Loku munhu afa, a nga feli magumo!

Betania xidoropana xi nga hi ka pfhuka wa tikilometro tinharu kusukela Jerusalema. (Johani 11:18) Ku lo humelela mahungu yo biha ka maviki matsongwani mahlweni ka kufa ka Jesu. Lazaru, a nga hi munwe wa vanghana va hombe va Jesu i lo babya nguvu, afa.

A xikhati lexi Jesu a ngazwa mahungu lawo hi khati go sangula, i lo byela vapizani vakwe lezaku Lazaru i etlele niku i lava ku ya mu vuxa. (Johani 11:11) Kanilezi a vapizani vakwe a va zi zwisisangi, hikwalaho i lo va byela zi dlunyateka aku: “Lazaru i file.” — Johani 11:14.

Anzhako ka mune wa masiku na Lazaru a lahlilwe, Jesu i lo chikela le Betania a ya chavelela Marta a makabye wa Lazaru. Marta i te ngalo: “Loku u wa hi kona laha, a makabye wa mina ngha a nga fangi.” (Johani 11:17, 21) Jesu i lo hlamula aku: “Mina nzi kuvuka ni wutomi; loyi a kholwako ka mina, hambu loku a file, i ta hanya.” — Johani 11:25.

Kasi ku komba lezaku a magezu lawo ma wa hi lisine, Jesu i lo tshinela xilahleni a kanyuluka aku: “Lazaru, huma!” (Johani 11:43) Zalezo, Lazaru i lo huma, va hlamala vontlhe lava va nga hi laho.

Jesu i wa sina a vuxile vanhu vambiri hi wutsongwani ga kona. Ka ginwe ga makhati lawo, i vuxile xinhanyatana hi ka vafileko — ku nga n’wana wa Jairo. Ka khati legi kambe, na a nga se mu vuxa, Jesu i wulile lezaku i no etlela. — Luka 8:52.

Wona lezaku ka makhati wontlhe lawa ya mambiri, kufeni ka Lazaru ni ka nhwana wa Jairo, Jesu i fananisile kufa ni kuetlela. A mufananiso lowu wa tshama khwatsi. Hikuyini? Loku munhu a etlele, a mapimo yakwe a ma tiri. Hikwalaho, a kuetlela ku tlhamusela khwatsi a ku humula kubayisa ni kuxaniseka. (Mutshawuteli 9:5; wona a kwadru “A kufa ku fana ni wurongo ga tshongotshongo.”) A vapizani vo sangula va Jesu va wa xi zwisisa khwatsi a xiyimo xa vafileko. A Encyclopedia of Religion and Ethics gi ngalo: “Ka valanzeli va Jesu, a kufa ku wa hi kuetlela, a xilahla ku wa hi wutshamu go humula kona . . . ga lava va fileko kukholweni.”a

Za hi chavelela ku tiva lezaku a vafileko vo etlela xilahleni niku a va xaniseki. Hi ndlela leyo, a kufa a ka ha mahi fihlakalo niku a ka ha hi na xilaveko xa kuva ku hi chavisa.

“LOKU A MUNHU AFA, A NGA TLHELA A HANYA KAMBE?”

Hambu lezi zi nanzihako a ku etlela, himani xikari ka hina a lavako ku etlela a nga ha vuki? Kutsumba muni hi nga nako ka lezaku a vafileko lava va nga lomu zilahleni va ta tlhela va vuka — a ku fana na Lazaru ni n’wana wa Jairo ke?

Joba i vuxile xiwutiso xo fana ni lexo a xikhati lexi a nga tizwa na a hi kusuhani ni kufa. I lo wutisa lezi: “Loku a munhu afa, a nga tlhela a hanya kambe?” — Joba 14:14, Tradução do Novo Mundo.

Na a wulawula hi Nungungulu Nyamintamu, Joba i lo ti hlamula xiwutiso lexo, aku: “U ta vitana, mina nzi ku hlamula. U tava ni lixuve hi ntiro wa mandla ya wena.” (Joba 14:15, NM) Joba i wa tiyiseka lezaku Jehova wa xuva nguvu a siku legi a to vuxa a malanza yakwe yo tsumbeka. Xana loko ku wa hi kunavela ntsena loku Joba a nga hi nako? Ne ni kutsongwani!

A vanhu lava Jesu a nga va vuxa xikombiso xo dlunyateka xa lezaku Nungungulu i mu nyikile a ntamu wa ku hlula kufa. Kunene, a Biblia gi wula lezaku Jesu i na ni “tipfhungulo ta kufa.” (Kuvululelwa 1:18) Hikwalaho, a ku khwatsi hi lezi Jesu a ngava ni ntamu wa ku vuxa Lazaru, i tava ni ntamu kambe wa ku vuxa vafileko xikhatini xi tako.

A Biblia ga wulawula nguvu hi xitsumbiso lexi. A ngelosi yo kari yi lo tiyisa muprofeti Danieli yiku: “U ta humula, zonake u ta vuka u amukela a xiavelo xa wena a kumbheleni ka masiku.” (Danieli 12:13) Jesu i lo wula lezi ka vaSadusi, ku nga varangeli va vaJuda lava nga kala va nga kholwi a xitsumbiso xa kuvuka ka vafileko: “Nwina mu lahlekile, lezi mu nga tiviko mitsalo, hambu ni ntamu wa Nungungulu.” (Mateu 22:23, 29) Mupostoli Paule i lo wula lezi: “Nzi na ni kutsumba ka Nungungulu, . . . lezaku ku tava kona a kuvuka ka valulamileko ni va nga lulamangiko.” — Mitiro 24:15.

XANA A VAFILEKO VA TA VUKA RINI?

Va ta vuka rini a valulamileko ni va nga lulamangiko ke? A ngelosi yi byelile Danieli lezaku i wa ta vuka “kumbheleni ka masiku.” Marta yenawu i wa kholwa lezaku a makabye wakwe Lazaru i wa ta “vuka hi siku go gumesa, a kuvukeni ka vafileko.” — Johani 11:24.

A Biblia gi zwananisa a ‘siku legi go gumesa’ ni Kufuma ka Kristu. Paule i tsalile lezi: “[Kristu] i yimelwe hi ku fuma a kala [Nungungulu] a veka a valala vakwe vontlhe lahasi ka mikonzo yakwe. A nala wo gumesa loyi a ta nga lobyiswa hi kufa.” (1 Va Le Korinte 15:25, 26) Lezi zi hi nyika xigelo xo zwala xa kuva hi khongela hi kombela lezaku a Mufumo wa Nungungulu wuta ni lezaku a kuranza ka Nungungulu ku mahiwa misaveni.b

Hi laha Joba a nga zi tiva hi kona, Nungungulu i ta vuxa vafileko. Loku a siku lego gi chikela a kufa ku ta loviselwa magumo. Ku nga ta ha va ni munhu wa ku ti wutisa ku ‘loku munhu afa i fela magumo ke?’