‘Tirela Jehova’

1. Komba kuhambana xikari ka lezi a vanhu va gi wonisako zona wukhumbi ni legi gi kuciwako ka Va Le Roma 12:11.

A wukhumbi ga wuKristu gi hambana nguvu ni lezi a vanhu vo tala va zi alakanyako xungetano hi gezu wukhumbi. Maalakanyweni yabye, a kuva khumbi va zi fananisa ni ku xanisiwa, ku mahelwa xapi, ni ku xololwa. Kanilezi a Mhaka ya Nungungulu yi wulawula hi wukhumbi kutani wunanza ga ku tirela Hosi ya liranzo hi kuziranza. Kunene, a xikhati lexi mupostoli Paule a nga luleka a maKristu zaneni ga malembe go sangula lezaku ma ‘tirela Jehova’ kota tikhumbi, i wo ma kuca lezaku ma mahela Jehova a ntiro wo basa na ma kuciwa hi liranzo. (Rom. 12:11) Xana a wukhumbi legi gi patsa yini? Hi nga alisa kuyini a kuva tikhumbi ta Satani ni tiko gakwe ke? Niku hi wihi a nchachazelo wa ku tirela Jehova hi kutsumbeka kota tikhumbi takwe?

“NZA RANZA A NWINYI WA MINA”

2. (a) Xini xi nga wa ta kuca a khumbi ya muIsraeli lezaku yi simama ku tirela nwinyi wa yona hambu loku ku chikela a lembe ga kuva yi tlhatlheka ke? (b) A kuva a khumbi yi bhoxiwa ndleve zi wa komba yini?

² Ka Nayo lowu Nungungulu a nga nyikile vaIsraeli, hi wona a tshamela ga wukhumbi legi Jehova a gi lavako ka hina. A khumbi ya muHeberu yi wa fanele ku tlhatlheka hi lembe ga wuntlhanu ni mambiri ga wukhumbi ga yona. (Ekso. 21:2) Hambulezo, a khumbi leyi hakunene yi nga ranza a nwinyi wa yona na yi xuva ku simama yi mu tirela, Jehova i wa mahile lulamiselo go hlamalisa. A nwinyi i wa fanele ku neha khumbi laha livatini kutani laha nyangweni zonake a yi bhoxa ndleve hi litlhawo. (Ekso. 21:5, 6) Lexi xi hi kokako kupima hi lezaku a lulamiselo legi gi wa patsa ni ndleve. Hi lirimi la xiHeberu, a mongo wa gezu kuingisa wu kombiswa hi gezu gi patsako kuzwa ni kuingisela. A khumbi leyi yi nga zi ranza yi wa simama ku tirela nwinyi wa yona ni ku mu ingisa. Lezi zi hi vuna ku zwisisa lezi zi patsekako kutihendleleteni ka hina ka Jehova — ku ingisa hi kuziranza na hi kuciwa hi liranzo la hina ka Nungungulu.

3. Xini xi hi mahako hi ti hendleleta ka Nungungulu?

³ Laha hi ti hendleletako kasi hi bapatizwa kota maKristu, hi sina hi mahile xiboho xa ku tirela Jehova, hiva tikhumbi takwe. A kutihendleleta ka hina ku nyikiwa ntamu hi kuxuva loku hi nga nako ka ku ingisa Jehova ni ku maha kuranza kakwe. A ku na munhu a nga hi kurumeta ku maha lezo. Phela hambu a vanana lava va bapatizwako va maha lezo ntsena anzhako ka ku ngha vona wutsumbu va ti hendleletile ka Jehova, na ku nga hi ku fela ku tsakisa a vapswali vabye. Lexi xi mahako a muKristu a ti hendleleta ku ranza Jehova, a Nwinyi wa hina wa le tilweni. Mupostoli Johani i lo tsala aku: “A ku mu ranza Nungungulu hi ku hlayisa milayo yakwe.” — 1 Joh. 5:3.

HI TLHATLHEKILE, HAMBULEZO HI MALANZA

4. Xini xi lavekako kasi hiva “malanza ya kululama”?

⁴ A ho ku mu bonga Jehova hi lezi a hi vumelelako lezaku hiva tikhumbi kutani malanza yakwe! A kukholwa ka hina muphahlweni wa Kristu ka hi tlhatlhisa ka pingu wa xionho. Hambu lezi hi kalako hi nga se mbhelela, hi ti veka hasi ka wuhosi ga Jehova na Jesu hi kuziranza. Paule i tlhamusele a mhaka leyi yiku dlunya ka ginwe ga mapapilo yakwe aku: “Ti wuleni lezaku mu file hi tlhelo ga kuonha, kanilezi mu hanyela Nungungulu ka Kristu Jesu.” Zonake i lo tlharihisa aku: “Xana a mu zi tivi lezaku mu malanza ya nwinyi loyi mu ti nyikelako kakwe, mu maha malanza ya loyi mu mu ingisako, kutani ya kuonha loku ku yisako kufeni, hambu ya kuingisa loku ku yisako kululameni ke? A ku bongiwe Nungungulu, hakuva hambu lezi mu nga hi malanza ya kuonha, mu zi kotile a ku ingisa a gonzisela legi mu nga nyikiwa gona. Makunu na mu tlhatlhisilwe kuonheni, mu mahile malanza ya kululama.” (Rom. 6:11, 16-18) Wona lezaku Paule i wulawula hi “kuingisa.” Kunene, a kutihendleleta ka hina ka Jehova ku hi maha “malanza ya kululama.”

5. I yimpi muni ya lomu nzeni leyi hi nga nayo, niku hikuyini?

⁵ Hambulezo, ku na ni lezi hi faneleko ku zi hlula kasi hi zi kota ku hanya kota vanhu va ti hendleletileko. Hilwa ni valala vambiri. A wo ranga i fana ni loyi Paule yenawu a lwileko naye, laha a nga tsala aku: “Nza tsakela a nayo wa Nungungulu hi munhu loyi a nga xikari ka mina. Kanilezi nza wona munwani nayo zirweni za mina, lowu wu lwako ni nayo wa kupima ka mina, wu nzi kokela wukhumbini ga nayo wa kuonha lowu wu nga kona zirweni za mina.” (Rom. 7:22, 23) A kungambheleli ka hina ka mabeleko a ku hi tsiki. Hikwalaho, hi le yimpini ya hombe ya kulwa ni kunavela ka nyama ya hina. Mupostoli Pedro i lo hi luleka aku: “Nwina mu tlhatlhekile, kanilezi ngha kutlhatlheka ka nwina ku nga mahi a xifenengelo xa mitiro ya kubiha, kanilezi mahani malanza ya Nungungulu.” — 1 Ped. 2:16.

6, 7. Xana Satani i gi polijhisa kuyini a tiko legi lezaku gi koka mahlo?

⁶ Hi na ni nala wa wumbiri loyi hi faneleko kulwa naye, ku nga tiko legi gi kucetelwako hi madimoni. Satani a hosi ya tiko legi, i hi phandela matlhari yakwe na a zama ku hi tsikisa kutsumbeka ka hina ka Jehova na Jesu. I zama ku hi maha tikhumbi hi ku hi ringa kasi hi phasiwa hi mano yakwe ya kubiha. (Gonza Va Le Efesusi 6:11, 12.) A yinwe ya tindlela leti Satani a ti tirisako kasi ku tatisa a kungo legi ku polijha a tiko gakwe lezaku gi koka nguvu mahlo ni ku khohlisa. Mupostoli Johani i lo nyika xitlharihiso lexi: “Loku munhu a ranza tiko, a liranzo la Dadani a li kona ka yena. Hakuva zontlhe lezi zi nga laha tikweni: a kunavela ka nyama, ni kunavela ka mahlo, ni kutikulisa hi kota ya zilo za loku kuhanya, a ziti hi ka Dadani, kanilezi zita hi lomu tikweni.” — 1 Joh. 2:15, 16.

⁷ A kunavela kuva ni titshomba to tala ku fenengetile tiko. Satani i kucetela vanhu lezaku va alakanya ku a mali yi neha litsako. A zitolo a wu hlayi. A vahaxi va mahungu ya zilo zi xavisiwako va vuvumisa moya wa lezaku a vanhu ngha vava ni titshomba to tala ni ku ranza ku ti tsakisa. A tikoponi to enzisa vanhu ti nyikela mathikithi ya lezaku a vanhu va enza vaya matikweni ya nduma na va hi zinwe ni vanhu va ku ranza a zilo za tiko. Handle ko kanakana, zontlhe zi hi ranzeleko zi kucetela a moya wa kuva hi chukwatisa a wutomi ga hina hi ka mawonela ya tiko.

8, 9. I khombo muni ga hombe gi nga kona, niku hikuyini?

⁸ Na a wulawula hi lava va nga lanzela a mawonela ya tiko bandleni ga wuKristu ka zana ga malembe go sangula, Pedro i lo nyika xitlharihiso lexi: “Va alakanya lezaku litsako ku maha wudakwa laha hlikanhini. Va hi mabala ni makhwanga, va lonzola mibuzweni yabye ya liranzo loku va kari vaga na nwina. Hakuva hi ku wulawula a timhaka ta matshanza leti ti nga nyawuliko, va xengetela hi kunavela ka nyama ni wubhayi, a vanhu lava va ha ponako ka lava va hanyako kuhambukeni; va va tsumbisa a kutlhatlheka, kasi vona wutsumbu tikhumbi ta kubola; hakuva a munhu i khumbi ya lezi a hlulwako ha zona.” — 2 Ped. 2:13, 18, 19.

⁹ A ku enelisa a “kunavela ka mahlo” a zi mahi munhu ava wo tlhatlheka. A kuhambana ni lezo, i maha khumbi ya nwinyi wa tiko a nga wonekiko, ku nga Satani. (1 Joh. 5:19) Ku na ni khombo ga hombe nguvu ga ku mahiwa khumbi hi titshomba — gi nga wukhumbi ga ku boha mawoko ni milenge.

NTIRO WO XALALISA

10, 11. Hi vamani lava nyamutlha va laviwako nguvu hi Satani, niku xana a zigonzo za tiko zi va nehelisa kuyini a xikarato?

¹⁰ Khwatsi hi lezi a nga maha le Edeni, nyamutlha konawu Satani i potiyela lava va nga tlharihangiko. A vaswa hi vona nguvunguvu va nga le khombyeni. Satani a nga tsaki a xikhati lexi a muswa, kunene ni wihi munhu, a ti hendleletako hi kuziranza lezaku a tirela Jehova. A nala wa Nungungulu i lava lezaku vontlhe lava va ti hendleletileko ka Jehova va tsanzeka a ku tatisa a xihlambanyo lexi xa ku hanya hi kutsumbeka.

¹¹ A hi tlheleni ka xikombiso xa khumbi kutani nanza legi gi vumelileko a ku bhoxiwa ndleve. Handle ko kanakana, a nanza legi gi zwile kubayisa ka xikhatanyana; kanilezi zalezo ku lo hunza, ku sala a xikombiso xa wukhumbi xa kala kupinzuka. Hi kufanana, a ku hlawula mahanyela lawa ma hambanako ni ya vanghana zi nga tshuka zi karata, hambu ku bayisa, ka muswa. Satani i vuvumisa maalakanyo ya lezaku a ku hlawula ntiro tikweni gakwe hi zona zi to xalalisa munhu, kanilezi a maKristu ma fanele ku chela kota hi lisima la ku tatisa a zilaveko zabye za moya. Jesu i gonzisile lezi: “Va katekile lava va khatalako hi xilaveko xabye xa moya, hakuva mufumo wa le tilweni ngwabye.” (Mat. 5:3, Tradução do Novo Mundo) A maKristu lawa ma ti hendleletileko ma hanyela ku maha kuranza ka Nungungulu, na ku nga hi ka Satani. Va tsakela a nayo wa Jehova, va wu ehleketa mumu ni wusiku. (Gonza Tisimu 1:1-3.) Kanilezi, a kutala ka makurso ma susiwako xikoleni a ma siyeli xikhati a nanza ga Jehova lezaku gi ehleketa ni ku tatisa a xilaveko xa gona xa moya.

12. Kuhlawula muni loku a vaswa va maKristu va faneleko ku ku maha nyamutlha?

¹² A nwinyi wa tiko legi a nga karatisa a wutomi ga khumbi ya muKristu. Ka papilo gakwe go ranga ka va le Korinte, Paule i lo va luleka aku: “Loku u vitanilwe na u hi khumbi u nga karateki ha gona; kanilezi loku u zi kota ku tlhatlheka, hlawula lezo.” (1 Kor. 7:21) Kunene, zi wa tava chukwana a ku ti tlhatlhisa ka wukhumbi lego. Matikweni yo tala nyamutlha, a nayo wu kurumeta lezaku a vanana va gonza xikola kala ka tanga yo kari. Anzhako ka lezo, a mhaka leyi yi tsikwa mandleni ya zigonzani. Kanilezi loku a muKristu a hlawula ku simama ni zigonzo kasi a kuma ntiro wa nduma tikweni legi, a nga ta hava ni kutlhatlheka ka lezaku a tirela Jehova ntirweni wa xikhati xontlhe. — Gonza 1 Va Le Korinte 7:23.

U LAVA GONZISELELO YO TLAKUKA NI KU U LAVA GONZISELELO YA WUCHUKWANA KE?

13. I gonziselelo muni yi to vuna nguvu a malanza ya Jehova ke?

¹³ Paule i lo tlharihisa a maKristu ya le Kolosi aku: “Ti woneleni lezaku a munhu a nga dzuki a mu koka hi tigonzo ta wutlhari ga hava, hi ku lanzela a mikhuwo ya vanhu, ni mintamu yo sangula ya misava, na ku nga hi ka Kristu.” (Kol. 2:8) A ‘tigonzo ta wutlhari ga hava, ni ku lanzela a mikhuwo ya vanhu’ nyamutlha, zi tatile maalakanyo ya tiko ma vuvumiswako hi titlhari to tala. A zigonzo zo tlakuka, lezi zi vuvumisako nguvu a ku gonza mabhuku, a kutala ka zikhati zi humesa zigonzani zi nga hiko na wutlhari ga ku maha zilo, zi va tsika na va nga hi na wutlhari ga lisine legi gi lavekako kuhanyeni ka siku ni siku. A kuhambana ni lezo, a malanza ya Jehova ma hlawula zigonzo lezi zi to ma vuna a kuva ni wutlhari legi gi lavekako kasi ma zi kota ku simama ku hanya wutomi go olova na ma tirela Nungungulu. Ma tshama na ma alakanya a wusungukati legi Paule a nga nyika Timote aku: “Kunene, a ku khozela Nungungulu na hi xalaliswa hi lezi hi nga nazo i bhinzu ga hombe. Hikwalaho, loku hi hi ni zakuga ni kuambala, ngha hi eneliswa ha zona.” (1 Tim. 6:6, 8, NM) Wutshanwini ga ku gonza makalasi kasi va tiviwa ku hi vamanyani, a maKristu ya lisine ma ti karatela kuva ni wudzunzo hi ku tira nguvu wutirelini ga simu kala laha ma zi kotako. — Gonza 2 Va Le Korinte 3:1-3.

14. Hi kuwula ka Va Le Filipi 3:8, xana Paule i wa gi wonisa kuyini a lungelo gakwe ga ku tirela Jehova na Jesu kota khumbi?

¹⁴ Hi nga ehleketa hi mupostoli Paule. I wa gonzisilwe milengeni ya Gamalieli, a mugonzisi wa Nayo wa xiJuda. A gonziselelo leyi Paule a nga yi kuma yi nga fana ni gonziselelo ya universidade nyamutlha. Hambulezo, xana Paule i wa yi wonisa kuyini loku a yi ecanyisa ni lungelo gakwe ga ku tirela Nungungulu na Kristu kota khumbi ke? I te ngalo: “Nza alakanya zilo zontlhe kulahlekelwa hi kota ya kusaseka ka ku tiva Kristu Jesu a Hosi ya mina.” I lo engeta aku: “Hakuva nzi lahlekelwe hi zilo zontlhe hi kota ya yena, nzi zi alakanya lezaku i chaka, kasi nzi fela ku bhinzula Kristu.” (Fil. 3:8) A mawonela lawo ma vuna vaswa va maKristu zinwe ni vapswali vabye va chavako Nungungulu lezaku va hlawula zigonzo hi wutlhari. (Wona mifota.)

VUNEKA HI GONZISELELO YA CHUKWANA KA TONTLHE

15, 16. I gonziselelo muni leyi a hlengeletano ya Jehova yi hi nyikako, niku hi gihi a kungo-tshinya ga yona?

¹⁵ I moya muni wu nga kona ka zikola zo tala za tiko legi, lezi zi nyikako a gonziselelo yo tlakuka? Xana a hi matshamu yo tshama hasi va phikizana hi timhaka ta politika ni ta mahanyela ka zikhati zo kari ke? (Efe. 2:2) A kuhambana ni lezo, a hlengeletano ya Jehova yi nyika a gonziselelo ya chukwana ka tontlhe ka matshamela yo rula bandleni ga wuKristu. A munwe ni munwani wa hina i na ni lungelo ga ku vuneka hi Xikola xa Wutireli ga Nungungulu viki ni viki. Ahandle ka lezo, ku na ni makurso yo hlawuleka ma mahelweko a vamakabye va xinuna va magwenza va nga maphayona (Xikola xa Biblia xa Vamakabye va Magwenza) ni maphayona ma chadileko (Xikola xa Biblia xa Mipatswa ya Makristu). A gonziselelo leyo ya Nungungulu ya hi vuna ku ingisa Jehova, a Nwinyi wa hina wa le tilweni.

¹⁶ Ha zi kota ku kela a titshomba ta moya ka Índice das Publicações da Torre de Vigia kutani ka Watchtower Library hi CD-ROM. A kungo-tshinya ga gonziselelo leyi ku khozela Jehova. Yi hi gonzisa tindlela ta ku vuna vanwani lezaku va tlhanganyiswa ni Nungungulu. (2 Kor. 5:20) Loku va vumela, vonawu va ta gonzisa vanwani kambe. — 2 Tim. 2:2.

A NCHACHAZELO WA NANZA

17. Hi wihi a nchachazelo wa gonzo ya chukwana ka tontlhe?

¹⁷ Ka mufananiso wa Jesu wa titalenta, a malanza lawa ya mambiri yo tsumbeka ma dzunzilwe niku ma nghenile kutsakeni ka hosi ya wona hi ku nyikiwa a ntiro wa hombe. (Gonza Mateu 25:21, 23.) A ku hlawula a gonziselelo ya chukwana ka tontlhe nyamutlha zi neha litsako ni nchachazelo. Wona a xikombiso xa Michael. I wa tiva nguvu xikoleni laha ka kuza a vagonzisi vakwe va mu vitana ka mutlhangano kasi va ya bhulisana naye lezaku aya universidade. Lexi xi nga va hlamalisa hi lezaku Michael i lo hlawula ku susa kurso yo koma leyi yi nga wa ta hatlisa yi mu nyika ntiro kasi a ti hlayisa na a tira kota phayona ga xikhati xontlhe. Xana wa ti laya hi kota ya xiboho lexo? Michael i bika lawa: “A gonziselelo ya Nungungulu leyi nzi nga yi kuma kota phayona — ni kota dota ga bandla ka xikhati lexi — nja lisima nguvu. A makatekwa ni malungelo lawa nzi ti buzako hi wona ma hunza nguvu a mali yontlhe nzi nga wa ta ngha nzi yi kumile. Nza tsaka nguvu hi lezi nzi nga kala ku lanzela a zigonzo zo tlakuka.”

18. Xini xi ku susumetako a ku hlawula gonziselelo ya chukwana ka tontlhe ke?

¹⁸ A gonziselelo ya chukwana ka tontlhe yi hi gonzisa a kuranza ka Nungungulu ni ku hi vuna a ku tirela Jehova kota malanza yakwe. Yi hi vululela nyangwa ya lezaku hi “tirulwa wukhumbini ga kubola” hi gumesa hi “enghena kutlhatlhekeni ka kungangamela ka vana va Nungungulu.” (Rom. 8:21) A ku tsika zontlhe lezo, hi gonza a ndlela ya chukwana ya ku komba lezaku hakunene ha mu ranza Jehova, a Nwinyi wa hina wa le tilweni. — Ekso. 21:5.