Mufumo Wa Nungungulu — Hikuyini wu nga wa lisima ka Jesu?

Kota lezi zi kombisilweko ka nzima yo sangula, Jesu i wa rangisa ku “kanela ni ku tlhatlhambutela ivangeli ya mufumo wa Nungungulu.” (Luka 8:1) I lo ti tsitsirita, a famba mazanazana ya tikilometro lomu tikweni ga Israeli kasi ku gonzisa vanhu hi Mufumo wa Nungungulu. A wutireli ga Jesu gi tsalilwe lomu ka mune wa tiIvangeli, leti ti kumbukako a Mufumo lowu hi xipimo xa 100 wa makhati ni kuhunza. A kutala ka wona ma kumbukiwa hi Jesu wutsumbu, niku a makhati lawo, ma yimela a xipanze xitsongwani ntsena xa zontlhe lezi Jesu a zi wulileko hi Mufumo wa Nungungulu! — Johani 21:25.

Hikuyini a Mufumo wa Nungungulu wu nga hi wa lisima nguvu ka Jesu a xikhati lexi a nga hi laha misaveni? A xinwe xa zigelo hi lezaku Jesu i wa zi tiva ku Nungungulu i mu hlawulile lezaku ava Hosi ya wona. (Isaya 9:6; Luka 22:28-30) Kanilezi a kupima ka Jesu ku wa nga hi ku fuma kutani ku ti lavela wudzunzo. (Mateu 11:29; Marku 10:17, 18) I wa nga vuvumisi Mufumo wa Nungungulu hi ku fela ku wuyeliwa. Jesu i simama ku khatala hi Mufumo wa Nungungulua, hi kota ya lezi wu to zi mahela vontlhe lava a va ranzako — Dadani wakwe wa le tilweni ni valanzeli vakwe vo tsumbeka.

LEZI A MUFUMO WU TO MAHELA DADANI WA JESU

Jesu i wa hi ni liranzo lo eta hi Dadani wakwe wa le tilweni. (Mavingu 8:30; Johani 14:31) I wa tsakiswa hi matshamela yo navetisa ya Dadani wakwe, yo kota liranzo, wuxinji, ni kululama Kakwe. (Deuteronome 32:4; Isaya 49:15; 1 Johani 4:8) Handle ko kanakana, Jesu wa venga kuzwa mawunwa ma hangalasiwako xungetano hi Dadani wakwe — mawunwa yo kota lawa yaku Nungungulu a nga khatali hi kuxaniseka ka vanhu niku i lava a ku hi xaniseka. Lexi xinwe xa zigelo za kuva Jesu a xuvile nguvu a ku xumayela a mahungu yo saseka “ya mufumo” — hakuva i wa zi tiva lezaku hi kufamba ka xikhati a Mufumo wa Nungungulu wu wa ta basisa a vito ga Dadani wakwe. (Mateu 4:23; 6:9, 10) Wu ta zi mahisa kuyini?

Hi ku tirisa Mufumo wakwe, Jehova i ta maha zilo za hombe zi to vuna vanhu. “I ta kulula mihloti yontlhe” mahlweni ya vanhu vo tsumbeka. Jehova i ta fuvisa zontlhe zi vangako mihloti leyo, a maha zontlhe zi lavekako kasi ‘ku nga havi kona kufa, hambu ni hlomulo, kutani kurila ni kubayisa.’ (Kuvululelwa 21:3, 4) Hi ku tirisa Mufumo, Nungungulu i ta fuvisa a zikarato zontlhe za vanhu.b

A zi hlamalisi lezi Jesu a nga zi lava nguvu ku xumayela Mufumo ka vanhu! I wa zi tiva lezaku a Mufumo wa Nungungulu wu wa ta kombisa khwatsi lezaku a Dadani wakwe munhu wa ntamu ni wo zwela wusiwana. (Jakobe 5:11) Jesu i wa zi tiva kambe lezaku a vanhu vanwani a va ranzako — ku nga vanhu vo tsumbeka, va wa ta vuneka hi Mufumo wa Nungungulu.

LEZI A MUFUMO WU TO MAHELA VANHU VO TSUMBEKA

Jesu i hanyile malembe yo tala ni Dadani wakwe le tilweni na a nga seta misaveni. A Dadani i lo tirisa a N’wana wakwe kasi ku vanga zilo zontlhe — kusukela ka matilo yo hlamalisa ni tinyeleti ta wona ta tsanza-vahlayi ni misava ya hina yo saseka, makhwati ni zontlhe zi hanyako ka wona. (Va Le Kolosi 1:15, 16) A ku hunza zontlhe lezo, Jesu i wa va ranza nguvu a “vana va vanhu.” — Mavingu 8:31.

Kuxumayeleni kakwe Jesu i wa tiveka nguvu hi ku ranza vanhu. Zalezo a nga sangula ntiro wakwe, i lo zi veka kubaseni lezaku i tile misaveni kasi ku ta “kanela a mahungu yo saseka” ka la’va vumalako. (Luka 4:18) Kanilezi Jesu i mahile zo hunza ku wulawula hi ku vuna vanhu. Ka zikhati zontlhe, i wa kombisa liranzo lakwe hi vanhu. Hi xikombiso, a xikhati lexi a xidlemo xi nga tlhangana kasi kuzwa lezi a nga wulawula, Jesu “i lo xi zwela wusiwana, a hanyisa vababyako vabye.” (Mateu 14:14) A xikhati lexi a wanuna wo kari loyi a nga hi ni wubabyi go bayisa nguvu a nga kombisa kukholwa ka lezaku Jesu i wa ta zi kota ku mu hanyisa loku a zi ranza, a liranzo li lo mu kuca ku maha xo kari. Hi ku mu zwela wusiwana, Jesu i lo hanyisa a wununa loye hi ku wula lezi: “Nza zi ranza, basiswa wena.” (Luka 5:12, 13) Laha Jesu a nga wona Maria na a rila hi kota ya kufelwa hi makabye wakwe, Lazaru, Jesu “i lo keta moyeni, a karateka,” zonake “a rila.” (Johani 11:32-36) Zonake i lo maha zilo zo hlamalisa — Jesu i lo vuxa Lazaru hi ka vafileko hambu lezi ku nga hunzile a mune wa masiku na Lazaru a file! — Johani 11:38-44.

Hi lisine, Jesu i wa zi tiva lezaku a zilo lezo za zi nene a nga zi maha zi wa tova za xikhatanyana ntsena. I wa zi tiva lezaku hi magumo vontlhe lava a nga va chuma va wa ta tlhela va babya niku lava a nga va vuxile va wa ta tlhela vafa. Hambulezo, Jesu i wa zi tiva kambe lezaku a Mufumo wa Nungungulu wu wa ta fuvisa zikarato lezo. Hi lexo xi nga maha Jesu a nga mahi zihlamaliso ntsena, kanilezi a tlhela a kanela “Ivangeli ya mufumo” hi kuhiseka. (Mateu 9:35) A zihlamaliso zakwe zi lo komba zilo zi tsongwani lezi a Mufumo wa Nungungulu wu to zi maha lokuloku misaveni yontlhe. Ehleketa hi lezi a Biblia gi tsumbisako ku zi ta maheka xikhatini lexo.

• 

  Ku nga ta hava ni mababyi.

  Xikhatini lexo “a mahlo ya zikhumu ma ta vululiwa, ni tindleve ta ziwiri ti ta vululeka. A zilema zi ta tlula khwatsi i hlangu, ni tirimi ta timbeveve ti ta yimbelela.” Ahandle ka lezo, “a ku na muaki ni munwe a ta ngaku: Nza babya!” — Isaya 33:24; 35:5, 6.

• 

  A vanhu va nga ta hafa.

  “A valulamileko va taga tshomba ya tiko, va aka ka gona kala kupinzuka.” — Tisimu 37:29.

  “I ta fuvisa kufa kala ku pinzuka; Hosi Nungungulu i ta hlangula mihloti tinghoheni tontlhe.” — Isaya 25:8.

• Lava va fileko va ta vuka.

  ‘Vontlhe va nga le zilahleni va tazwa a gezu gakwe, zonake va huma’ — Johani 5:28, 29.

  “Ku tava kona a kuvuka” ka vafileko — Mitiro 24:15.

• 

  Ku nga ta ha vumaleka mitiro kutani ko tshama kona.

  “Loku va aka tiyindlu va ta tshama ka tona, ni loku va byala zivina va taga mihanzu ya zona. Va nga ta akela ku kasi vanwani va tshama lomo, va nga ta byalela ku kasi vanwani vaga mihanzu ya kona; . . . ni vahlawulilweko va mina va ta tsakela mitiro ya mandla yabye.” — Isaya 65:21, 22.

• 

  Ku nga ta hava ni tiyimpi.

  “Yena i maha a tiyimpi ti khawula kala magumelweni ya misava.” — Tisimu 46:9.

  “A tiko gi nga ha talwa ni ginwani, ge hambu a ku gonza kulwa.” — Isaya 2:4.

• 

  Ku nga ta hava ni tindlala.

  ‘A misava yi ta humesa a mihanzu ya yona, Nungungulu, yena Nungungulu wa hina, i ta hi katekisa.’ — Tisimu 67:6.

  “A mavele ma ta pfuna nguvu tikweni ni lomu hehla ka zitsunga.” — Tisimu 72:16.

• Ku nga ta hava ni wusiwana.

  “A muvumali a nga ta rivalwa xontlhe xikhati.” — Tisimu 9:18.

  “I ta hlanguta a muvumali loyi a rilako, ni loyi a tsimbeketilweko, loyi a nga hiko na muvuni. I ta zwela wusiwana loyi a hlokisilweko ni muvumali; a ponisa wutomi ga vavumali.” — Tisimu 72:12, 13.

Loku u kambisisa zitsumbiso lezo xungetano hi Mufumo wa Nungungulu, wa zi wona a ku hikuyini a Mufumo wu nga wa lisima nguvu ka Jesu? Na a ha hi laha misaveni, i wa zi tsakela nguvu a ku wulawula hi Mufumo wa Nungungulu ka la’va nga mu ingisela. I wa zi tiva kambe lezaku a Mufumo lowu wu ta fuvisa a zikarato zontlhe lezi hi zi wonako inyamutlha.

Xana za ku tsakisa a zitsumbiso lezi za Mufumo wa Nungungulu? Loku zi hi tano, hi yihi ndlela yo gonza zotala hi Mufumo lowo? Niku zini lezi u faneleko ku maha kasi u vuneka hi makatekwa ya wona? A nzima yi lanzelako yi ta hlamula ziwutiso lezi.