixima nyiko ya vutomi. Hi tlhela hi tikarhatela ku tshama hi basile emahanyelweni hi ku va hi nga hlaleli swifaniso leswi navetisaka timhaka ta masangu (phonografi) ni ku chokocha. (Pisalema 119:37; Vaefesa 5:5) Swi nga tika ku tshika mikhuva leyi kambe Yehovha u ta hi pfuna ku yi tshika.—Hlaya Esaya 41:13.

ANAKANYISISA

3. Hi dzunisa Yehovha loko hi basa emirini

Loko hi kambisisa milawu leyi Yehovha a a yi nyike Vaisrayele, hi kota ku twisisa ndlela leyi a ku langutaka ha yona ku basa. Hlaya Eksoda 19:10 na 30:17-19, ivi mi bula hi swivutiso leswi:

• Matsalwa lawa ma yi hlamusela njhani ndlela leyi Yehovha a langutaka ku basa ha yona?

• I yini leswi nga ta ku pfuna leswaku u tshama u basile?

Swi lava ku tikarhata leswaku hi tshama hi basile emirini. Kambe hi nga swi kota ku tshama hi basile ku nga khathariseki xiyimo xa hina xa timali. Tlanga VHIDIYO, ivi mi bula hi xivutiso lexi landzelaka.

VHIDIYO: Xikwembu Xi Rhandza Vanhu Lava Baseke (4:10)

• Loko swilo swa hina swi basile swi tlhela swi languteka swi endla leswaku ntirho wa hina wu xiximeka hi ndlela yihi?

4. Tshika mikhuva yo biha

Loko u dzaha kumbe u tirhisa tidraksi, kumbexana wa swi tiva leswaku swi tika njhani ku tshika. Kambe i yini leswi nga ku pfunaka? Kambisisa ndlela leyi mikhuva leyi yi onhaka miri wa wena ha yona. Hlaya Matewu 22:37-39, ivi mi bula hi ndlela leyi ku dzaha kumbe ku tirhisa tidraksi swi khumbaka . . .

• vunghana bya wena na Yehovha ha yona.

• ndyangu wa wena ni van’wana.

Endla swo karhi leswaku u tshika mikhuva yo biha.a Tlanga VHIDIYO.

VHIDIYO: Ku Tikhoma (2:47)

Hlaya Vafilipiya 4:13, ivi mi bula hi xivutiso lexi:

• Swi nga n’wi pfuna njhani munhu ku hlula mukhuva wo biha loko mikarhi hinkwayo a khongela, a dyondza Bibele ni ku va kona etinhlengeletanweni ta vandlha?

5. Lwisana ni ku endla swilo leswi nga riki swinene ni ku ehleketa hi swona

Hlaya Vakolosa 3:5, ivi mi bula hi swivutiso leswi:

• Hi swi tivisa ku yini leswaku ku hlalela swifaniso swo navetisa timhaka ta masangu (phonografi), ku rhumelana swilo swa timhaka ta masangu ni ku chokocha a swi basanga ematihlweni ya Yehovha?

• Hi ku vona ka wena, xana Yehovha wa hi tikisela loko a lava leswaku hi tshama hi basile emahanyelweni? Hikwalaho ka yini u vula tano?

Vona ndlela leyi u nga wu hlulaka ha yona mukhuva wo ehleketa hi swilo leswi nga basangiki. Tlanga VHIDIYO.

VHIDIYO: Teka Goza Leswaku U Tshika Mikhuva Yo Biha (1:51)

Yesu u tirhise xikombiso lexi kombisaka leswaku hi fanele hi teka goza hi ku hatlisa leswaku hi tshama hi basile emahanyelweni. Hlaya Matewu 5:29, 30, ivi mi bula hi xivutiso lexi:

• Hambileswi Yesu a a nga vuli swona leswaku hi fanele hi tivavisa kambe u kombise leswaku hi fanele hi endla swo karhi. I yini leswi munhu a faneleke a hatla a swi endla leswaku a papalata ku ehleketa hi swilo leswi nga basangiki?b

Loko u ri eku lweni ni ku tshika ku ehleketa hi swilo leswi nga basangiki, Yehovha wa tsaka hi matshalatshala lawa u ma endlaka. Hlaya Pisalema 103:13, 14, ivi mi bula hi xivutiso lexi:

• Loko u ri eku lweni ni ku tshika mukhuva lowu thyakeke, tsalwa leri ri ku pfuna njhani leswaku u nga tshiki ku lwa?

Yana emahlweni u lwa!

Swi olovile ku tibyela u ku, ‘Swi ni tsandzile ni to vhela ni tshika.’ Ehleketa hi mhaka leyi: A swi vuli swona leswaku loko xitsutsumi xo phijeka xi wa, a xi nge he wini kumbe xi boheka ku tlhela xi sungula ehansi. Hilaha ku fanaka, a swi vuli swona leswaku loko wo tlhelela eka mukhuva wa wena wo biha hiloko se u tsandzekile ku wu hlula. U fanele u tinyungubyisa hi leswi u koteke ku swi endla leswaku u wu tshika. Loko wo tikuma u tlhelele eka mukhuva wa wena wo biha a swi sunguli hi wena, u nga swi kota ku wu hlula. U nga heli matimba! Yehovha u ta ku pfuna leswaku u hlula mukhuva wo biha.

NKANTSAKANYO

Hi tsakisa Yehovha loko hi basa emirini, emiehleketweni ni le mahanyelweni.

Mpfuxeto

• Hikwalaho ka yini swi ri swa nkoka swinene ku tshama hi basile?

• U nga endla yini leswaku u tshama u basile emirini?

• U nga endla yini leswaku leswi u swi ehleketaka ni mahanyelo ya wena swi va leswi baseke?

KUMA LESWI ENGETELEKEKE

U nga endla yini leswaku u tshama u basile ku nga khathariseki xiyimo xa wena xa timali?

Rihanyo Ni Ku Basa—Ku Hlamba Mavoko (3:01)

Twana leswi u nga swi endlaka leswaku u tshika ku dzaha.

“Ndlela Yo Tshika Ku Dzaha” (Xalamuka!, May 2010)

Twana hi vuyelo byo biha lebyi vangiwaka hi ku hlalela swifaniso swo navetisa timhaka ta masangu (phonografi.)

“Swifaniso Swo Navetisa Rimbewu—Xana I Swinene Kumbe Swi Na Khombo?” (Xihondzo xo Rindza, August 1, 2013)

Twana leswaku wanuna loyi a a godzomberiwe hi ku hlalela swifaniso swo navetisa timhaka ta masangu (phonografi) u swi kotise ku yini ku swi tshika.

“Ndzi We Ndzi Pfuka Ndzi Kala Ndzi Hlula” (Xihondzo xo Rindza No. 4 2016)