Xana Xikwembu Xi Ta Ndzi Pfuna Loko Ndzi Khongela?

Nhlamulo ya Bibele

Xikwembu xa va pfuna vanhu lava swi khongelelaka hi mbilu hinkwayo swilo leswi fambisanaka ni ku rhandza ka xona. Hambiloko u nga si tshama u khongela, swikombiso swa le Bibeleni swa vanhu lava khongeleleke mpfuno wa Xikwembu swi nga ku khutaza. Hi xikombiso:

• “Ndzi pfune, Wena Yehovha Xikwembu xanga; ndzi ponise hi ku ya hi musa wa wena wa rirhandzu.”—Pisalema 109:26.

• “Ndza pfumala naswona ndzi xisiwana: Oho Xikwembu, ndzi pfune.”—Pisalema 69:6, Douay Version.

Mutsari wa marito wolawo a a ri ni ripfumelo leri tiyeke eka Xikwembu. Kambe, Xikwembu xa va yingisela vanhu hinkwavo lava khongelaka eka xona va ri ni langutelo lerinene, vo tanihi lava va “tshovekeke mbilu” kumbe lava va “pfotlokeke emoyeni.”—Pisalema 34:18.

A wu fanelanga u ehleketa leswaku Xikwembu xi le kule na wena lerova a xi na mhaka ni swiphiqo swa wena. Bibele yi ri: “Yehovha u tlakukile, hambiswiritano wa n’wi vona la titsongahata; kambe la titlakusaka u n’wi tivela ekule.” (Pisalema 138:6) Entiyisweni, Yesu u tshame a byela vadyondzisiwa vakwe a ku: “Hambi ku ri misisi ya tinhloko ta n’wina yi hlayiwile hinkwayo.” (Matewu 10:30) Xikwembu xi tiva vuxokoxoko hinkwabyo bya wena lebyi hambi ku ri wena u nga byi tiviki. Kutani swi le rivaleni leswaku xi ta ku yingisela loko u khongelela mpfuno wa xona hikwalaho ka mivilelo ya wena.—1 Petro 5:7.