“Nungungulu wa ranza loyi a nyikako na a xalele”

Xinyikiwo muni u xi ranzako nguvu? Handle ko kanakana, a kutala ka hina hi ranza xinyikiwo xa munhu a hi nyikako hi ku hi ranza wutshanwini ga ku hi nyika hi ku tiva lezaku i fanele ku hi nyika kutani ku kurumetwa. Mhakeni ya ku nyika, lezi zi kucako munhu ku maha lezo zi na ni lisima nguvu. Za lisima ka hina, niku za lisima nguvu ka Nungungulu. Wona magezu ma pimisilweko ya mupostoli Paule ma nga ka 2 Va Le Korinte 9:7.

Hikuyini Paule a tsalileko magezu lawa? I wa lava ku kuca maKristu ya le Korinte lezaku ma seketela a ntiro wa ku vuna a makholwa-kulobye ma nga hi ni xilaveko le Judia. Xana i zamile ku kurumeta a vaKorinte lezaku va humesa xokari? Ne ni kutsongwani! Kanilezi i tsalile lezi: “A munwe ni munwani a nyike kota lezi a xuvako mbilwini yakwe; na a nga karateki, kutani ku kurumetwa; hakuva Nungungulu wa ranza loyi a nyikako na a xalele.” A hi hlolisiseni khwatsi a magezu lawa.

“Kota lezi a xuvako mbilwini yakwe.” Mupostoli Paule i komba lezaku a muKristu wa lisine i nyika hi lezi a bohileko ku maha lezo “mbilwini yakwe.” Hikwalaho, a muKristu i ranga hi ku ehleketa hi zilaveko za makholwa-kulobye. A tlhari yo kari yi ngalo a gezu ga xiGreki legi gi hunzuluselweko ku “a xuvako” “gi nyika maalakanyo ya ku ranga u ti mahela xikungo.” Hikwalaho, a muKristu i ehleketa hi zilaveko za makholwa-kulobye a gumesa a ti wutisa ku a nga maha yini kasi ku ma vuna. — 1 Johani 3:17.

“Na a nga karateki, kutani ku kurumetwa.” Paule i komba manyikela mambiri ma kalako ma nga tiri ka maKristu — ku nyika na u ngurangura ni ku nyika hi ku kurumetwa. A gezu ga xiGreki legi gi hunzuluselweko ku ‘kukarateka’ hi kukongoma gi wula ku “kuswireka (kutani kubayiseka).” A bhuku go kari gi tlhamusela lezaku a munhu a nyikako na a karateka, kutani na a ngurangura, i nyika na a “bayisekile mbilwini yakwe hi kuzwa kuluza.” Loyi a nyikako hi ku kurumetwa i nyikela hi lezi a tivako lezaku i fanele ku maha lezo. Himani xikari ka hina loyi hakunene a xalalako hi ku teka a zilo ka munhu a mu nyikako na a ngurangura kutani ku kurumetwa ke?

“Nungungulu wa ranza loyi a nyikako na a xalele.” Paule i ngalo loku a muKristu a boha ku nyikela nchumu, i fanele ku nyikela na a xalele. Kunene, a litsako lita hi ku nyika na zi sukela mbilwini. (Mitiro 20:35) A zi karati ku wona a litsako la munhu a nyikako na a xalele. Hi lisine, a gezu ‘kuxalala’ gi komba zontlhe — lezi a ti zwisako zona ni lezi a wonekisako zona. A munhu a nyikako na a xalele wa khumba timbilu ta hina. Wa khumba a mbilu ya Nungungulu kambe. A wuhunzuluseli ginwani ga Biblia gi ngalo: “Nungungulu i ranza vanhu va ranzako ku nyika.” — Contemporary English Version.

A magezu ma pimisilweko ya mupostoli Paule ma tira kota tshinya ga nayo gi rangelako maKristu mhakeni ya ku nyika. Kani xikhati, kani i ntamu, kani titshomba hi nyikelako, ngha hi maha lezo hi kuziranza ni ku ngha zi hi tsakisa ku vuna vanwani, nguvunguvu lava va nga ni xilaveko. A ku nyika hi ndlela leyi zi nga ta hi nehela litsako ntsena, kanilezi zi ta hi maha hi ranziwa hi Nungungulu, hakuva i “ranza [munhu] a nyikako na a xalele.”