Nungungulu wazwa kubayisa — Hi nga maha yini kasi ku mu tsakisa?

Wa tshuka uzwa kubayisa laha ka kuza u rila? — a Kuzilava hontlheni. Kanilezi, ka zikhati zinwani a kubayisa loko a hi ka lomu mirini. A munhu a nga tshuka a wulawula zo biha hi hina, na zi nga hi lisine. Lezo za bayisa, a hi zona? —  Nungungulu yenawu wazwa kubayisa loku munhu a wulawula zo biha hi yena. A hi wulawule hi mhaka leyi hi wona lezi hi nga mahako kasi hi mu tsakisa wutshanwini ga ku mu zwisa kubayisa.

A Biblia gi wula lezaku a vanhu vo kari va nga wula lezaku va mu ranza Nungungulu va mu ‘zwisile kubayisa’ — va mu “tsanwisa” Nungungulu! A nga kona a zi kotako ku bayisa a miri wa Jehova Nungungulu, hakuva hi yena nyamintamu. Makunu a hi wone ku hikuyini Jehova a zwako kubayisa loku hi nga mahi lezi a zi lavako.

A vanhu vo sangula va vambiri lava Jehova a nga va vanga laha misaveni va mu zwisile kubayisa nguvu. A vanhu lavo va vambiri va vekilwe ka Paradise laha misaveni gi nga vitaniwa ku i ‘simu ga Edeni.’ Hi vamani vanhu lavo? —  Hi zona, ku’ve Adamu ku gumesa ku lanzela Eva. A hi wone a ku zini va nga maha kuza va mu zwisa kubayisa Jehova.

A xikhati lexi Jehova a nga va veka sinwini lego, i va rumile ku gi hlayisa. I va byelile kambe lezaku va pswala vana va tlhela va hanya sinwini lego va ngafi. Kanilezi, na va nga se pswala vana, ku lo maheka nchumu wo biha. Wa zi tiva a ku zini zi nga maheka? —  A ngelosi yo kari yi kalavele Adamu na Eva va maha lezi Jehova a nga va beletela ku maha. A hi wone lezi zi nga mahekisa zona.

A ngelosi leyi yi mahile nyoka yi ku khwatsi yo wulawula. Eva i lo zi tsakela lezi a nga zizwa — a nyoka yi no mu byela lezaku i wa ta ‘fana na Nungungulu.’ Hikwalaho, i mahile lezi yi nga mu byela. Wa zi tiva ku zini a nga maha? — 

Eva i loga mihanzu ya sinya leyi Jehova a nga byelile Adamu lezaku va ngagi. Na a nga se vanga Eva, Nungungulu i byelile Adamu aku: “U ngaga tontlhelele tisinya ti nga lomu sinwini hi matsenya; kanilezi a sinya ya ku tiva kusaseka ni kubiha u nga yigi; hakuva a siku lego u ta nga yiga, u tafa.”

Eva i wa wu tiva a nayo lowu. Hambulezo, i yi cuwukile nguvu a sinya leyo, a gumesa a wona lezaku yi “sasekile a kuva yi giwa, ni ku naveleka kucuwukekeni, . . . i lo khaya a mihanzu ya kona a yiga.” I no gumesa a nyika Adamu, “yenawu i loga.” U alakanya ku hikuyini a gileko? —  Hi ku Adamu i wa mu ranza nguvu Eva ku hunza Jehova. I hlawulile ku tsakisa Eva wutshanwini ga ku tsakisa Nungungulu. Kanilezi, a ku tsakisa Jehova za lisima nguvu ku hunza ku tsakisa munhu munwani!

Wa yi alakanya a nyoka leyi yi nga wulawula na Eva? A ku fana ni lezi a munhu a zi kotako ku maha xibhonekana xi ku khwatsi xo wulawula, i kona a nga maha nyoka yi ku khwatsi yo wulawula. I gezu ga mani gi nga huma hi laha ka nyoka? —  I gezu ga “nyoka leyi ya kale, yi tibyako Muhlevi na Satani.”

Wena ke, u nga maha yini kasi ku tsakisa Jehova? —  U nga mu tsakisa hi ku maha zilo zi mu tsakisako. Satani i wula lezaku a nga djikisa vanhu vontlhe va maha lezi yena a zi lavako. Hikwalaho, Jehova i hi byela lezi: “Nwananga, tlhariha u maha a mbilu ya mina yi tsaka; kasi nza fela ku mu hlamula loyi a nzi rukako.” Satani i ruka Jehova, kutani ku wulawula kubiha hi yena. I wula lezaku a nga djikisa vanhu vontlhe kasi va nga mu tireli Jehova. Hikwalaho, kasi ku tsakisa Jehova u fanele ku mu ingisa u tlhela u mu tirela! U ta zama ku maha lezo ke? —