Va lo ti hendleleta hi kuziranza — le México

ZA TSAKISA nguvu a ku wona vaswa va Timboni na va olovisa wutomi ga vona kasi va kota ku maha zotala ntirweni wabye wa kuxumayela. (Mat. 6:22) Zini va cicako wutomini gabye ke? Zikarato muni va kumanako nazo? Kasi hi tiva mihlamulo ya kona, a hi woneni lezi zi wuliwako hi vokari va tirako le México ka xikhati lexi.

“HI WONILE LEZAKU HI WA FANELE KU CICA WUTOMI GA HINA”

Dustin na Jassa zipswalwa za le Estados Unidos, lava va chadileko hi Janeiro wa 2007. Xikhatanyana anzhako ka muchado wabye, va zi kotile ku tatisa mixuvo yabye va nga yi rinzela hi mahlo yo pswhuka — ku nga hi ku ti xavela a ngalava lezaku va hanya ka yona lembe gontlhe. A ngalava yabye va wa yi boheli ko gamakana ni Astória, Oregon, Estados Unidos, gi nga doropa go saseka nguvu gi ranzelweko hi zitsungana zi teleko hi makhuho ni zitsunga za hombe zi teleko hi hunguva, gi nga wutshamu gi nga kusuhani ni Bimbi ga Pacífico. Dustin i ngalo: “A wutshamu lego gi wa hi ga gi nene gi tlhela gi hlamalisa hi kusaseka!” A patswa lowu wu wa tizwa na wu hanya wutomi go olova, na va khegela ka Jehova. Va wa ti byela lezi, ‘a ku hunza zontlhe, hi hanya lomu ka ngalava ya 7,9 wa timetro, hiya ntirweni wa kutihanyisa hi xikhatanyana, hi vunetela a bandla ga lirimi-limbe, ka zikhati zokari hi tira kota maphayona yo vunetela.’ Kanilezi, anzhako ka xikhatanyana, va lo wona lezaku va wo ti kanganyisa. Dustin i ngalo: “Wutshanwini ga ku vunetela a bandla, hi wa mbheta xikhati xo leha na hi lungisa a ngalava ya hina. Hi lo gumesa hi wona lezaku loku hakunene hi lava ku rangisa Jehova, hi wa fanele ku cica wutomi ga hina.”

Jassa i engeta aku: “Na nzi nga se chada, nzi wa hanya le México laha nzi nga hi ka bandla ga xiNgiza. Nzi wa xalala nguvu hi ku tira ka bandla lego, niku nzi wa zi xuva nguvu a ku tlhela.” Kasi ku tiyisa mixuvo yabye ya ku tira matiko wundle, Dustin na Jassa va lo sangula ku lonzowota a Wukhozeli gabye ga Ngango lezaku va gonza matshango ya vamakabye va xinuna ni va xisati lava va rurileko vaya ka matiko lawa a masimu ma longileko ku tshovelwa. (Joh. 4:35) Dustin i ngalo: “Hinawu, hi wa lava ku kuma litsako lelo.” A xikhati lexi a vanghana vabye le México va nga va tivisa lezaku ku wa hi ni ntlawa muswa wu nga lava xivuno, Dustin na Jassa va lo maha xiboho. Va la tsika mitiro yabye, va xavisa a ngalava yabye zonake va rura vaya México.

“NCHUMU WA WU NENE KA YONTLHE YI MAHEKILEKO WUTOMINI GA HINA”

Dustin na Jassa va loya tshama doropeni ga Tecomán — gonawu gi nga hi kusuhani ni Bimbi ga Pacífico kanilezi, gi nga ka pfhuka wa 4.345 wa tikilometro kuya dzongeni ka Astória. Dustin i wula lezi: “A ku hambana ni le hi nga hi kona, ku nga wutshamu go pepa khwatsi gi nga ni zitsunga zo saseka, hi lomu ka mumu wa xingangalanganga, niku hi lomu xikari ka mifolonwa yaku ne a hi ku woni lomu yi gumelwako kona.” A kusanguleni, va wa nga yi kumi mitiro. Hi kota ya ku vumala mali, va waga matsawu siku ni siku. Jassa i ngalo, “Laha a zakuga za hina zi nga sangula ku hi kolwa, a zigonzani za hina za Biblia zi lo sangula ku hi nyika, mamanga, mikova, mapapakayi, ni minzhava ya mafolonwa!” Hi kufamba ka xikhati, a patswa lowu wu lo sangula ku tira hi Internet ka xikola xi nga tirisa xiTaiwan. A mali leyi va holako ntirweni lowu makunu va yi tirisa kasi ku ti hlayisa hi yona.

Xana Dustin na Jassa va ti zwisa kuyini hi wutomi legi va gi hanyako zalezi ke? Ve ngalo: “A ku rura hita laha hi wona a nchumu wa wu nene ka yontlhe yi mahekileko wutomini ga hina. A kuzwanana ka hina na Jehova ni ka hina vambiri ku kulile ku hunza lezi hi tshukileko hi zi alakanya. Siku ni siku hi maha zilo zo tala na hi hi zinwe — kuya ntirweni wa simu, ku bhulisana hi lezi hi nga zi vunisako zona a zigonzani za hina za Biblia, ni ku ti longisela mitlhangano. Xinwani kambe, a ha hi na kukarateka loku hi nga hi nako kale.” Va engeta vaku: “Makunu ha zi zwisisa khwatsi lezi hi nga kala hi nga zi zwisisi — a kutsumbeka ka xitsumbiso xi nga ka Tisimu 34:8, ‘Ringani mu wona lezaku Jehova mu nene.’”

MAZANAZANA YA VATIRI VA KUZIRANZA — XINI XI VA KUCAKO KE?

Ku na ni xipimo xa 2.900 wa vamakabye va xinuna ni va xisati lava va rurileko va ya le México kasi ku ya tira ka matshamu lawa ku nga ni xilaveko xa hombe xa vahuweleli va Mufumo. Ka ntlawa lowu, ku na ni magwenza ni mipatswa ya vatekani, lava a kutala ka vona va nga kwalomo ka 20 ni 30 wa malembe. Hikuyini a Timboni tontlhe leti ti hlawulileko a ntiro lowu wo kala wu nga olovi ke? A xikhati lexi a vokari vabye va nga mahiwa xiwutiso lexi, va wulile zigelo-tshinya zinharu. Va te yini?

Kasi ku kombisa liranzo hi Jehova ni vanhu-kulori. Leticia i bapatizilwe na a hi ni 18 wa malembe. I ngalo: “A xikhati lexi nzi nga ti hendleleta ka Jehova, nzi zi zwisisile khwatsi lezaku nzi wa fanele ku mu tirela hi mbilu ya mina yontlhe. Hikwalaho, kasi ku kombisa lezaku Jehova nzi mu ranza hi mbilu ya mina yontlhe, nzi zi wonile zi hi chukwana ku tirisa xikhati ni ntamu wa mina ntirweni wakwe.” (Mar. 12:30) Hermilo, a chadileko na Leticia, i rurile a ya tira laha ku nga ni xilaveko xa hombe xa vahuweleli va Mufumo na a hi kwalomo ka 20 wa malembe. I ngalo: “Nzi wonile lezaku a ku vuna vanwani lezaku va xura hi tlhelo ga moya yi wa tava yona ndlela ya yi nene nguvu ya ku kombisa liranzo la mina hi muakelane.” (Mar. 12:31) Hikwalaho, i lo rura a ya hanya ka xidoropana, a tsika Monterrey, gi nga tiko go ganya laha a nga tira bhanko a tlhela a hanya wutomi ga gi nene nguvu.

Kasi kuva ni litsako la lisine. Xikhatanyana nzhako ka kubapatizwa kakwe, Leticia i fambile zinwe ni makabye wa xisati a tirako kota phayona hi xikhati xo leha, va ya tira ka xidoropana xa le kule laha va nga ya xumayela hi hweti. Leticia i zi alakanya hi magezu lawa: “Nzi hlamalile nguvu. A ku wona lezi a vanhu va nga ma amukelisa zona mahungu ya Mufumo zi nzi nyikile litsako la hombe nguvu. Kumbheleni ka hweti leyo, nzi lo ti byela lezi, ‘Lezi hi zalezi nzi nga zi lava futsi!’” Essly, a makabye wa xisati a nga chadangiko a nga kwalomo ka 20 wa malembe, yenawu i kucilwe ku nghena ka ntiro lowu hi litsako leli a li wonileko. A xikhati lexi a nga hi xikola sekundaria, i tivene ni Timboni to hiseka leti ti nga tira lomu ku nga hi ni xilaveko xa hombe xa vahuweleli va Mufumo. I ngalo: “A ku wona litsako lomu tinghoheni ta vamakabye lavo va xinuna ni va xisati, zi nzi mahile nzi navela ku kuma litsako lo fana ni leli labye.” A vamakabye vanwani va xisati va mahile zo fana ni lezi Essly a zi mahileko. Kunene, le México ku na ni vamakabye va xinuna ni va xisati vo hunza 680 lava va tirako lomu ku nga ni xilaveko xa hombe. Handle ko kanakana, va nyika xikombiso xi nene ka vaswa vanwani va tanga yabye.

Kasi kuva ni wutomi go tsakisa ni ku hanyela xo xi tiva. A xikhati lexi a nga mbheta xikola sekundaria, Essly i lo nyikwa bolsa ya ku ya gonza universidade. A vaswa-kulobye va lo mu kuca ku vumela kasi a hanya wutomi go fana ni ga vanhu laha va yileko — ku nga kuya universidade, va kuma ntiro wa ku hola timali, va xava mova, va tlhela va enza. Kanilezi, a nga lanzelangi a wusungukati gabye. Essly i ngalo: “A kutala ka vanghana va mina va maKristu va hlongolisela a zilo lezi, niku nzi wonile lezaku va wa nga ha yi nyiki nguvu lisima a mixuvo ya moya. Nzi wonile kambe lezaku hi magumo va wa lwisana ni zikarato laha va nga kari va ti nyiketela nguvu ka zilo za tiko. Nzi wa lava ku tirisa wuswa ga mina kasi ku tirela Jehova hi kumbhelela.”

Essly i lo ti susela tikurso tinwani leti ti mu vunileko ku kuma ntiro wa kutihanyisa na a tiro kota phayona, zonake a gumesa a rura aya laha ku nga ni xilaveko xa hombe xa vahuweleli va Mufumo. I lo tlhela a ti karatela ku gonza lirimi li nga wulawulwa hi vaOtomis ni vaTlapaneco. Loku a cuwuka nzhako ka malembe manharu ma hunzileko, na a xumayela ka wutshamu legi ga le kule, i ngalo: “A ku tira lomu ku nga ni xilaveko xa hombe, zi nzi nyika litsako la hombe nguvu zi tlhela zi nzi vuna ku hanyela xo xi tiva. A xa hombe ka zontlhe, zi tiyisa wunghana ga mina na Jehova.” Phillip na Racquel, a patswa wa le Estados Unidos, wu nga kwalomo ka 30 wa malembe, vonawu va vumela a mhaka leyi hi magezu lawa: “A zilo zi cicacica hi xihatla nguvu laha ka kuza a vanhu va tizwa na va welele a wutomi gabye lomu mandleni. Kanilezi, a ku tira lomu ha ha kumako vanhu va tsakelako kuzwa mahungu ya Biblia, zi hi maha hizwa ku hakunene xi kona hi mahako. A zo ku tsakisa!”

NDLELA YA KU LWISANA NI ZIKARATO ZA KU RURA

Handle ko kanakana, a ku ya tira laha ku nga ni xilaveko xa hombe xa vahuweleli va Mufumo zi na ni zikarato za zona. A xinwe xa zikarato lezi ku kuma mali ya kutihanyisa hi yona. Kasi u zi kota, u fanele ku ti yimisela ku cica uva ni wutomi go fana ni vahanyi va tiko lego. Verónica, a phayona gi tirako handle hi masiku yo leha, i zi tlhamusela hi magezu lawa: “Ka wutshamu go kari nzi tirileko ka gona, nzi wa bhika zakuga za baratu nzi xavisa. Ka wutshamu ginwani, nzi wa xavisa tinguwo ni ku tsemeta misisi. Ka xikhati lexi, nzi tira ku basisa miti ni ku gonzisa vapswali lava va sangulako ku kuma vana a ku bhula ni vanana vabye.”

A ku tolovela mikhuwo ni mahanyela yo hambana ni lawa ya wena zi ngava xikarato xa hombe nguvunguvu loku u ya hanya tlhaveni. Hi zalezi Phillip na Racquel va kumeneko nazo a xikhati lexi va nga ya tira ka xipanze lexi ku nga wulawuliwa xiNáuatle. Phillip i ngalo: “A mahanyela ya vanhu va lomo ma wa hambene nguvu ni lawa hi nga ma tolovele.” Makunu, zini zi va vunileko ke? I ngalo: “Hi wa cuwuka nguvu a zilo za zi nene xikari ka vanhu va vaNáuatle — a kuzwanana ka mingango yabye, kutsumbana kabye, ni wuhana gabye.” Racquel i engeta aku: “Hi gonzile zo tala hi ku tira ka wutshamu legiya ni ku tira zinwe ni vamakabye va xinuna ni va xisati.”

NDLELA YO TI LONGISELA

Loku u lava ku ya tira laha ku nga ni xilaveko xa hombe, zini u faneleko ku maha kasi ku ti longisela? A vamakabye va xinuna ni va xisati lava va mahileko ntiro lowu, ve ngalo: Na u nga se rura, sangula ku olovisa wutomi ga wena u tlhela u gonza ku hanya hi za zitsongwani. (Fil. 4:11, 12) Xini xinwani u nga mahako? Leticia i ngalo: “Nzi wa nga vumeli ntiro wu nga wa ta kurumeta lezaku nzi tira hi xikhati xo leha. Nzi wa lava ntiro wu nga wa ta nzi vumelela ku suka ni ka xihi xikhati — xontlhe xikhati xi nga lava ku suka.” Hermilo i ngalo: “Nzi lo gonza ku bhika, ni ku hlaza ni ku pasara.” Verónica i wula lezi: “A xikhati lexi nzi nga ha hi laha kaya ni vapswali va mina ni vamakabye va mina, nzi wa va vuna ku basisa laha kaya nzi tlhela nzi gonza ku bhika zakuga za baratu kanilezi zi nyikako nguvu wutomi. Nzi lo tlhela nzi gonza ku tirisa khwatsi mali.”

Levi na Amelia va le Estados Unidos, ku hunzako ntlhanu wa malembe ni manharu na va chadile va tlhamusela lezi a mukhongelo wu va vunisileko zona ku ti longisela lezaku va ya tira le México. Levi i wula lezi: “Hi mahile tikonta ta mali yi nga wa ta laveka kasi ku ya tira matiko-wundle hi lembe zonake hi kombela Jehova hi mukhongelo lezaku a hi vuna kuga mali yaleyo futsi.” Nzeni ka tihweti to kari, va zi kotile kuga mali yaleyi va nga yi wulile ka mukhongelo wabye, zalezo va lo tekela ku rura hi xihatla. Levi i ngalo: “Jehova i hlamulile xikombelo xa hina xo kongoma, hikwalaho makunu ku wa sele hina a ku hi maha lezi hi nga tsumbisa.” Amelia i engeta aku: “Hi wa alakanya lezaku hi ta ya tshama lembe ntsena, kanilezi makunu hi na ni ntlhanu wa malembe ni mambiri, niku ne a hi lori ku suka! A ku hanya lomu, zi hi nyika lungelo ga ku wona xivuno xa Jehova ha hoce. Siku ni siku ha wona wunene gakwe.”

Adam na Jennifer, a patswa wa le Estados Unidos wu tirako ka simu ga xiNgiza le México, vonawu va vunilwe nguvu hi mukhongelo. Va kuca lezi: “U nga rinzeli ku a zilo zontlhe zi lulama. Loku u xuva ku tira matiko-wundle, khongela hi zona, u tlhela u maha xokari maringano ni lezo. Olovisa wutomi ga wena, tsalela a hofisa ya ravi ya tiko legi u lavako ku ya tira kona, makunu loku u zi mahele tikonta, rura u famba!”a Loku u maha lezo u ta kuma zilo za zi nene ni makatekwa hi tlhelo ga moya.