Mikateko Leyi Kumiwaka Hi Lava Pfunaka Van’wana

Vanhu vo tala emisaveni hinkwayo va lava swakudya ni ndhawu yo tshama eka yona. Van’wana vo lava ntshembo wa vumundzuku. Xikwembu xi lava leswaku hi pfuna van’wana naswona xi ta hi katekisa loko hi endla tano.

LESWI MATSALWA YO KWETSIMA MA SWI VULAKA

“Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.”—SWIVURISO 19:17.

LESWI VULAKA SWONA KU PFUNA VAN’WANA

Yesu u hlamusele xifaniso xa wanuna loyi a hlaseriwe hi swigevenga kutani swi n’wi siya a ri kusuhi ni ku fa. (Luka 10:29-37) Wanuna un’wana loyi a nga n’wi tivi u yimile kutani a n’wi khathalela. Hambileswi a va nga humi eka mindhavuko leyi fanaka u n’wi pfunile.

Wanuna loyi wa musa a nga lo n’wi pfuna ntsena munhu loyi a vavisekile kambe u tlhele a n’wi chavelela ni ku n’wi endla a titwa a antswa.

Hi dyondza yini eka xifaniso lexi? Yesu a kombisa leswaku hi fanele hi pfuna van’wana hilaha hi nga kotaka ha kona. (Swivuriso 14:31) Matsalwa yo Kwetsima ma kombisa leswaku ku nga ri khale Xikwembu xi ta herisa vusweti ni ku xaniseka. Hi nga ha tivutisa leswaku Xikwembu xi ta swi endla njhani kumbe rini sweswo? Nhlokomhaka leyi landzelaka yi ta hlamusela mikateko leyi Muvumbi wa hina a hi vekeleke yona.