Wura Go Sangula Ga Nyazimu

WA WU tiva nchumu wo sangula lowu Noa a nga maha loku yena ni ngango wakwe va humile hi lomu tarwini? I lo maha munyikelo ka Nungungulu. Wena wa zi kota ku mu wona na a maha lezo laha ka mufananiso lowu lahasi. Noa i lo maha munyikelo wa zihari kasi ku bonga Nungungulu hi lezi a nga ponisa ngango wakwe ntalweni wa hombe.

U alakanya lezaku Jehova i xalalisilwe hi munyikelo lowo? Ina, i xalalisilwe. Kambe yena i lo tsumbisa Noa a ku cima i wa nga ta ha hahlula misava hi ntalo.

Hi xikhatanyana a misava yi lo woma. Noa ni ngango wakwe va lo sangula wutomi giswa le handle ka taru. Nungungulu i lo va katekisa a tlhela aku ngalo: ‘Mu fanele kuva ni vana vo tala. Mu fanele ku engetelekana kala vanhu va aka misaveni yontlhe.’

Kanilezi anzhako ka xikhati, loku vanhu vazwa ku wulawulwa hi ntalo wa hombe, kuzilava va wa ta chava lezaku a ntalo wo kota lowo wu wa ta tlhela wu maheka. Hizalezo Nungungulu i lo veka nchumu lowu wu nga wa ta alakanyisa vanhu hi xitsumbiso xakwe xa ku nga ha nehi kambe ntalo misaveni yontlhe. Wa xi tiva a ku xini a nga xi veka kasi ku va alakanyisa? I wura ga nyazimu.

A wura ga nyazimu gi tala ku woneka tilweni loku a gambo gi woninga na vula ya ha hi kuna. A wura ga nyazimu ga zi kota kuva ni mivala yo tala yo saseka. U tshuka u gi wona? Wa gi wona legi laha ka mufananiso?

Lezi hi zona zi nga wuliwa hi Nungungulu: ‘Nza tsumbisa a ku cima vanhu ni zihari va nga ta ha loviswa hi ntalo. Nza veka wura ga mina ga nyazimu lomu marefini. Loku a wura ga nyazimu gi huma, nzi ta gi wona nzi alakanya a xitsumbiso xa mina.’

Hizalezo, loku u wona wura ga nyazimu, zini gi ku alakanyisako? Ina, xitsumbiso xa Nungungulu xa ku yena cima a nga ta ha lovisa misava hi ntalo wa hombe.