Tshama nkoveni wa Jehova wa wuvikeli

1, 2. I yimpi muni ya lisine yi to sangula lokuloku, niku zini lezi a malanza ya Nungungulu ma to kala ma nga hi na xilaveko xa ku zi maha?

HI 30 ka Outubro wa 1938, a vanhu vo tala nguvu le Estados Unidos va wa kari va ingisela a hlakano wo tiveka nguvu ka xitichi xa radiyu. A xipanze lexi va nga kari va xi ingisela ka gambo lego ku wa hi karingani yi nga yelana ni novela ya zilo za siensia yi nga hi ni hloko ya mhaka “A yimpi ya matiko.” (The War of the Worlds) Laha va nga kari va ingisela, a vahlakani va longoloko lowo va lo tivisa lezaku ku wa hi ni zivangwa zi ngata hi ka xirenzelekwani xi vitwako Marte lezi zi nga dumela a misava kasi zi yi lovisa. Hambu lezi ku nga tivisilwe lezaku a longoloko lowo wu wa hi hlakanyo ntsena, a vaingiseli vo tala va lo alakanya lezaku lezo zi wo maheka futsi, zonake va sangula ku chava. A vanwani va zile va maha zokari na va zama ku ti vikela ka zilo zi nga hiko kona.

² Masikwini ya hina, ku na ni yimpi ya lisine yi to sangula lokuloku. Kanilezi, a vanhu a va mahi nchumu hi kuta ka yona. A yimpi leyo, a yi profetiwangi lomu ka novela ya siencia, kanilezi, yi profetilwe lomu ka Biblia, a Mhaka yi pimisilweko ya Nungungulu. A yimpi leyo i Har–Magedoni — ku nga yimpi leyi Nungungulu a tolwa ni tiko legi. (Kuv. 16:14-16) Yimpini leyi, a vanhu va Nungungulu laha misaveni va nga tava ni xilaveko xa ku ti vikela ha voce ka valala va tako hi ka xirenzelekwani xinwani. Kanilezi, Jehova i ta hi ponisa hi ndlela yo hlamalisa hi ku tirisa ntamu wakwe.

3. Xiprofeto muni hi to wulawula hi xona, niku hikuyini gi nga ga lisima ka hina?

³ A xiprofeto xa Biblia xi tsalilweko ka Zakaria xipimo 14 xi yelana nguvu ni yimpi ya Har–Magedoni. Hambu lezi xi tsalilweko ka 2.500 wa malembe ma hunzileko, a xiprofeto lexi xa khumba a wutomi ga hina. (Rom. 15:4) A zilo zo tala zi nga ka xiprofeto lexo zi yelana ni xiyimo xi khumbako vanhu va Nungungulu kusukela laha a Mufumo wa wuMessia wu nga yimiswa le tilweni hi 1914, ni zilo zo tsakisa zi to maheka lokuloku. A nchumu wa lisima wu kumbukiwako ka xiprofeto lexi i “nzhelelo wa hombe” kutani nkova wa hombe wu humelelako, ni kutsutsuma ka “mati ya xibuka xi nga pswhiko” kutani mati ma hanyako. (Zak. 14:4, 8) A nkova lowu wu na ni ntiro wa lisima nguvu mhakeni ya kuvikela a vakhozeli va Jehova. Loku hi zwisisa lezi hi nga vunekisako zona hi mati lawo, hi nga ta wona ntsena lezaku hi na ni tora ga mati lawo, kanilezi hi ta tlhela hi ma lava kunwa futsi. Hikwalaho, zi na ni lisima nguvu a kuva hi chela nguvu kota hi xiprofeto legi. — 2 Ped. 1:19, 20.

“A SIKU GA JEHOVA” GI SANGULA

4. (a) Xana a “siku ga Jehova” gi sangulile rini? (b) Zini lezi a vakhozeli va Jehova va nga xumayela hi makume ya malembe mahlweni ma 1914, niku zini lezi a matiko gi mahileko?

⁴ A xipimo 14 xa bhuku ga Zakaria xi sangula hi ku wulawula hi “siku ga Jehova.” (Gonza Zakaria 14:1, 2.) Xini a siku legi ke? I “siku ga Hosi,” legi gi sangulileko a xikhati lexi “a mufumo wa misava” wu ngava ‘mufumo wa Hosi ya hina, na Kristu wa yona.’ (Kuv. 1:10; 11:15) A siku legi gi sangulile hi 1914 a xikhati lexi a Mufumo wa wuMessia wu nga pswaliwa le tilweni. Hi makume ya malembe mahlweni ka 1914, a vakhozeli va Jehova va wa xumayela ka matiko lezaku a kumbhela ka “xikhati xa vamatiko” ku wa ta chikela hi 1914, ni lezaku ku wa ta sangula xikhati xa zikarato za hombe misava yontlhe. (Luka 21:24) Makunu a matiko ma te yini? Wutshanwini ga ku ingisa xitlharihiso lexo, a varangeli va politika ni va wukhongeli va lo kanyisa va tlhela va xanisa a vatotilweko lavo va nga hi vavangeli vo hiseka. Hi ku maha lezo, a varangeli lavo va tiko va lo poyila Nungungulu wa Ntamu-Wontlhe, hakuva a vatotilweko lava va Mufumo va yimela “Jerusalema ga le tilweni” — a Mufumo wa wuMessia — legi va mahako xipanze xa wona. — Maheb. 12:22, 28.

5, 6. (a) Zini zi nga profetilwe lezi a matiko ma nga mahela a “muti” ni ‘zisumbulwa’ za wona? (b) Hi vamani “a misalela ya vanhu”?

⁵ Zakaria i profetile lezi a matiko ma nga wa ta zi maha. I te ngalo: “A muti [Jerusalema] wu ta tekiwa.” “A muti” wu yimela a Mufumo wa wuMessia wa Nungungulu. Laha misaveni, wu yimelwa hi ‘zisumbulwa’ za wona, a misalela ya maKristu ma totilweko. (Fil. 3:20) Xikhatini xa Yimpi yo Sangula ya Misava, a ziro za xipanze xa laha misaveni xa hlengeletano ya Jehova lezi zi nga hi ni wutihlamuleli ga hombe nguvu zi lo “tekiwa,” kutani ku khonwa, zi roroviswa zi ya valelwa paxweni le Atlanta, Georgia, Estados Unidos de América. ‘A tiyindlu ti lo phangiwa’ hakuva a vanhu lavo vo ranza kululama ni vanwani vanhu vo tsumbeka va lo xaniswa va tlhela va mahelwa tihanyi. A valala lavo va lo xakela a tshomba leyi a misalela yi nga hi nayo hi ku beletela a mabhuku ni ntiro wabye kota vaxumayeli va Mufumo.

⁶ Hambu lezi a vanhu va Nungungulu va nga hi va tsongwani, va nga kombiswi xichawo, va tlhela va xaniswa hi valala vabye, a vakhozeli va lisine va wa nga ta tshuka va loviswa. Ku’ve ni “misalela ya vanhu,” ku nga vatotilweko lava va nga simama ku tsumbeka va ala ku “humeswa mutini.”

7. Xana a mahanyela yo tsumbeka ya Timboni ti totilweko ta Nungungulu ta kale ma va nyikisa kuyini xikombiso a vakhozeli va lisine va nyamutlha?

⁷ Xana a xiprofeto lexi xi tatisekile hi kumbhelela kumbheleni ka Yimpi yo Sangula ya Misava? Ahihi. A matiko ma wa ha ta vukela a misalela ya vatotilweko ni vanghana vabye lava va rinzelako ku hanya laha misaveni. (Kuv. 12:17) Hi xikombiso, a vamakabye va xanisilwe nguvu xikhatini xa Yimpi ya Wumbiri ya Misava. A mahanyela yo tsumbeka ya Timboni ti totilweko ta Nungungulu ta kale ma nyika ntamu a malanza ya Nungungulu nyamutlha lezaku ma timisela ni wihi nzhingo ma kumanako nawo, zinwe ni ku kanetwa hi maxaka ma nga kholwiko, vatiri-kulobye, kutani zigonzani-kulobye lezi zi ma tseketselako hi kota ya kukholwa ka wona. (1 Ped. 1:6, 7) Kani va hanya kwihi, a vakhozeli va lisine va ti yimisele ku ‘yima vaku nde moyeni munwe’ va ‘nga dzukiswi ha nchumu hi valala vabye.’ (Fil. 1:27, 28) Hambulezo, xana a vanhu va Jehova va ta vikeliswa kuyini na va hanya tikweni gi va vengako? — Joh. 15:17-19.

JEHOVA I MAHA MIKOVA YA HOMBE

8. (a) Xana lomu ka Biblia a zitsunga zi nga ha yimela yini? (b) A “xitsunga xa maOliva” xi yimela yini?

⁸ Kota lezi Jerusalema — “a muti” — gi yimelako Jerusalema ga le tilweni, ‘a xitsunga xa maOliva, xi nga kusuhani ni Jerusalema,’ xonawu xi fanele kuva xo fananisa. Makunu, a xitsunga lexo xi yimela yini? Xi ta “avanyeka hi laha xikari” xi maha zitsunga zimbiri hi ndlela muni? Hikuyini Jehova a va vitanako ku “zitsunga za mina”? (Gonza Zakaria 14:3-5.) Lomu ka Biblia, a zitsunga zi nga ha wula mifumo. Ahandle ka lezo, a makatekwa ni kuvikelwa zonawu za tshuka zi zwananiswa ni xitsunga xa Nungungulu. (Tis. 72:3; Isa. 25:6, 7) Hikwalaho, a xitsunga xa maOliva laha Jehova a yimako kona hi le mutsuwuka-gambo wa Jerusalema ga laha misaveni xi yimela wuhosi ga Jehova wuakweni gontlhe, ku nga wuhosi gakwe gi hunzeleleko kutlakuka.

9. Xana “a xitsunga xa maOliva” xi avanyeka hi ndlela muni?

⁹ Makunu a kuavanyeka ka xitsunga xa maOliva ku wula yini? A xitsunga lexi xi nga mutsuwuka-gambo wa Jerusalema, xi avanyeka hi ndlela ya ku Jehova i yimisa wuhosi ginwani, ga wumbiri. A wuhosi legi ga wumbiri Mufumo wa wuMessia mandleni ya Jesu Kristu. Hi xigelo lexo Jehova a wulako zitsunga lezi za zimbiri zi humelelako hi kuavanyeka ka “xitsunga xa maOliva” aku, “zitsunga za mina.” (Zak. 14:4) Zontlhe za zimbiri zakwe.

10. Xana a ‘nkova wa hombe’ lowu wu nga xikari ka zitsunga zimbiri wu yimela yini?

¹⁰ A xikhati lexi a xitsunga lexi xo fananisa xi avanyekako, a khihlanya ginwe gi tshinela nwalungu legi ginwani gi tshinela dzongeni, a mikonzo ya Jehova yi simama kuva hehla ka zitsunga zontlhe za zimbiri. “A nzhelelo wa hombe” kutani a nkova, wu humelela lahasi ka mikonzo ya Jehova. A nkova lowu wo fananisa wu yimela wuvikeli ga Nungungulu, ku nga laha a malanza ya Jehova ma kumako kona wuchavelo lahasi ka wuhosi gakwe ga wuako gontlhe ni ka Mufumo wa wuMessia wa N’wana wakwe. Jehova i ta maha zontlhe kasi a wukhozeli gi basileko gi nga tshuki gi lobyiswa. Xana a xitsunga xa maOliva xi avanyekile rini? Xi avanyekile a xikhati lexi a Mufumo wa wuMessia wu nga yimiswa kumbheleni ka Xikhati xa Vamatiko hi 1914. Makunu a vakhozeli va lisine va sangulile rini ku tsutsuma va ya fihlala nkoveni lowu wo fananisa?

A VANHU VA SANGULA KU TSUTSUMA VA YA FIHLALA LOMU NKOVENI!

11, 12. (a) Xana a vanhu va sangulile rini ku tsutsumela nkoveni wo fananisa? (b) Xini xi kombako lezaku Jehova wa vikela vanhu vakwe?

¹¹ Jesu i tlharihisile valanzeli vakwe aku: “Mu ta vengiwa hi matiko wontlhe hi kota ya vito ga mina.” (Mat. 24:9) A livengo lelo li sangulile kuva la hombe nguvu kusukela 1914, a xikhati lexi a masiko yo gumesa ya mafambisela lawa ya zilo ma nga sangula. Hambu lezi a misalela ya vatotilweko yi vukelweko hi valala va yona xikhatini xa Yimpi yo Sangula ya Misava, a vanhu vo tsumbeka lava va nga wumba ntlawa lowu a va loviswangi. Hi 1919, va lo tlhatlhiswa wukhongelini ga mawunwa — Babuloni loyi wa Hombe. (Kuv. 11:11, 12)a Ku’ve ka xikhati xalexo futsi a vanhu va nga sangula ku tsutsuma va ya fihlala nkoveni wa zitsunga za Jehova.

¹² A nkova wa wuvikeli wa Nungungulu wa ha simama ku vikela a vakhozeli va lisine misaveni yontlhe kusukela 1919. Matikweni yo tala, a ntiro wa kuxumayela wa Timboni ta Jehova ni mabhuku yabye zi kari zi beletelwa hi makume ya malembe. Kala nyamutlha ka ha hi ni matiko lawa za ha beletelwako. Kani a matiko ma zama hi ndlela muni, wona ma nga ta tshuka ma zi kota ku fuvisa a wukhozeli ga lisine! A woko ga Jehova ga ntamu gi ta simama kuva hehla ka vanhu vakwe. — Deut. 11:2.

13. Hi yihi ndlela ya ku simama nkoveni wa wuvikeli wa Jehova, niku hikuyini nyamutlha zi nga za lisima nguvu a ku maha lezo?

¹³ Loku hi namarela ka Jehova hi tlhela hi tiya hiku nde lisineni, yena ni N’wana wakwe, Jesu Kristu, va ta maha zipanze zabye, niku a ku na nchumu ge hambu munhu loyi Nungungulu a to mu tsika a hi ‘wutla canjeni Gakwe.’ (Joh. 10:28, 29) Jehova i ti yimisele ku hi mahela ni xihi xi lavekako kasi hi mu ingisa kota Hosi ya Hombe Wuakweni Gontlhe hi tlhela hi simama kuva vaseketeli vo tsumbeka va Mufumo wa wuMessia. Za lisima nguvu a kuva hi nga humi nkoveni wa wuvikeli, hakuva a nkova lowu wu tava ni xivuno xa hombe nguvu ka vakhozeli va lisine xikhatini xa kuxaniseka ka hombe loku ku tshinelako hi xihatla.

‘A SIKU GA YIMPI’ GA CHIKELA

14, 15. Xana lava va nga handle ka nkova wa hombe, va tava ka xiyimo muni “sikwini ga yimpi [ga Nungungulu]”?

¹⁴ Laha a siku ga ku a mafambisela lawa ya zilo ma loviswa ma yako ma chikela, Satani i taya a engetela mizamo yakwe ya ku vukela malanza ya Jehova. Hi kulanzela ku ta chikela ‘siku ga yimpi ya Nungungulu’ laha a tolwa ni valala vakwe. Jehova i ta maha lezaku a siku lego giva khati ga Satani go gumesa ga ku vukela vanhu va Nungungulu. Ka siku legi, Jehova, a Hosi ya Hombe Wuakweni Gontlhe, i ta hlula ku hunza lezi a hlulisileko zona ‘masikwini wontlhe ya tiyimpi’ ti hunzileko. — Zak. 14:3.

¹⁵ Ahati lava va nga handle ka ‘nkova wa hombe’ wa wuvikeli ke, xana va tava ka xiyimo muni sikwini legi ga yimpi ya Nungungulu? Va nga tava ni “kuwonekela” ko hlawulela, ku nga xikombiso xa ku tsakelwa hi Nungungulu. Sikwini lego ga yimpi ga ha tako, “a mahaxi, ni mamula, ni makameli, ni timbongola ni zontlhe zihari” — zi nga zilo lezi a matiko ma lwako hi zona — zi nga tava ni xivuno. A matlhari yabye ma ta “pfhupeliswa;” ma nga ta ha tira, a ku khwatsi hi loku ma lo woma hi xirami. Jehova i ta tirisa “ntungu” kambe. Kani a ntungu lowu wu tava wa xiviri kani wu nga tava wa xiviri, wona wu ta va vangela kuchava ka hombe nguvu. Sikwini lego, “a mahlo yabye . . . ni tirimi tabye ti ta bola” hakuva a valala lavo va nga ta zi kota ku hi lovisa niku va nga ta ha mu kurukatela kambe Nungungulu. (Zak. 14:6, 7, 12, 15) A ku na lexi xi to pona ku hahlulwa misaveni leyi. Lava va tova tlhelweni ga Satani sikwini lego ga yimpi va tava va tele nguvu. (Kuv. 19:19-21) “Lava va delweko hi Jehova va ta mbambamela misaveni kusukela mbhirini kala ka yinwani mbhiri ya misava.” — Jer. 25:32, 33.

16. Lezi a siku ga kulwa ga Nungungulu gi tshinelako, ziwutiso muni hi faneleko ku ti maha, niku zini zi tova za lisima ku maha?

¹⁶ Xontlhe xikhati a yimpi yi vanga kuxaniseka, hambu ka lava va gumesako hi ku hlula. A zakuga zi nga tshuka zi kala. A titshomba ti nga tshuka ti lova. A vanhu va nga sangula kuva ni mahanyela ya lahasi. A kutlhatlheka ka vanhu ku nga sangula ku hunguka. Loku lezo zi hi mahekela, hi ta kuyini? Xana hi ta tshoveka mihlana? Hi ta tsika kukholwa ka hina hi kuzwa ku xaniseka ke? Hi ta mbhelelwa hi kutsumba ka hina kontlhe, hi vumala ni xo maha hi kota ya gome? Handle ko kanakana, xikhatini xa kuxaniseka ka hombe zi tava za lisima nguvu a ku simama hi tsumba a ntamu wa Jehova wa ku hi ponisa hi tlhela hi nga humi nkoveni wa Jehova wa wuvikeli! — Gonza Habakuka 3:17, 18.

“A MATI YA XIBUKA XI NGA PSWHIKO MA TA HUMA”

17, 18. (a) Zini a mati ma hanyako? (b) Xana a “bimbi ga Muhuma-gambo” ni “bimbi ga Mupela-gambo” ma yimela yini? (c) Loku u yima uku tse, u alakanyela lezi za ha tako, zini u ti yimiseleko ku maha?

¹⁷ Loku ku hunzile a Har–Magedoni, ku ta khulunga “mati ya xibuka xi nga pswhiko” kutani mati ma hanyako kusukela xitshanwini xa Mufumo wa wuMessia. A “mati ya xibuka xi nga pswhiko” kutani mati ma hanyako malulamiselo lawa Jehova a ma mahako kasi ku hi nyika wutomi. A “bimbi ga Muhuma-gambo” ku wuliwa a Bimbi Gofa kutani Mar Morto, a “bimbi ga Mupela-gambo” i Bimbi ga Mediteraneyo. Wontlhe mabimbi lawa, ku wuliwa vanhu. A Bimbi Gofa gi yimela khwatsi lava va nga xilahleni xa vanhu vontlhe. Kota lezi a Bimbi ga Mediteraneyo gi teleko hi wutomi, gi yimela khwatsi a “xidlemo xa tsanza-vahlayi” xa vanhu lava va to pona yimpini ya Har–Magedoni. (Gonza Zakaria 14:8, 9; Kuv. 7:9-15) Hikwalaho, a mitlawa leyi ya yimbiri yi ta vuneka hi ku tlhatlhiswa kufeni loku va ku kumileko ka Adamu a xikhati lexi va to ya va tima tora gabye hi mati ma hanyako yo fananisa, kutani “congo wa mati ya wutomi.” — Kuv. 22:1, 2.

¹⁸ A xikhati lexi Jehova a to lovisa a tiko legi, i ta hi ponisa a tlhela a hi vuna ku nghena misaveni yakwe ya yiswa yo lulama. Hambu lezi a matiko ma hi vengako, ngha hi ti yimisela ku simama hi tsumbeka kota vaseketeli va Mufumo wa Nungungulu, ni ku tshama nkoveni wa wuvikeli wa Jehova.