HLOKO YA MHAKA YA KAPA | A MUFUMO WA NUNGUNGULU — WU NA NI LISIMA MUNI KA WENA?

Mufumo Wa Nungungulu — Wu ta ku vunisa kuyini?

Kuzilava ka tinzima ti nga hunza u zi tivile lezaku a Mufumo wa Nungungulu wa lisima nguvu ka Timboni ta Jehova. Niku kuzilava a makatekwa ma to nehiwa hi Mufumo wa Nungungulu xikhatini xi tako ma ku hlamalisile nguvu; lezo na u alakanya lezaku a zilo lezo zi nene nguvu laha ka ku zi nga ta koteka.

U maha khwatsi loku u ti wonela, wutshanwini ga ku kholwa ni xihi u xi zwako. (Mavingu 14:15) Hi ndlela yo kari, a kutiwonela ka wena ku nga fananiswa ni loku ka va le Berea va xikhatini xa kale.a A xikhati lexi va ngazwa a mahungu yo saseka ya Mufumo wa Nungungulu hi khati go sangula, a va le Berea va lo vumela lezi va nga zizwa, na ku nga hi lezaku va wo lava ku ziva lisine ntsena. A ku hambana ni lezo, va lo hlola Mitsalo ‘kasi ku wona lezaku a timhaka leto ti wa hi nghaho ke.’ (Mitiro 17:11) Hi magezu manwani, a va le Berea va lo fananisa mahungu yo saseka lawa va nga mazwa ni lezi a Mitsalo yi wulako. Hi kufamba ka xikhati, va lo tiyiseka lezaku a mahungu yo saseka hakunene ma seketelwa ka Mhaka ya Nungungulu.

A Timboni ta Jehova ta ku ramba hi matsenya lezaku u mahawo zalezo. Hi ku tirisa a longoloko wa xigonzo xa Biblia xa mahala, ha ku nyika a lungelo ga ku fananisa lezi a Timboni ta Jehova ti zi kholwako hi Mufumo wa Nungungulu ni lezi a Biblia gi zi gonzisako.

A handle ka ku gonza hi Mufumo wa Nungungulu, a xigonzo lexo xa Biblia xi ta ku vuna ku kuma mihlamulo ya ziwutiso za lisima nguvu wutomini, zo kota lezi:

Hita hi kwihi?
Hi hanyela yini?
Hikuyini Nungungulu a tsikako kuxaniseka?
Zini zi humelelako loku hifa?
Xana a misava yi ta fuviswa?
Hi yihi ndlela yo kuma litsako laha ngangweni?

A xa lisima ka zontlhe, a ku gonza a Biblia zi ta ku vuna ku ‘Tshinela ka Nungungulu.’ (Jakobe 4:8) Kota wuyelo ga lezo, laha u tshinelako nguvu ka Nungungulu, u ta zi wona khwatsi lezi a Mufumo wa Nungungulu wu nga ku mahelisako zona a zilo za zi nene — na ku nga hi ka xikhati lexi ntsena kanilezi kala kupinzuka. Na a maha mukhongelo ka Dadani wakwe Jesu ite: ‘A wutomi ga pinzukelwa hi kuva va ku tiva, wena Nungungulu wece wa lisine, na Jesu Kristu loyi u mu rumileko.’ — Johani 17:3.

A Timboni ta Jehova ti nga gonza na wena a Biblia hi ku tirisa bhuku legi.

Kasi ku kombela a xigonzo xa Biblia xa mahala, kombela a Mboni yo kari ya Jehova kutani ku tatisa a phepha gi nga ka www.jw.org/tsc. (Wona KOMBELA KU GONZA A BIBLIA MAHALA ka phajina go sangula)

a Berea gi wa hi doropa gi nga hi le Makedonia wa kale.

Hikuyini a wu ranzako nguvu a Mufumo wa Nungungulu?

Zalezanyana, Folake nhanyana wa khume ga malembe i lo nyikwa ntiro wa xikola wa kuva a tsala mahungu ma nga hi ni hloko ya mhaka “Lexi nzi xi ranzako nguvu misaveni leyi.” Folake i lo hlawula ku tsala ku hikuyini a ranzako ku bhula ni vanwani hi Mufumo wa Nungungulu.

Folake i tlhamusela lezi: “A Mufumo wa Nungungulu wu kona hakunene. Kanilezi a wu woneki, hikwalaho a wu nge wu woni — hambu loku u boha mayokola!”

Folake i loya mahlweni a tsala mahungu ma wulawulako hi makatekwa ya Mufumo lawa a ma rinzelako hi mahlo yo pswhuka. Na a wulawula hi zikarato zo kari lezi a Mufumo wu to zi susa, i lo tsala lezi: “Nza bayiseka loku nzi wona vanhu na va hanya lomu maruweni” ni “ku wona vanana na vafa hi ndlala ka zipanze zo hambanahambana za misava.” I lo engeta aku: “Nzi tlhela nzi tsaka a xikhati lexi nzi lerako Isaya 65:21.” Xungetano hi vanhu lava va to hanya hasi ka Mufumo wa Nungungulu, a vesi legi gi tsumbisa lezi: “Loku va aka tiyindlu va ta tshama ka tona, ni loku va byala zivina va taga mihanzu ya zona.”

Folake i wula lezaku i xi rinzela hi mahlo yo pswhuka kambe a xikhati lexi Nungungulu a to fuvisa mababyi wontlhe hi ku tirisa a Mufumo wakwe. Ka mahungu yakwe, i lo tshaha bhuku ga Kuvululelwa 21:4, legi gi wulako lezaku Nungungulu “i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa.” I lo gumesa hi ku phinda a magezu yakwe ya lezaku, a ku wulawula hi Jehova ni Mufumo wakwe hi zona a zi ranzako nguvu misaveni leyi. Zi te dlunya lezaku a nhanyana loyi i ranza a Mufumo wa Nungungulu hi mbilu yakwe yontlhe!