Bokisi Ra Swivutiso

◼ Hi fanele hi anakanya ha yini loko hi lava leswaku nhundzu yo karhi kumbe hinkwayo yi yisiwa eka nhlengeletano ya Yehovha loko ho tshuka hi fa?

Loko vanhu va fa, a va ha ri na vulawuri eka rifuwo ra vona. (Ekl. 9:5, 6) Xisweswo, loko vanhu vo tala va nga si fa, va tsala phepha ra le nawini va hlamusela leswaku nhundzu ya vona yi fanele yi averiwa vamani. (2 Tih. 20:1) Hakanyingi phepha rero ri tlhela ri hlamusela munhu loyi a nga ta sala a lawula rifuwo ra mufi. Loko munhu fa a nga tsalanga nchumu, mfumo hi wona wu nga ta vona leswaku i mani loyi a nga ta nyikiwa vulawuri byo hangalasa ndzhaka ya mufi hi mfanelo. Hikokwalaho, loko ku ri ni swin’wana leswi hi nga navelaka leswaku swi endliwa hi ndzhaka ya hina, swo tanihi ku nyikela nhundzu yin’wana kumbe hinkwayo eka nhlengeletano ya Yehovha, i swa nkoka leswaku hi tsala papila ra le nawini naswona hi hlawula munhu la nga ta sala a langutela nhundzu yoleyo. Nakambe tiyiseka leswaku u bula hi mhaka leyi ni swirho swa ndyangu wa wena, ngopfu-ngopfu loko swi nga ri Timbhoni. Leswi swi ta endla leswaku swirho swa ndyangu swi nga lwisani ni leswi papila leri u ri tsaleke ri swi vulaka ngopfu-ngopfu loko swi vona onge ndzhaka yi fanele yi tshama ni vandyangu.

Munhu la nga ta sala a langutela rifuwo u ni vutihlamuleri lebyikulu. Swi ya hi leswaku ndzhaka ya kona yi tanihi kwihi, vutihlamuleri byakwe bya ku yi hangalasa byi katsa swilo swo tala naswona swi nga ha koxa nkarhi wo tala. Tlhandlakambirhi, hakanyingi mfumo wu ni swiletelo swo tala leswi faneleke swi landzeriwa, hikwalaho u nga ha lava mpfuno eka munhu la fanelekaka wo tanihi n’watinkota. A hi munhu un’wana ni un’wana evandlheni loyi a nga byarhisiwaka vutihlamuleri lebyi. Munhu loyi hi n’wi hlawulaka hi fanele hi swi tiva leswaku u ni vuswikoti, wa tshembeka naswona u tiyimisele ku endla ku rhandza ka hina.—Vona xihloko lexi nge, “The Wisdom and Benefits of Estate Planning,” eka Xalamuka! ya December 8, 1998. [ya Xinghezi]

Loko U Komberiwe Ku Sala U Langutela Rifuwo: Loko u komberiwe ku endla tano kumbe u navela ku langutela swilo swa nawu endzhaku ka rifu ra munhu wo karhi, xo sungula u fanele u rhanga hi ku hlayela ntsengo naswona u tikambisisa hi xikhongelo loko u ta swi kota ku hetisisa vutihlamuleri lebyi. (Luka 14:28-32) Endzhaku ka rifu, u fanele u tivisa vanhu hinkwavo lava nga tsariwa tanihi vadyandzhaka. Loko se u ri ni vulawuri byo endla tano, ku ta va vutihlamuleri bya wena ku avela rifuwo hi ku ya hi nawu ni hilaha swi tsariweke ha kona epapileni. Munhu la nga ta sala a langutela rifuwo u fanele a tivonela leswaku u landzela leswi tsariweke ku nga khathariseki leswaku ndzhaka leyi van’wana va yi kumaka yi ntsongo kumbe yi tele. Nyiko yin’wana ni yin’wana leyi nga le nawini leyi nyikeriweke leswaku yi tirhisiwa hi Timbhoni ta Yehovha i minyikelo ya nhlangano ya Yehovha.—Luka 16:10; 21:1-4.