Leswi Hi Swi Dyondzaka Eka Yesu

Malunghana Ni Ndlela Leyi Hi Nga Khomaka Vanhu Van’wana Ha Yona

Ha yini hi fanele hi va ni musa?

Xana u va ni musa eka vanhu lava nga riki na musa eka wena? Loko hi lava ku tekelela Yesu, hi fanele hi va ni musa ni le ka vanhu lava hi vengaka. Yesu u te: “Loko mi rhandza lava mi rhandzaka, xana swi mi vuyerisa ha yini? Hikuva hambi vadyohi va rhandza lava va va rhandzaka. . . . Hilaha ku hambaneke, hambetani mi rhandza valala va n’wina . . . , naswona mi ta va vana va La nge Henhla-henhla, hikuva u ni musa eka lava nga nkhensiki ni lavo homboloka.”—Luka 6:32-36; 10:25-37.

Ha yini hi fanele hi rivalela van’wana?

Loko hi endle swihoxo hi kombela leswaku Xikwembu xi hi rivalela. Yesu u dyondzise leswaku swi fanerile ku khongela eka Xikwembu hi kombela ku rivaleriwa. (Matewu 6:12) Hambiswiritano, Yesu u tlhele a vula leswaku Xikwembu xi ta hi rivalela ntsena loko hi rivalela van’wana. U te: “Loko mi rivalela vanhu swivi swa vona, Tata wa n’wina wa le tilweni na yena u ta mi rivalela; kasi loko mi nga va rivaleli vanhu swivi swa vona, na yena Tata wa n’wina a nge mi rivaleli swivi swa n’wina.”—Matewu 6:14, 15.

Mindyangu yi nga va ni ntsako hi ndlela yihi?

Hambileswi Yesu a a nga tekanga, hi nga dyondza swo tala eka yena malunghana ni ndlela leyi mindyangu yi nga vaka ni ntsako ha yona. U hi vekele xikombiso lexi hi nga xi tekelelaka hi marito lawa a ma vuleke ni hi swiendlo swakwe. Xiya tinhla tinharhu leti landzelaka:

1. Wanuna u fanele a rhandza nsati wakwe ku fana ni miri wakwe. Yesu u vekela vavanuna xikombiso. U byele vadyondzisiwa vakwe a ku: “Ndzi mi nyika xileriso lexintshwa, leswaku mi rhandzana.” A va fanele va rhandzana hi ndlela yihi? Yesu u te: ‘Hilaha ndzi mi rhandzeke hakona.’ (Yohane 13:34) Loko Bibele yi tirhisa nawu lowu eka vavanuna yi ri: “Vavanuna, hambetani mi rhandza vasati va n’wina, hilaha Kreste na yena a rhandzeke vandlha hakona kutani a tinyiketa hikwalaho ka rona . . . Hi ndlela leyi vavanuna va fanele ku rhandza vasati va vona ku fana ni mimiri ya vona. Loyi a rhandzaka nsati wakwe wa tirhandza, hikuva a nga kona munhu loyi a tshameke a venga nyama yakwe; kambe wa yi wundla ni ku yi khathalela, hilaha Kreste na yena a endlaka hakona evandlheni.”—Vaefesa 5:25, 28, 29.

2. Vatekani va fanele va tshembeka. Ku va ni vuxaka bya rimbewu ni munhu loyi u nga tekanangiki na yena i xidyoho emahlweni ka Xikwembu naswona swi hahlula mindyangu. Yesu u te: “Xana a mi hlayanga . . . ‘Hikwalaho ka sweswo, wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we’? Kutani a va ha ri vambirhi, kambe i nyama yin’we. Hikokwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka. . . . Ndza mi byela leswaku mani na mani la tshikaka nsati wakwe, a teka un’wana, ku nga ri hi xivangelo xa vumbhisa, u endla vuoswi.”—Matewu 19:4-9.

3. Vana va fanele va tiveka ehansi ka vatswari va vona. Hambileswi Yesu a a hetisekile, u va yingisile vatswari vakwe lava nga hetisekangiki. Loko Bibele yi vulavula hi Yesu loko a ha ri ni malembe ya 12 yi ri: “A rhelela na vona [vatswari vakwe] ivi va fika eNazareta, naswona a hambeta a tiveka ehansi ka vona.”—Luka 2:51; Vaefesa 6:1-3.

Ha yini hi fanele hi tirhisa milawu leyi?

Loko Yesu a vulavula hi tidyondzo leti a ti dyondziseke vadyondzisiwa vakwe, u te: “Loko mi tiva swilo leswi, ma tsaka loko mi swi endla.” (Yohane 13:17) Leswaku hi va Vakreste va ntiyiso, hi fanele hi tirhisa ndzayo leyi Yesu a hi nyikeke yona malunghana ni ndlela leyi hi faneleke hi va khoma ha yona vanhu van’wana. U te: “Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:35.

Leswaku u kuma rungula leri engetelekeke, vona ndzima 14 ya buku leyi nge Xana Bibele Yi Dyondzisa Yini Hakunene?a

[Nhlamuselo ya le hansi]

[Xifaniso lexi nga eka tluka 16, 17]

Xifaniso xa Yesu xa n’wana wa vusopfa xi hi dyondzisa leswaku ku va ni musa ni ku rivalela i swa nkoka.—Luka 15:11-32

[Xifaniso lexi nga eka tluka 17]

Vatekani va fanele va tshembeka