A kuvuka ka Jesu hi ka vafileko ku neha wutomi ga pinzukelwa!

A KUVUKA ka Jesu hi ka vafileko a hi ximaho xa kale ntsena xi nga hi vuniko hi nchumu inyamutlha. Mupostoli Paule i kombile a lisima la kona a xikhati a nga tsala lezi: “Kristu i vukile hi ka vafileko, hi yena matewula ya vona lava va etleleko. Hakuva kota lezi a kufa ku ngata hi munhu, lezo kambe a kuvuka ka vafileko ku tile hi munhu. Hakuva khwatsi hi lezi vontlhe va fako hi ka Adamu, hizalezo kambe hi ka Kristu vontlhe va ta mahiwa va hanya.” — 1 Va Le Korinte 15:20-22.

Jesu i vuxilwe hi ka vafileko hi 16 ka Nisani wa 33 Nguveni ya Hina, ku nga siku galegi a vaJuda va nga nyikela hi gona a mihanzu yo ranga mahlweni ka Jehova Nungungulu wutshanwini go basa ga tempeli le Jerusalema. Hi ku wula lezaku Jesu hi yena matewula, Paule i kombile lezaku ku wa ta vuxiwa vanhu vanwani hi ka vafileko.

A magezu lawa Paule a nga ma wula hi kulanzela ma tlhamusela lezi zi kotekako hi kota ya kuvuka ka Jesu hi ka vafileko. Paule i te ngalo: “Kota lezi a kufa ku ngata hi munhu, lezo kambe a kuvuka ka vafileko ku tile hi munhu.” Hontlheni hafa hi kota ya xionho ni kungambheleli loku hi nga hunziselwa hi Adamu. Kanilezi, hi ku nyikela a wutomi gakwe go mbhelela kota nzhiho, Jesu i vululile ndlela ya kuva a vanhu vontlhe va tlhatlhiswa ka kuonha ni kufa hi ku vuxiwa hi ka vafileko. Paule i lo songa khwatsi a mhaka hi ku wula lezi ka Va Le Roma 6:23: “A hakhelo ya kuonha hi kufa, kanilezi a xinyikiwo xa Nungungulu hi wutomi ga pinzukelwa ha Jesu Kristu a Hosi ya hina.”

Jesu wutsumbu i tlhamusele lezi hi vunekisako zona hi kufa kakwe ni kuvuka kakwe. Na a wula yena wutsumbu, Jesu i te: “N’wana wa munhu i fanelwe ku tlakuswa; aku kasi ni wihi a kholwako ka yena ave ni wutomi ga pinzukelwa. Hakuva Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.” — Johani 3:14-16.

Hi nga alakanyela — a ku hanya wutomi gi nga mbheliko, na u ngazwi kubayisa, u nga xaniseki, ge hambu ku rila! (Kuvululelwa 21:3, 4) Loko kutsumba ko tsakisa hakunene! A tlhari yo kari yi zi tlhamusela hi ndlela leyi: “A zilahla zi alakanyisa vanhu lezaku a wutomi gi komile, kanilezi a kuvuka ka vafileko ku komba lezaku a kufa ka xikhatanyana.” Kunene a kuvuka ka Jesu hi ka vafileko ku neha wutomi!