ZIWUTISO ZA VAGONZI

Jesu i byelile vaSadusi lezaku lava va to vuxiwa hi ka vafileko “va nga ha ta teka, hambu ni ku tekiwa.” (Luka 20:34-36) Xana i wa wulawula hi lava va to vuxiwa va hanya laha misaveni?

A vanhu lavo va nga ha xuva ku tlhela va tekana misaveni yiswa. A noni yo kari ya xinuna yi ngalo: “Mina ni sati wa mina hi wa nga bohangi ku tlhatlha wukati ga hina. Hi wa xuva ku simama hi bohene wukhozelini kota nuna ni sati kala kupinzuka. A kuxuva loko a ku cicangi ka mina.” Xana ku na ni xigelo xo zwala xa ku rinzela lezaku lava va to vuxiwa va ta tekana ke? Hi magezu matsongwani, a zi tiveki.

Hi malembe, a mabhuku ya hina mata na ma wula lezaku a magezu ya Jesu xungetano hi kuvuka ka vafileko ni kutekana kuzilava ma wula lava va to vuxiwa va hanya misaveni yiswa, na zi komba lezaku va nga ta tekana.a (Mat. 22:29, 30; Marku 12:24, 25; Luka 20:34-36) A hi nge wuli hi kutiya, kanilezi za koteka ku a magezu ya Jesu na ma wula lava va to vuxiwa va hanya le tilweni. A hi kambisiseni lezi Jesu a zi wulileko.

Ehleketa hi laha zi nga sukela kona. (Gonza Luka 20:27-33.) A vaSadusi, lava va nga kala va nga kholwi lezaku a vafileko va ta vuka, va lo zama ku ringa Jesu hi xiwutiso xi wulawulako hi kuvuka ka vafileko ni wukati ga kuhlambela.b Jesu i lo hlamula aku: “A vanhu va misava va teka, ni ku tekiwa; kanilezi lava va ta nga vumelwa ku wona a xikhati xi tako, ni kuvuka hi ka vafileko, va nga ha ta teka, hambu ni ku tekiwa; hakuva a va ha zi koti kufa; hakuva va ecana ni tingelosi; i vanana va Nungungulu, hilezi va nga vanana va kuvuka hi ka vafileko.” — Luka 20:34-36.

Hikuyini a mabhuku ya hina ma nga wula lezaku kuzilava Jesu i wa wulawula hi lava va to vuxiwa kasi va hanya laha misaveni ke? A mawonela lawa ma seketelwa nguvunguvu ka maalakanyo mambiri. Yo sangula, ku alakanyelwa lezaku a vaSadusi kuzilava va wa wulawula hi lava va to vuxiwa kasi va hanya misaveni niku Jesu i wa nga ta hlamula zo hambana. Ya wumbiri, kumbheleni ka hlamulo wakwe, Jesu i kumbukile Abrahama, na Isaka, na Jakobe — va nga vanhu va kukholwa lava va rinzelako ku vuxiwa kasi va hanya laha misaveni. — Luka 20:37, 38.

Hambulezo, ko khwatsi zi nga koteka ku ngha Jesu a wulawulile hi lava va to vuxiwa va ya hanya tilweni. Hi nga wula lezo na hi zi seketela ka yini? A hi kambisiseni zilo zimbiri za tshinya.

“Lava va ta nga vumelwa . . . kuvuka hi ka vafileko.” A Tradução do Novo Mundo gi wula lezi: “Lava va woniwako na va ringanelwa hi . . . kuvuka hi ka vafileko.” A vatotilweko vo tsumbeka va “fanelwe hi mufumo wa Nungungulu.” (2 Tes. 1:5, 11) Va hlayelwa kululama hi nzhiho wa Kristu, hikwalaho a vafi kota vaonhi va konilweko. (Rom. 5:1, 18; 8:1) A vanhu lavo va wuliwa lezaku ‘va katekile niku va basile’ niku va woniwa na va ringanelwa hi ku vuxiwa kasi ku ya hanya tilweni. (Kuv. 20:5, 6) A ku hambana ni lezo, ka lava va to vuxiwa kasi ku hanya laha misaveni ku patseka lava “va nga lulamangiko.” (Miti. 24:15) Xana hi nga wula lezaku a vanhu lavo va “ringanelwa” hi kuvuka hi ka vafileko ke?

“A va ha zi koti kufa.” Jesu a nga wulangi lezaku: “Va nga ta hafa kambe.” Kanilezi i te ngalo: “A va ha zi koti kufa.” A maBiblia manwani me ngalo “a va ha hi na kufa,” a manwani maku “a kufa a ka hi na ntamu ka vona.” A vatotilweko lava va tsumbekako kala kufeni va vuxiwa va ya hanya tilweni va tlhela va nyikwa a kungafi — ku nga wutomi go kala gi nga mbheli, legi zi nga kotekiko ku gi lovisa. (1 Kor. 15:53, 54) A kufa a ka ha hi na ntamu ka lava va vuxiwako va ya hanya tilweni.c

Hi kuya hi lezi hi zi wonileko, hi nga chikelela magumo wahi ke? Za koteka ku ngha a magezu ya Jesu xungetano hi kutekana ni kuvuka hi ka vafileko ma wula lava va to vuxiwa va ya hanya le tilweni. Loku zi hi tano, a magezu yakwe ma wa ta hi byela zotala xungetano hi lava va vuxiwako va ya hanya tilweni: A va tekani, a vafi, niku hi ndlela yo kari va fana ni tingelosi — ti nga zivangwa za moya lezi zi hanyako tilweni. Kanilezi a magumo lawo ma vuxa ziwutiso zo hlaya.

Xo sangula, hikuyini Jesu a nga wa ta wulawula hi lava va to vuxiwa va ya hanya tilweni na a hlamula vaSadusi, lava kuzilava va nga alakanyela lava va to vuxiwa laha misaveni? A hi xikhati xontlhe lexi Jesu a nga hlamula vakaneti vakwe hi kuyelana ni lezi vona va nga zi alakanya. Hi xikombiso, ka vaJuda lava va nga mu lonza xiwoniso, i te ngalo: “Hahlulani tempeli leyi, mina nzi ta yi vuxa hi masiku manharu.” Jesu i wa zi tiva lezaku vona va alakanyela a muako wa tempeli, “kanilezi yena i [wa] wulawula hi tempeli ya miri wakwe.” (Joh. 2:18-21) Kuzilava Jesu i wa nga woni xilaveko xa ku hlamula vaSadusi lavo, lava va nga kala va nga kholwi ka kuvuka ka vafileko kutani ka kuvakona ka tingelosi. (Mav. 23:9; Mat. 7:6; Miti. 23:8) Hi tlhelo ginwani, kuzilava i lavile ku gonzisa zilo za lisine xungetano hi lava va to vuka va ya hanya tilweni kasi ku vuna vapizani vakwe, lava hi magumo va nga wa ta kuma thomo lego.

Xa wumbiri, hikuyini Jesu a nga wa ta tlhela a kumbuka Abrahama, na Isaka, na Jakobe, lava va to vuxiwa va hanya laha misaveni ke? (Gonza Mateu 22:31, 32.) Wona lezaku na a nga se kumbuka vanhu lavo, Jesu i rangile hi ku wula magezu lawa: “Hi ku kumbuka a kuvuka hi ka vafileko.” A magezu lawo ma nga ha komba kucica ka mongo. Makunu, hi ku tirisa mitsalo ya Mosi, leyi a vaSadusi va nga wula lezaku va yi kholwa, Jesu i lo tirisa magezu lawa Jehova a nga byela Mosi xihlahleni xa nzilo kasi ku tiyisa lezaku a kuvuka ka vafileko — laha misaveni — i kungo go tiya ga Nungungulu. — Ekso. 3:1-6.

Xa wunharu, loku ku hi lezaku a magezu ya Jesu xungetano hi kuvuka ka vafileko ni kutekana ma wula lava va to vuxiwa va ya hanya tilweni, xana lezo zi wula ku lava va to vuxiwa va hanya laha misaveni va ta tekana ke? A Mhaka ya Nungungulu a yi nyiki a hlamulo wo kongoma wa xiwutiso lexi. Loku ku hi lezaku Jesu i wa wulawula hi lava va to vuxiwa va ya hanya tilweni, a magezu yakwe a ma kombi lezaku a vanhu lava va to vuxiwa laha misaveni va ta tlhela va tekana kambe kutani va nga ta ha tekana misaveni yiswa.

Hi tlhelo ginwani, ha zi tiva lezaku a Mhaka ya Nungungulu yi wula hi kumbhelela lezaku a kutekana ku hambanyiswa hi kufa. Hikwalaho, a munhu a felweko hi nuna kutani sati a nga faneli ku tizwa nanzu loku a boha ku tekana ni munwani. Lexo xiboho xa munhu wutsumbu, niku a nga kona a faneleko ku va sola loku va lava munwani munghana wa ku va tangalisa. — Rom. 7:2, 3; 1 Kor. 7:39.

Handle ko kanakana, za koteka ku ngha hi hi ni ziwutiso zo tala xungetano hi wutomi misaveni yiswa. Kanilezi, wutshanwini ga ku luka mihlamulo ya zona, hi fanele ku rinzela hi wona hi zona. A mhaka yo tiya hi leyi: A vanhu lava va ingisako va ta tsaka hakuva Jehova i ta tatisa zilaveko ni kunavela kabye hi ndlela ya chukwana hi laha zi kotekako ha kona. — Tis. 145:16.