“Tshamani Mi Ri Karhi Mi Endla Leswi”—Xitsundzuxo Xi Ta Tlangeriwa Hi April 5
1. Ha yini siku ra Xitsundzuxo ri ri ra nkoka?
1 “Tshamani mi ri karhi mi endla leswi leswaku mi ndzi tsundzuka.” (Luka 22:19) Hi marito wolawo, Yesu u lerise valandzeri vakwe leswaku va tsundzuka rifu rakwe ra gandzelo. Hikwalaho ka nkutsulo wolowo, a ri kona siku ra nkoka swinene kumbe ra risima eka Vakreste ku tlula Xitsundzuxo xa lembe ni lembe. Tanihi leswi xitsundzuxo xa lembe leri xi nga ta va hi April 5, hi nga swi kombisa njhani leswaku ha n’wi nkhensa Yehovha?—Kol. 3:15.
2. Hi nga swi kombisa njhani leswaku ha ri tlangela siku ra Xitsundzuxo hi ku dyondza ni ku anakanyisisa?
2 Lunghiselela: Ha kanyingi hi tala ku lunghiselela swilo leswi hi tivaka leswaku i swa nkoka. Hi nga endla leswaku timbilu ta hina ti lunghekela Xitsundzuxo hikuva hi kambisisa swiendlakalo leswi humeleleke hi masiku yo hetelela ya vutomi bya Yesu laha misaveni hi tlhela hi anakanyisisa hi swiendlakalo sweswo tanihi ndyangu. (Ezra 7:10) Nxaxamelo wa matsalwa ma nga ri mangani wu kumeka ekhalendarini ni le ka Ku Kambisisa Matsalwa Siku Ni Siku, kasi nxaxamelo lowu heleleke lowu fambisanaka ni tindzima ta buku ya Nghwazi ti kumeka eka Xihondzo xo Rindza xa February 1, 2011 matluka 23-24.
3. Hi nga swi kombisa njhani leswaku ha xi tlangela Xitsundzuxo hi ku va hi hlanganyela hi xitalo ensin’wini?
3 Chumayela: Nakambe hi nga kombisa ku tlangela ka hina hi ku va hi heta nkarhi lowu engetelekeke ensin’wini. (Luka 6:45) Hi Mugqivela wa March 10, ku ta va Siku ra hina ro hlawuleka ro fambisa Timagazini naswona ku sukela hi Mugqivela wa March 17, emisaveni hinkwayo hi ta va hi sungula tsima ro rhambela vanhu eXitsundzuxweni. Xana u nga hlela xiyimiso xa wena leswaku u kota ku heta nkarhi lowu engetelekeke ensin’wini, kumbexana hi ku teka vuphayona bya nkarhinyana? Ha yini mi nga buli hi mhaka leyi tanihi ndyangu eka Vugandzeri bya Ndyangu bya nimadyambu lebyi landzelaka?
4. Hi ta vuyeriwa hi yini hi ku va kona eXitsundzuxweni?
4 Hi vuyeriwa njhani hi ku va kona eXitsundzuxweni lembe ni lembe? Ntsako ni ndlela leyi hi n’wi rhandzaka ha yona Yehovha yi ya yi kula loko hi vona ku hanana ka yena, hikuva a hi kutsule hi ku nyikela hi N’wana wakwe la tswariweke a ri swakwe. (Yoh. 3:16; 1 Yoh. 4:9, 10) Leswi swi lava leswaku hi nga ha tihanyeli. (2 Kor. 5:14, 15) Swi tlhela swi hi susumetela ku dzunisa Yehovha erivaleni. (Ps. 102:19-21) Hakunene, malandza ya Yehovha lama tsakeke ma ri langutele hi mahlo-ngati lunghelo leri hi nga ta va na rona eXitsundzuxweni hi April 5 ro “huwelela rifu ra Hosi, yi kondza yi fika.”—1 Kor. 11:26.