Xana a Timboni ta Jehova ta kholwa ka Jesu?

A KU KHOLWA KA JESU ZA LISIMA

Antonio: Gi cile.

Timote: Eyo. Gi cile.

Antonio: Nzi tsakile nguvu hi ku tlhela hi wonana. Laha nzi ku tele ni Murinzeli ni Despertai! wa hweti leyi. Nzi alakanya lezaku ti ta ku tsakisa nguvu a timhaka ti nga ka marevista lawa.

Timote: Nzi bongile. Hi lisine, nzi tsakile nguvu hi kuva u tile nyamutlha; nzi na ni xiwutiso xo kari.

Antonio: Wutisa.

Timote: Ka siku go kari, nzi wa wulawula ni mutiri-kulori. A xikhati nzi nga wulawula hi zibhukwana lezi u nga nzi nyika, i lo nzi byela lezaku a nzi faneli ku zi lera hakuva a Timboni ta Jehova a ti kholwi ka Jesu. Lisine lezo? Nzi lo mu byela lezaku nzi ta ku wutisa loku uta.

Antonio: Hi zona, nzi tsakile nguvu hi kuva u wutisile mina. U mahile khwatsi hi kuva u wutisile hina Timboni ta kona. Kota lezi u zi tivako, a ku na ndlela ya chukwana ya ku tiva lezi a munhu a zi kholwako ahandle ko wutisa yena wutsumbu.

Timote: Hizalezo nzi zi alakanyileko.

Antonio: A lisine hi lezaku a Timboni ta Jehova ta kholwa nguvu ka Jesu. Hi lisine, hi kholwa lezaku kasi ku hanyiswa ku laveka ku kholwa ka Jesu.

Timote: Nzi wa alakanya ku ma kholwa, kanilezi a xikhati lexi inaloyi nzi tirako naye a ngaku a mu kholwi ka Jesu, nzi lavile ku zi tiva khwatsi. Nzi alakanya ku cima hi wa nga se bhula hi mhaka yo fana ni leyi.

Antonio: Nzi nga ku komba mavesi yo kari ya Biblia ma kombako a lisima la ku kholwa ka Jesu? Lawa mavesi ma tolovelako ku tiriswa nguvu hi Timboni ta Jehova kuxumayeleni ka tona.

Timote: Nzi kombe.

Antonio: A vesi gi nene go sangula hi gona i Johani 14:6 gi kombako magezu ya Jesu wutsumbu. Lawa magezu lawa Jesu a ma wulileko na a bhula ni munwe wa mupostoli wakwe. Hi gonza lezi: “Jesu aku kakwe: Mina nzi ndlela, ni zinene, ni wutomi; a nga kona a tako ka Dadani, loku a ngati ha mina.” Hi kuya hi vesi legi hi yihi ndlela yo tshinela hi yona ka Dadani?

Timote: Hi Jesu.

Antonio: Hi zalezo futsi. A Timboni ta Jehova ti zi kholwa nguvu lezo. Hi lisine, xontlhe xikhati hi mahako mukhongelo hi maha hi vito ga Jesu.

Timote: Za tsakisa a ku tiva lezo.

Antonio: A mutsalo wunwani hi nga gonzako i bhuku ga Johani 3:16. A vesi legi gi na ni lisima la hombe nguvu laha ka kuza gi wuliwa ku i tshinya ga tiIvangeli. Lezo na va lava ku wula lezaku loku u lava ku teka zontlhe zi tsalilweko xungetano hi wutomi ni ntiro wa Jesu laha misaveni u zi patsa ka vesi ginwe, gi wa tava galegi. Kuzilava u nga tsakela ku gonza a mutsalo lowu.

Timote: Nzi nga gonza. Gi ngalo: “Hakuva Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.”

Antonio: Nzi bongile. U wa gi tiva hi kale a vesi legi?

Timote: Ina, nza gizwa nguvu le chechini.

Antonio: Hi zona, i vesi go tiveka nguvu. Gi cuwuke khwatsi, u wona lezi Jesu a nga wula. I te ngalo a liranzo la Nungungulu li vulula ndlela ya ku hina vanhu hi kuma wutomi ga pinzukelwa — kanilezi ntsena loku hi maha yini?

Timote: Loku hi kholwa.

Antonio: Hi zona. Hi kukongoma, hi fanele ku kholwa ka N’wana a belekilweko yece, Jesu Kristu. Niku a mhaka leyi — yaku a ku kholwa ka Jesu zi vulula ndlela ya wutomi ga pinzukelwa — ya wuliwa kwalaha ka revista legi nzi ku nyikileko laha ka phajina 2. Xungetano hi kungo ga revista A Murinzeli, nzeni ka zilo zinwani gi wulako gi ngalo, a revista legi gi “kuca vanhu lezaku va kholwa ka Jesu Kristu, loyi a ngafa kasi hi kuma wutomi ga pinzukelwa ni loyi zalezi a fumako kota Hosi ya Mufumo wa Nungungulu.”

Timote: A, zi dlunyatekile. A revista ga nwina wutsumbu ga komba lezaku a Timboni ta Jehova ta kholwa ka Jesu.

Antonio: Hi zalezo.

Timote: Makunu, hikuyini a vanhu va nge a mu kholwi ka Jesu?

Antonio: Ku ni zigelo zo tala lezi kuzilava zi mahako vanhu va wula lezo. A vokari va wula lezo ntsena hi ku ngha va zwile vanwani na va wula lezo. Kutani ku ngha va gonzisilwe mawunwa lawo hi vafundisa vabye.

Timote: Nza ha hi ku zi alakanya zalezi — kuzilava a vokari va wula lezaku a mu kholwi ka Jesu hi lezi mu nge mu Timboni ta Jehova, na ku nga hi Timboni ta Jesu.

Antonio: Lexo xonawu xi ngava xigelo.

Timote: Hikuyini mu wulawulako nguvu hi Jehova?

“NZI VA TIVISILE A VITO GA WENA”

Antonio: A xinwe xa zilo, hi kholwa lezaku za lisima nguvu ku tirisa a vito ga Nungungulu, Jehova — khwatsi hi lezi a N’wana wakwe Jesu a nga maha. Wona lezi Jesu a nga byela Dadani wakwe hi mukhongelo. Zi tsalilwe ka Johani 17:26. U nga tsakela ku lera a vesi legi?

Timote: Ina. “Nzi va tivisile a vito ga wena, nza ha ta gi tivekisa; kasi a liranzo leli u nzi ranzileko ha lona li fela ku tshama ka vona, na mina nzi hi ka vona.”

Antonio: Nzi bongile. Wona lezaku Jesu i te i tivisile a vito ga Nungungulu. U alakanya ku hikuyini a mahileko lezo?

Timote: Umm. A nzi zi tivi.

Antonio: Hi zona, kuzilava hi nga wona wunwani mutsalo wu tlhatlhako khwatsi a mhaka leyi. I Joeli 2:32. Wu ngalo: “Ni wihi a ta nga khongela vitweni ga Jehova i ta hanyiswa.” Makunu, nzi alakanya ku a wu nge kaneti lezaku loku ku hi ku a munhu i fanele ku khongela vitweni ga Jehova kasi ku hanyiswa, handle ko kanakana Jesu i wa zi tiva lezo.

Timote: Hi zona hakunene.

Antonio: Hikwalaho a kuhanyiswa ka valanzeli vakwe xinwe xa zigelo zi nga maha Jesu a zi wona na zi hi za lisima a kuva va tiva ni ku tirisa vito ga Nungungulu. Niku hi xalexo a xinwe xa zigelo za hombe za kuva hinawu hi wulawula nguvu hi Jehova. Hi zi wona zi hi za lisima a ku tivekisa vito ga Nungungulu, ni ku vuna vanwani lezaku vonawu va tirisa a vito legi.

Timote: Kanilezi, hambu loku a vanhu va nga gi tivi a vito ga Nungungulu kutani va nga gi tirisi hi kukongoma, va mu tiva loyi va wulawulako hi yena loku va wulawula hi Nungungulu.

Antonio: Zi ngava lisine. Hambulezo, hi ku hi byela vito gakwe, Nungungulu i maha lezaku zi hi olovela a kuva hi tshinela kakwe.

Timote: U lava ku wula yini?

Antonio: Hi nga alakanya lezi: Ku wa nga hi na xilaveko xa ku tiva vito ga Mosi. Na hi mu tivile kota wununa a avanyisileko a Bimbi go Pswhuka kutani wanuna a amukeleko a Milayo ya Khume. Noa na yenawu — hi xihi xigelo xo kala hi tiva vito gakwe? Na a wulilwe ntsena lezaku hi wanuna loyi a akileko taru, a ponisa ngango wakwe ni zihari. Hi ndlela yaleyo, hambu Jesu ngha a tivilwe ntsena kota wanuna a tileko hi le tilweni, a ta fela zionho za hina. Nzo hemba?

Timote: Nzi alakanya ku a wu hembi.

Antonio: Kanilezi Nungungulu i mahile lezaku hi tiva vanhu lavo hi mavito yabye. A ku tiva mavito yabye zi maha lezaku a matimu yabye mava yo hanya ka hina. Cima a hi se tshuka hi mu wona Mosi, kutani Noa, hambu Jesu, kanilezi hi ku tiva mavito yabye basi zi maha ku khwatsi hi loku hi tshukile hi va wona.

Timote: E! nzi wa nga se tshuka nzi zi alakanyisa lezi, kanilezi za zwala nguvu!

Antonio: Lexi xigelo xinwani xi mahako Timboni ta Jehova ti gi tirisa nguvu a vito ga Nungungulu. Hi lava ku vuna vanhu lezaku vava ni kukholwa ko tiya ka Jehova Nungungulu kota Munhu loyi zi kotekako a ku tshinela kakwe. Hi tlhelo ginwani, hi khanyisa nguvu a ntiro wa Jesu lowu wu mahako lezaku hi hanyiswa. Kuzilava hi nga gonza wunwani mutsalo wu hi wuyisako ka mhaka leyi.

Timote: Eyo.

Antonio: Le kusanguleni hi gonzile Johani 14:6. Alakanya lezaku Jesu i te hi yena a ‘ndlela, ni lisine, ni wutomi.’ A hi tlhele kutsongwani hi ya wona magezu yakwe ka Johani 14:1. U nga zi tsakela ku gonza lezi Jesu a zi wulileko ka magezu yo gumesa ya vesi legi?

Timote: Nzi nga gonza. I ngalo: “Kholwani ka Nungungulu, mu kholwa ka mina kambe.”

Antonio: Nzi bongile. Makunu, hi mawonela ya wena, u alakanya ku lexi xi lavekako ku hlawula munwe wabye hi kholwa kakwe?

Timote: Ahihi. Jesu i te hi fanele ku kholwa ka vontlhe.

Antonio: Hi zalezo. Nza kholwa kambe ku wa vumela lezaku a ku wula ntsena lezaku ha kholwa ka Nungungulu na Jesu a zi eneli. Hi fanele ku hanya hi ndlela yi kombako lezaku ha kholwa.

Timote: U wula zona.

Antonio: Kanilezi xini lexi a munhu a nga xi mahako kasi ku komba lezaku hakunene wa kholwa ka Nungungulu ni ka Jesu? Kuzilava hi ta bhula hi mhaka leyi ka siku ginwani.a

Timote: Nzi ta zi tsakela nguvu ku zi tiva.