A ku tsumba Jehova zi neha makatekwa

Papai na mamani va tivene hi 1919 ka gotsovanyano wa Zigonzani za Biblia za Misava Yontlhe le Cedar Point, Ohio, Estados Unidos. Va chadile kumbheleni ka lembe lego. Mina nzi pswalilwe hi 1922, niku a makabye wa mina Paul i pswalilwe ka malembe mambiri anzhako ka lezo. A sati wa mina, Grace, i pswalilwe hi 1930. A vapswali vakwe Roy na Ruth Howell, va wundlilwe kota Zigonzani za Biblia, niku a vakokwani vakwe vonawu va wa hi Zigonzani za Biblia tlhelo vanghana va makabye Charles Taze Russell.

Nzi tivene na Grace hi 1947, niku hi lo chada hi 16 ka Julho wa 1949. Na hi nga se chada, hi lo tshama hasi hi bhulisana khwatsi xungetano hi makungo ya hina ya za manziko. Hi lo maha xiboho xa kuva ntirweni wa xikhati xontlhe ni ku nga lavi wutihlamuleli ga ku wundla vanana. Hi 1 ka Outubro wa 1950 hi lo sangula ku tira kota maphayona. Zonake hi 1952 hi lo rambiwa ka ntiro wa wuwoneleli ga xipanze.

NTIRO WA KU ENZELA MABANDLA NI XIKOLA XA GILEADI

Mina ni sati wa mina hi wa lava xivuno xa hombe kasi hi zi kota ku tatisa xiavelo lexi xa xiswa. Laha nzi nga kari nzi gonza ka vamakabye va buvileko, nzi lo lavetela wa ku vuna Grace. Nzi loya ka Marvin Holien, a nga hi munghana wa kale wa ngango wa hina tlhelo muwoneleli a fambafambako wo buva, nzi yaku kakwe: “Grace wa ha hi nhanyana niku a nga seva ni wutlhari go tala. Xana wa tiva makabye wo kari waku a nga tira naye kasi a mu gonzisa?” Aku, “Ina, nza mu tiva. Edna Winkle i phayona go buva gaku gi nga mu vuna nguvu.” Hi nzhako ka xikhati, Grace i lo wula lezi xungetano hi Edna: “I nzi vunile ku mbheta kuchava kontlhe loku nzi hi laha nyangweni ya muti wa munhu, a nzi vuna ku tiva ndlela yi nene yo hlamula lava va kanetako, a tlhela a nzi gonzisa ku demba ndleve ka nwinyi wa muti kasi nzi zi kota ku yisa kupima ka lezi za zi nene nzi faneleko ku zi wula. A makabye loyi i wa hi zontlhe nzi nga zi lava!”

Mina na Grace hi lo tira ka zipanze zimbiri ka Província ga Iowa a ku patsa ni ma Província ya Minnesota ni Dakota do Sul. Anzhako ka lezo hi lo ciciwa hiya ka Xipanze 1 xa Nova York, lexi xi nga patsa a madoropa ya hombe ya Brooklyn ni Queens. Cima hi nga ta rivala lezi hi nga ti zwisa zona na hi nga ringanelwi hi xiavelo lexi. A xipanze lexi xi wa patsa a Bandla ga Brooklyn Heights, legi gi nga tirisa a Salawu ya Mufumo ya Beteli ni kuva ni ziro zo tala zo buva za ngango wa Beteli. Anzhako ka ku veka a kanelo ya mina ya ntiro yo sangula ka bandla lego, makabye Nathan Knorr i lota ka mina a ta nzi byela magezu lawa: “Malcolm, u hi nyikile wusungakati gi nene kasi hi chukwatisa lezi zi lavekako, niku zi wa laveka. U nga rivali lezaku loku wena u nga hi vuni hi ku hi nyika wusungukati gi nene, a wu vuni nchumu ka hlengeletano leyi. Simama ni ntiro wa wena wa wu nene.” Anzhako ka mitlhangano, nzi lo hlawutela mhaka leyi ka Grace. Anzhako ka lezo, hi loya ka kwarutu ya hina yi nga hi Beteli. Hi kota ya ku tshama xikhati xo leha na hi karatekile, hi lo rila.

Anzhako ka tihweti ti tsongwani, hi lo amukela a papilo gi nga hi ramba ku ya gonza a Xikola xa Gileadi ka ntlawa wa wu 24, xi nga wa ta gumesa hi Fevereiro wa 1955. Hi wa sina hi byelilwe na hi nga seya xikoleni lezaku a gonziselelo leyi hi nga wa ta yi kuma yi wa nga hi ya ku hi longiselela a kuva varumiwa ntsena. Wutshanwini ga lezo, yi wa ta hi hlomisa lezaku hi tira khwatsi ntirweni wa ku enzela mabandla. A ku gonza xikola lexi ku’ve nchumu wa wu nene nguvu, hambulezo zi wa lava kutikoramisa.

Laha hi nga mbheta xikola, hi lo nyikiwa xiavelo xa ku tira ku wonelela muganga. A muganga wa hina wu wa patsa ma Província ya Indiana, Michigan, ni Ohio. Zonake hi Dezembro wa 1955, hi lo dzuka hi ku amukela papilo ga makabye Knorr, na giku ngalo: “Nzi byele lisine, u nga chavi. Loku u lava kuta Beteli u ta tira kona, wula . . . loku u lava ku ta tira masikwanyana zonake u kuma xiavelo xo ya tira matiko-wundle, u nga nzi fihleli. Loku u tsakela nguvu a ntiro wa wuwoneleli ga muganga ni ga xipanze, nzi byele kambe.” Hi lo hlamula lezaku hi ta tsakela ni xihi xiavelo hi to nyikwa xona ku maha. Zalezo hi lo rambiwa ku ya tira Beteli!

MALEMBE YO TSAKISA BETELI

Ka malembe lawa nzi nga tira Beteli, a ntiro wa mina wu wa patsa ku gonzisa ni ku veka tikanelo tikweni gontlhe ga Estados Unidos. Ma’ve malembe yo tsakisa nguvu. Nzi lo gonzisa ni ku vuna a majaha yo tala lawa hi ku famba ka xikhati ma ngava ni wutihlamuleli ga hombe hlengeletanweni ya Jehova. Hi kugumesa, nzi lo tira kota matsalani wa makabye Knorr ka hofisa leyi a ntiro wa kuxumayela misaveni yontlhe wu nga xaxametwa kona.

Nzi lo tsaka nguvu ka malembe wontlhe lawa nzi nga ma mbheta na nzi tira ka Xipanze xa Ntiro. Ku’ve ka xipanze lexi nzi nga tira na T. J. (Bud) Sullivan. I’ve muwoneleli wa xipanze lexo hi malembe yo tala. Kanilezi nzi gonzile zotala ka vanwani kambe. A munwe wabye ku’ve Fred Rusk, loyi a nga nyikilwe ntiro wa ku nzi gonzisa. Kota lezi hi nga hi vanghana, ka siku go kari nzi lo mu wutisa lezi: “Fred, kasi hikuyini u cicako a zilo zo tala ka mapapilo ya mina ke?” I lo hleka, a gumesa a nzi byela magezu lawa ya lisima, aku: “Malcolm, loku u wula zilo hi nomu, u nga zi tlhamusela hi manwani magezu, kanilezi loku u tsala, nguvunguvu a timhaka leti ti sukako hi laha, ti fanele kuva to zwala khwatsi ni kuva lisine.” Zonake a engeta aku: “Tiya hlana, u nga chavi  —  u maha ntiro wa ku saseka, hi kufamba ka xikhati u ta pasa.”

Ka malembe wontlhe lawa hi nga tira Beteli, Grace i mahile mitiro yo tsalangana, yo kota ku basisa tikwarutu. I wa tsaka nguvu hi ntiro lowu. Kala nyamutlha, loku hi tshuka hi kumana ni vamakabye vokari lava a ka xikhati lexo va nga ha hi majaha Beteli, vo nwe ka Grace zonake vaku: “Phela hi wena u nga nzi gonzisa ku andlala mubhedi, niku mamani wa tsaka nguvu hi lezi u nga nzi gonzisa.” Grace i tirile kambe ka Xipanze xa Marevista, xa Kuamukela ni Kurumela Mapapilo, ni xa Kugandla Makaseti. A ku tira ka zipanze lezo zo hambanahambana zi mu vunile a ku tiva lezaku ni xihi hi mahako kutani ku ni kwihi hi tirako kona hlengeletanweni ya Jehova i lungelo go saseka niku makatekwa. Kala nyamutlha wa ha ti zwisa lezo.

KUCICA LOKU HI KU MAHILEKO

Kwalomu ka va 1975, hi lo sangula ku wona lezaku a vapswali va hina va khosaheleko va wa fanele ku hlayisiwa. Hi kugumesa, hi lo kurumeteka ku maha xiboho xo karata. Hi wa nga zi lavi a ku suka Beteli ni ku siya malanza-kulori ya Jehova lawa hi nga ma ranza nguvu. Hambulezo, nzi lo wona lezaku a ku hlayisa vapswali va hina gi wa hi wutihlamuleli ga mina. Hikwalaho, hi lo huma Beteli na hi hi ni kutsumba ka lezaku loku a xiyimo xi cica, kuzilava hi ta tlhela.

Kasi hi kuma mali ya ku ti hanyisa, nzi lo ya tira ka koponi ya maseguro. A nzi rivali lezi a murangeli wo kari a nga nzi byela na nza ha gonza ku maha ntiro lowu: “A ntiro lowu wu lava lezaku u enzela vanhu mitini yabye ni wusikwana. Lexo hi xona xikhati xo kuma vanhu. A ku na xa lisima a ku hunza ku maha lezo siku ni siku.” Nzi lo mu hlamula nziku: “Nza zi tiva ku u wula lezo hi kota ya lezi u zi hanyileko hi malembe ntirweni lowu, niku nza zizwa. Kanilezi nzi na ni ntiro wunwani wa ka moya lowu nzi nga tshukiko nzi wu mahela mihoni, niku nzi wa nga lavi ku sangula nyamutlha. Nzi ta tira ni wusikwanyana ka masiku yo kari, kanilezi hi Wazibili ni Wazina nzi nga ta tira ni wusiku hakuva nzi fanele kuya mitlhanganweni ya lisima nguvu.” Kunene, Jehova i lo nzi katekisa nguvu hi ku nga vumaleki mitlhanganweni hi kota ya ntiro wa kutihanyisa.

Hi wa hi tlhelweni ga mubhedi wa mamani a xikhati lexi a ngafa mutini wo hlayisa va khosaheleko hi Julho wa 1987. A hosana ya vadokodela yi lota ka Grace yi taku kakwe: “Mama Allen, famba kaya u ya humula. Vontlhe va zi tiva lezaku xontlhe xikhati u wa hi laha ni nwingi wa wena. U nga tizwi nanzu, u mahile zontlhe zi nga hi ntanwini wa wena.”

Hi Dezembro wa 1987, hi lo tatisa maformulario yo kombela ku ya tira kambe Beteli, a wutshamu legi hi nga gi ranza. Kanilezi, masiku matsongwani nzhako ka lezo, Grace i lo khomiwa mababyi ya kankro lomu ka marumbu. Anzhako ko mahiwa operasawu ni kuva a chachamukile, a vadokodela va lo mu byela lezaku a kankro yi mbhelile. Hambulezo, ka xikhati lexo, hi lo amukela a papilo ga Beteli gi nga hi byela lezaku hi simama wutirelini ga hina ni bandla legi hi nga hi ka gona. Hi wa ti yimisele ku simama ni ntiro wa hina wa Mufumo.

Hi kufamba ka xikhati, nzi lo kuma ntiro le Texas. Hi lo alakanya lezaku a tiko legi go kufumela gi wa tava gi nene ka hina, niku gi nene futsi. Ka malembe wontlhe ya 25 hi nga seno Texas hi tshama na hi ranzelwe hi vamakabye va liranzo va xinuna ni va xisati lava hi nga ni wunghana go eta nguvu navo.

LEZI HI ZI GONZILEKO

Grace wa tshuka ava ni kankro lomu ka marumbu, lomu ka nkolo, niku zalezanyana i na ni kankro laha ka vele. Kanilezi, cima a nga se khala hi kota ya xiyimo lexi a nga ka xona ge hambu ku tshuka a phikiza a matshinya ya milayo ya wuhloko ni kutirisana ka hina. I tolovela ku wutisiwa lezi: “Xini xi mu vunako a kuva mu tshama na mu zwanana kota patswa mu tlhela muva vanhu vo tsaka nguvu ke?” I nyikela mune wa zigelo aku: “Hi vanghana va hombe nguvu. Hi bhula hi kukhanzakanya siku ni siku. Hi ranza ku tshama zinwe. Niku cima a hi se tshuka hi ya etlela na hi zangarelene.” Lisine lezaku ha tshuka hi khunguvanyisana, kanilezi hi tekela ku tsetselelana hi tlhela hi zi rivala  —  niku lezo za pswala mihanzu.

Ka ziringo zontlhe hi nga kumana nazo, hi gonzile zotala:

1. Xontlhe xikhati tsumba Jehova u tlhela u vumela lezi a zi vumelelako. U nga tshuki u tsumba kupimisisa ka wena wutsumbu. — Mav. 3:5, 6; Jer. 17:7.

2. Khegela ka wurangeli ga Mhaka ya Jehova, ni ka xihi u xi mahako. A ku ingisa Jehova ni milayo yakwe za lisima. A zi koteki ku nyima laha xikari  —  kova ni kuingisa ni kungaingisi. — Rom. 6:16; Maheb. 4:12.

3. A ku na nchumu xa lisima nguvu wutomini a ku hunza a kuva ni vito gi nene mahlweni ya Jehova. Rangisa kuranza kakwe, na ku nga hi ku hlongolisela titshomba. — Mav. 28:20; Mutsh. 7:1; Mat. 6:33, 34.

4. Khongela ka Jehova u kombela a kuva u bhinzula ntirweni wakwe hi laha u zi kotako hi kona. Veka kupima ka wena ka lezi u zi kotako ku maha, na ku nga hi ka lezi u nga zi kotiko. — Mat. 22:37; 2 Tim. 4:2.

5. Tiva lezaku a ku na hlengeletano yinwani leyi Jehova a yi katekisako a tlhela a yi tsakela. — Joh. 6:68.

Mina na Grace hi na ni 75 wa malembe ni ku hunza na hi tirela Jehova. Kusukela loku hi chadile, hi kari hi mu tirela zinwe a xipimo xa 65 wa malembe. Hi ti buza hi litsako la hombe hi ku tirela Jehova na hi hi zinwe ka malembe wontlhe lawa yo tala. Hi rinzela ni ku khongela lezaku a vamakabye va hina vontlhe va xinuna ni va xisati vonawu va ti buza hi makatekwa ma kumekako hi ku tsumba Jehova.