Swivutiso Swa Vahlayi

Loko Sathana a byela Evha leswaku a nga ta fa loko a dya eka murhi wa ku tiva leswinene ni leswo biha, xana a sungula dyondzo leyi namuntlha yi tolovelekeke ya leswaku moya a wu fi?

Diyavulosi a nga byelanga Evha leswaku loko a dya mbhandzu lowu Xikwembu xi wu yiriseke, a ta vonaka a file kambe a ku ta va ni nchumu wo karhi lowu nga vonakiki emirini wakwe lowu nga taka wu nga fi (lowu van’wana namuntlha va vulaka leswaku i moya lowu nga fiki) lowu a wu ta ya emahlweni wu hanya kun’wana. Hi ku tirhisa nyoka, Sathana u byele Evha leswaku loko o dya mbhandzu wa murhi wolowo, ‘entiyisweni a nga ka a nga fi’ nikatsongo. A vula leswaku a ta ya emahlweni a hanya, a titlonya hi vutomi laha misaveni naswona a ta hanya handle ko lawuriwa hi Xikwembu.—Gen. 2:17; 3:3-5.

Loko dyondzo ya mavunwa ya leswaku moya a wu fi leyi dyondzisiwaka namuntlha yi nga sungulanga eEdeni, xana yi nga va yi sungule kwihi? A hi tiyiseki. Ha swi tiva leswaku vukhongeri hinkwabyo bya mavunwa byi herisiwe hi nkarhi wa Ndhambi ya Nowa. A byi kona vukhongeri bya mavunwa lebyi poneke eka Ndhambi kambe ku pone ntsena vagandzeri va ntiyiso ku nga Nowa ni ndyangu wakwe.

Dyondzo leyi nga kona namuntlha leyi vulaka leswaku moya a wu fi yi sungule endzhaku ka Ndhambi. Loko Xikwembu xi pfilunganye tindzimi eBabele naswona vanhu va hangalake “ehenhla ka vuandlalo bya misava hinkwayo,” a swi kanakanisi leswaku va fambe ni dyondzo yoleyo ya leswaku vanhu va ni moya lowu nga fiki. (Gen. 11:8, 9) Ku nga khathariseki leswaku mavunwa lawa ma sungule kwihi, ha swi tiva leswaku “tata wa mavunwa,” Sathana Diyavulosi, hi yena loyi a endleke leswaku ma hangalaka emisaveni hinkwayo.—Yoh. 8:44.