Kronekele wo sangula

10 Makunu a vaFilistiya va wa kari valwa ni vaIzrayeli. A vavanuna va ka Izrayeli va no tsutsuma a vaFilistiya, ku dawa vanhu vo tala Citsungeni ca Gilbhowa.+ 2 A vaFilistiya va no hlongolisela Sawule ni vana vakwe, va tshinela kusuhani kabye. Va no daya Jonatani, na Abhinadhabha, na Malkixuwa,+ a vana va Sawule. 3 A yimpi yi no hisa nguvhu ka Sawule, a kumiwa hi vaphandi va mipaxa niku i no bayisiwa hi vaphandi va mipaxa.+ 4 Makunu Sawule i no byela a muweleli wa matlhari yakwe, aku: “Hlomula a cipadha ca wena u ndzi tlhava hi cona, kasi a vavanuna lava vo kala ku mahiwa wukwera* va nga ndzi khomi hi ndlela ya xapi.”*+ Kanilezvi a muweleli wa matlhari yakwe a nga vhumelangi, hakuva i wa chava nguvhu. Hikwalaho, Sawule i no teka a cipadha a ti hoxela ka cona.+ 5 Laha a muweleli wa matlhari yakwe a nga wona lezvaku Sawule i file, yenawu i no ti hoxela laha ka cipadha cakwe afa. 6 Hikwalaho, Sawule ni vana vakwe va vanharu va nofa, zvin’we ni vontlhe va ngango wakwe.+ 7 Laha a vanhu vontlhe va ka Izrayeli lava va nga hi le nkoveni va nga wona lezvaku a vanhu vontlhe va tsutsumile ni lezvaku Sawule ni vana vakwe va file, va no sangula ku huma lomu madhoropeni yabye va tsutsuma. Andzhako ka lezvo, a vaFilistiya va nota va ta nghena va tshama ka wona.

8 Ka siku gi nga landzela, laha a vaFilistiya va ngata kasi ku ta phanga a zvilo zva vanhu lava va nga file, va no kuma Sawule ni vana vakwe na va file Citsungeni ca Gilbhowa.+ 9 Hikwalaho, va no mu tlhatlha tinguwo, va mu tsema hloko, va teka matlhari yakwe. Va no rumela a vanhu tikweni gontlhe ga vaFilistiya lezvaku va famba va hangalasa a mahungu lawo ka zvifananiso zvabye+ ni ka vanhu. 10 Hi kulandzela, va no veka a matlhari yakwe ndlwini* ya nungungulu wabye, va gumesa va hayeka a hloko yakwe ndlwini ya Dhagoni.+

11 A cikhati leci a vahanyi vontlhe va Jabhexe+ wa Gileyadhe va ngazwa zvontlhe lezvi a vaFilistiya va nga mahile Sawule,+ 12 a tinhenha tontlhe ti no suka ti ya teka a cirumbi ca Sawule ni zvirumbi zva vana vakwe. Va no zvi neha Jabhexe va ta lahla a marambu ya kona lahasi ka sinya ya hombe le Jabhexe,+ va pfhunga* a 7 wa masiku.

13 Hikwalaho, Sawule i nofa hi kota ya kungatsumbeki mahlweni ka Jehovha hakuva a nga ingisangi a gezu ga Jehovha,+ ni hi lezvi a nga wutisa a n’anga+ 14 a tsika ku wutisa Jehovha. Hikwalaho, Yena i no mu daya, a teka wuhosi a nyika Dhavhidha, a n’wana wa Jese.+