Hikuyini Nungungulu a tsikako lava va ntamu va xanisa lava va kalako va nga hi nawo ke?

A Biblia gi hlawutela zimaho zo kari zo tshisa xungetano hi vanhu va nga hiko na ntamu va nga xanisiwa hi lava va nga nawo. A xinwe xa zimaho lezo hi lexi xa Nabote.a Ahabi, loyi a nga hi hosi ya Israeli ka zana ga malembe ga wukhume Mahlweni ka Nguva ya Hina, i lo tsika sati wakwe Jezebeli a dayisa Nabote ni vana vakwe kasi a hosi yi sala ni xivina xakwe. (1 Tihosi 21:1-16; 2 Tihosi 9:26) Makunu hikuyini Nungungulu a tsikako vanhu va tirisa ntamu hi ndlela ya hava yo kota leyo ke?

A hi vekeni kupima ka xinwe xa zigelo za lisima: Nungungulu a nga hembi. (Titusi 1:2) Zi yelanisa kuyini lezo ni kuxaniswa ka vanhu? Kwale kusanguleni, Nungungulu i tlharihisile vanhu lezaku loku va nga mu ingisi va wa ta welwa hi khombo — ku nga kufa. Kota kuwula Kakwe, a vanhu va xaniswa hi kufa kusukela kuhluwukeni ka le sinwini ga Edeni. Hi lisine a munhu wo sangula a ngafa i file hi kuvukelwa — a xikhati lexi Kana a nga daya a makabye wakwe Abeli. — Genesisi 2:16, 17; 4:8.

Xungetano hi lezi zi humelelako vanhu kusukela xikhatini lexo, a Mhaka ya Nungungulu yi songa a timhaka hi magezu lawa: “Munwe a fumela munwani a mu yisa khombyeni.” (Mutshawuteli 8:9) Xana a magezu lawa ma tatiseka? Jehova i tlharihisile a vanhu vakwe, va nga vaIsraeli, lezaku a tihosi tabye ti wa ta va xanisa, ti va maha va rilela Nungungulu. (1 Samueli 8:11-18) Hambu Hosi yo tlhariha Solomoni i wa khupisa vanhu vakwe hi ndlela ya hunzeleta. (1 Tihosi 11:43; 12:3, 4) A tihosi to biha to kota Ahabi ti woya hi ku hunzeleta ku va xanisa. Hi nga alakanya: Loku Nungungulu i wa no sivela zilo lezo, xana i wa nga ta ngha a hembile hi ndlela yo kari ke?

Alakanya kambe lezaku Satani i wula lezaku a vanhu va tirela Nungungulu ntsena hi ku lava bhinzu. (Joba 1:9, 10; 2:4) Loku Nungungulu i wo vikela a malanza yakwe wontlhe ka matshamela wontlhe ya tixanisa, zi wa nga ta wonekisa ku khwatsi lezi Satani a wulako lisine ke? Niku loku Nungungulu i wo sivela a tixanisa ka ni wihi munhu, i wa nga ta ngha a rangela wunwa ginwani ga hombe ke? Nzeni ka kuvikelwa loko, a votala va wa ta alakanya lezaku a vanhu va nga ti fuma hi ndlela ya yi nene na va nga fumelwi hi Nungungulu. A kuhambana ni lezo, a Mhaka ya Nungungulu yi wula lezaku a munhu a nga zi koti ku ti fuma. (Jeremia 10:23) Hi lava a Mufumo wa Nungungulu lezaku wuta; ntsena loku lezo zi maheka, hi kona a wubihi gi to mbhela.

Makunu, xana lezo zi wula lezaku Nungungulu a nga mahi nchumu xungetano hi tixanisa ke? Ahihi. Wona zilo zimbiri a zi mahako: Xo sangula, i tlhamusela lezi a tixanisa ti tshamisileko zona. Hi xikombiso, a Mhaka yakwe yi bhoxa zontlhe xungetano hi mano ya Jezebeli kasi ku daya Nabote. A Biblia gi tlhamusela kambe lezaku a wubihi lego gi rangelwa hi hosana ya ntamu leyi yi zamako ku ti fihla. (Johani 14:30; 2 Va Le Korinte 11:14) A Biblia gi yi kombisa kota Satani Diabolus. Hi ku paluxa a wubihi ni tixanisa zinwe ni muvangi wa zona wa lisine, Nungungulu i hi vuna ku potsa ku maha kubiha. Hi ndlela leyo i vikela a wumanziko ga hina ga pinzukelwa.

Xa wumbiri, Nungungulu i nyika kutsumba ko tiya ka lezaku a tixanisa ti ta mbhela. A ndlela leyi a nga paluxa hi yona, a tlhela a lamula ni ku tsayisa hi yona Ahabi na Jezebeli — zinwe ni vanwani vo tala — yi hi maha hi tsumba a zitsumbiso zakwe za lezaku i ta tsayisa vontlhe vamahi va kubiha. (Tisimu 52:1-5) Nungungulu i tlhela a nyika xitsumbiso xo tiya xa lezaku lokuloku i ta tlhatlhisa lava va mu ranzako ka zontlhe zi humelelako hi kota ya wubihi.b Hi ndlela leyo, ku ta chikela xikhati laha a munhu wo tsumbeka, Nabote, ni vana vakwe va to hanya kala kupinzuka paradiseni gi nga hiko na wubihi laha misaveni. — Tisimu 37:34.