HLOKO YA MHAKA YA KAPA | A MUNHU A FILEKO — A NGA VUKA KE?

Zini zi humelelako munhu loku a file?

Vanhu va hombe ni vanana va renzelekeleko kaxawu laha xilahleni

“Nzi wa alakanya lezaku ku na ni wutshamu ginharu legi a munhu a yaku ka gona loku a file: Tilweni, kusweni, kutani purgatório. Nzi wa zi tiva lezaku a nzi ringanelwe hi kuya tilweni niku nzi wa nga bihangi nguvu laha ka kuza nziya kusweni. A gonzo ya purgatório nzi wa nga yi zwisisi. Nzi wa nga se tshuka nzi wona a gezu purgatório lomu ka Biblia. Nzi wo zizwa ni vanhu ntsena.” — Lionel.

“Nzi wa gonzisilwe lezaku loku a vanhu vafa vaya tilweni, kanilezi nzi wa nga zi kholwi khwatsi. Nzi wa alakanya lezaku a kufa kumbhela ka zontlhe — a ka hi na nchumu xi rinzelwako hi loyi a fileko.” — Fernando.

Wa tshuka u ti wutisa a ku: ‘Zini lezi hakunene zi humelelako le kufeni? Xana a varanzekako va hina va fileko vo xaniseka hi ndlela yo kari? Hi ta tshuka hi va wona kambe? Xini xi nga hi tiyisekisako lezo?’ Kambisisa lezi a Mitsalo yi zi gonzisako hakunene. A kuranga a hi kambisise hi wona lezi a kufa ku nga tshamisa zona hi kuya hi lezi a Biblia gi zi wulako. Hi kulanzela hi ta kambisisa a kutsumba loku a Mhaka ya Nungungulu, a Biblia, yi hi nyikako.

Hi xihi xiyimo xa vafileko?

HLAMULO WA BIBLIA: “A vahanyako va zi tiva lezaku va tafa, kanilezi a vafileko a va tivi nchumu, ge, kuva ni nchachazelo, hakuva a va ha alakanyiwi. Ni xihi lexi a canja ga wena gi xi tirako, xi mahe hi ntamu wa wena: hakuva a ku na ntiro, hambu makungo, ni kutiva, ge, hambu wutlhari le Xeoli lomu u yako kona.”a — Mutshawuteli 9:5, 10.

Hi ndlela yo tsema a gezu Xeoli, gi wula wutshamu ga lomu a vanhu vontlhe va yako ka gona loku vafa; wutshamu ga ku fananisa kutani lomu ni kwihi kupima ku tsikako ku tira. Xana a wanuna wo tsumbeka Joba i wa xi wonisa kuyini a Xeoli kutani Xilahla? I wa lahlekelwe hi zontlhe a nga hi nazo ni vana vakwe hi siku ginwe, a tlhela a telwa hi zidlayi a miri wakwe wontlhe. I lo khongotela Nungungulu aku: “O, loku ku wo khwatsi wa nzi fihla le Xeoli, u nzi veka kufihlaleni.” (Joba 1:13-19; 2:7; 14:13) Zi te dlunya lezaku Joba i wa nga woni a Xeoli kota wutshamu ga nzilo, lomu a kuxaniseka kakwe ku nga wa ta engetela. A kuhambana ni lezo i gi alakanyile kota wutshamu legi a nga wa ta kuma ku humula.

Ku na ni ndlela yinwani ya ku gonza xungetano hi xiyimo xa vafileko. Hi nga kambisisa a Mitsalo yi pimisilweko leyi yi wulawulako hi 8 wa vanhu va vuxilweko hi ka vafileko. — Wona kwadru “8 wa vanhu va kumbukiwako lomu ka Biblia va nga vuxiwa hi ka vafileko.”

Ka yontlhe ya 8 ku hava ni wunwe wu wulawulako hi wutshamu ga kutsaka kutani ga nzilo. Loku a vanhu lavo va nga vuxilwe hi ka vafileko va wa noya ka matshamu lawo, xana na va nga byelangi vanhu xungetano hi lezo? Niku na zi nga patsiwangi lomu ka Biblia gi pimisilweko kasi hontlheni hi zi tiva? A Mitsalo a yi kumbuki, ne xinwe xa zona. A vanhu lavo va 8 zi te dlunya lezaku va wa nga hi na xo wula hi mhaka leyo. Hikuyini? Hakuva va wa nga tivi nchumu, a ku fana ni wurongo ga hombe. Hi lisine, ka zikhati zinwani a Biblia gi tirisa a kuetlela kota mufananiso wa ku tlhamusela kufa. Hi xikombiso, a wanuna wo tsumbeka Davida na Stefani vontlhe va “lo etlela” kufeni. — Mitiro 7:60; 13:36.

Makunu, kurinzela muni ku nga kona hi lava va fileko? Xana va nga tshuka va vuka hi kuetleleni loko?

a Ka Tradução do Novo Mundo das Escrituras Sagradas, a gezu “Xilahla” hi xiGreki gi hunzuluselwa ku Xeoli, hi xiHeberu i “Hayidesi.” Ka maBiblia yo kari ku tirisiwa a gezu “kuswa,” kanilezi a maalakanyo ya wutshamu ga ku xanisa vafileko a hi ya lomu Mitsalweni.

8 WA VANHU VA KUMBUKIWAKO LOMU KA BIBLIA VA NGA VUXIWA HI KA VAFILEKOb

N’wana wa noni Muprofeti Elija i lo vuxa a n’wana wa noni yi nga hanya le Zarefate, le nwalungu wa Israeli. — 1 Tihosi 17:17-24.

Jaha ga wasati wa muXuname Muprofeti Elixa, a muvaleti wa Elija, i vuxile a jaha ga le doropeni ga le Xuname a gi tlhelisa ka vapswali va gona. — 2 Tihosi 4:32-37.

Wanuna lomu xilahleni Ku lo hoxiwa a xirumbi xa wanuna wo kari a nga ha hi kufa ka xilahla lexi ku nga hi ni marambu ya Elixa. A xikhati lexi a miri wa wanuna loye wu nga khumba a marambu ya muprofeti Elixa, a wanuna loye i lo vuka hi ka vafileko. — 2 Tihosi 13:20, 21.

N’wana wa noni ya le Naine Jesu i lo yimisa a vanhu va nga huma hi lomu doropeni ga Naine na vaya kulahleni, kasi a vuxa a jaha hi ka vafileko a gi tlhelisa ka mamani wa gona a nga bayisekile nguvu. — Luka 7:11-15.

Nhanyana wa Jairo Jairo, a nga hi murangeli wa sinagoga, i lo khongotela Jesu lezaku a vuna a nhanyana wakwe a nga kari a babya. Jesu i lo mu vuxa hi ka vafileko xikhatanyana nzhako ka kuva a nhanyana loye a file. — Luka 8:41, 42, 49-56.

Lazaru munghana wa Jesu wo ranzeka nguvu Ku wa hunza mune wa masiku Lazaru na file a xikhati lexi Jesu a nga mu vuxa hi ka vafileko na a woniwa hi vanhu vo tala. — Johani 11:38-44.

Dorkasi a nga hi noni Mupostoli Pedro i lo vuxa a wasati a nga ranziwa nguvu, loyi a nga tiviwa nguvu hi mitiro yakwe ya yi nene. — Mitiro 9:36-42.

Etikusi A jaha gi vitwako Etikusi gi lofa a xikhati lexi gi ngawa hi laha ka janela ga le hehla nguvu; mupostoli Paule i lo gi vuxa hi ka vafileko. — Mitiro 20:7-12.

b A kuvuka ka Jesu Kristu hi ka vafileko ka lisima nguvu a ku hunza loku ka lava va 8, kota lezi a nzima yi lanzelako yi to zi tlhamusela.