Xitsumbiso xa kuvuka ka vafileko

Wa tsumba a xitsumbiso xa Biblia xa kuvuxiwa ka vafileko ke?a A kutsumba ka ku tlhela hiva zinwe ni varanzekako va hina va fileko ka tsakisa nguvu, loku hi nga lavi ku wula zo tala. Kanilezi, xana a vafileko va ta vuka hakunene? Kasi hi kuma hlamulo wa xiwutiso lexi, a hi ehleketeni hi xikombiso xa vapostoli va Jesu Kristu.

A vapostoli va Jesu va wa kholwa hi kumbhelela lezaku a vafileko va ta vuka. Hikuyini? Ku na ni zigelo zimbiri hi kutsongwani ka kona. Xo sangula, a kutsumba kabye ku wa seketelwe nguvunguvu ka mhaka leyi: Jesu wutsumbu i wa vuxilwe hi ka vafileko. A vapostoli va mu wonile Jesu na a vuxilwe hi ka vafileko niku i tlhelile a woniwa kambe hi ‘vamakabye va ku hunza 500 hi khati ginwe.’ (1 Va Le Korinte 15:6) Tlhatakumbiri, zi wa tiveka nguvu, zi tlhela zi vumelwa lezaku Jesu i vukile hi ka vafileko, kota lezi hi zi wonako ka tiIvangeli tontlhe ta mune. — Mateu 27:62–28:20; Marku 16:1-8; Luka 24:1-53; Johani 20:1–21:25.

Xa wumbiri, a vapostoli va wa wonile Jesu na a vuxa vanhu vanharu hi kutsongwani ka kona — a kusangula ku’ve le Naine, ku lanzela Kapernaume, hi kugumesa le Betania. (Luka 7:11-17; 8:49-56; Johani 11:1-44) A khati go gumesa, gi nga legi gi tlhamuselweko kusanguleni ka revista galegi, gi’ve ka ngango wu nga hi ni wunghana ga hombe na Jesu. A hi woneni zinwani zi humeleleko.

“MINA NZI KUVUKA”

“A makabye wa wena i ta vuka.” Jesu i wulile magezu lawa ka Marta, loyi a makabye wakwe Lazaru, a nga hi ni mune wa masiku na a file. Kusanguleni, Marta a nga wu zwisisangi a tlhamuselo wa magezu ya Jesu. I lo hlamula aku: “Nza zi tiva lezaku i ta vuka,” kanilezi i wa alakanya lezaku zi wa tava ka xikhati xi nga hata. Hi nga alakanya lezi a nga ti zwisa zona a xikhati lexi a ngazwa Jesu na aku “mina nzi kuvuka ni wutomi,” a gumesa a mu wona na a vuxa makabye wakwe hi ka vafileko! — Johani 11:23-25.

I wa hi kwihi Lazaru nzeni ka masiku lawo ya mune ke? Lazaru a nga wulangi nchumu xungetano hi wutshamu go kari a hanyileko ka gona nzeni ka masiku lawo ya mune. Lazaru i wa nga hi na muhefemulo wu nga fiko wu yileko tilweni. A xikhati lexi Jesu a nga vuxa Lazaru a hi lezaku i no mu susa litsakweni la hombe la kuva kusuhani na Nungungulu le tilweni kasi ku mu wuyisa misaveni. Makunu, i wa hi kwihi Lazaru ka masiku lawo ya mune ke? Hi lisine, i wa no etlela lomu xilahleni. — Mutshawuteli 9:5, 10.

Alakanya lezaku Jesu i fananisile a kufa ni kuetlela laha a munhu a khindlimukako ntsena loku a vuxiwa hi ka vafileko. A matimu ya kona me ngalo: “Lazaru, a xaka ga hina, i etlele; kanilezi nza famba, nzi ya mu vuxa. A vapizani vaku ngalo kakwe: Hosi, loku a etlele, i ta kalamuka. Jesu i wa wulile hi kufa kakwe, kanilezi vona va lo alakanya lezaku i wula hi ku etlela wurongo. Zonake Jesu i lo va byela ziku dlunya, aku: Lazaru i file.” (Johani 11:11-14) A xikhati lexi Jesu a nga vuxa Lazaru i lo mu tlhelisela wutomi gakwe a tlhela a mu hendleleta ka maxaka yakwe. Hi nga wona litsako la hombe leli Jesu a neheleko ngango lowo!

A vanhu lava Jesu a va vuxileko a xikhati a nga hi laha misaveni ku wa hi xikombiso xa lezi a to zi maha xikhatini xi tako kota Hosi ya Mufumo wa Nungungulu.b Xikhatini xa kufuma kakwe kota Hosi, Jesu loyi zalezi a nga le tilweni i ta vuxa vanhu vontlhe lava va nga zilahleni. Hi xalexo xi nga mu maha aku: “Mina nzi kuvuka.” Hi nga alakanyela a litsako u tova nalo a xikhati lexi u to tlhela u wona varanzekako va wena! Ehleketa kambe hi litsako leli lava va to vuxiwa va tova nalo! — Luka 8:56.

KUTSUMBA KA WUTOMI GA PINZUKELWA

Jesu i lo byela Marta, aku: “Loyi a kholwako ka mina, hambu loku a file, i ta hanya; ni wihi a hanyako a kholwa hi mina, cima a nga tafa.” (Johani 11:25, 26) Lava va to vuxiwa hi Jesu kufumeni kakwe ka 1.000 wa malembe va tava ni lungelo ga ku hanya kala kupinzuka — loku va kombisa kukholwa ka lisine ka yena.

Anzhako ka kuva a wulile magezu lawo yo hlamalisa xungetano hi kuvuka ka vafileko, Jesu i lo maha xiwutiso xa ku lava ku tiva lezi zi nga mbilwini ya Marta, aku: “Wa kholwa lexi ke? Yena aku: Ina, Hosi; nza kholwa lezaku hi wena Kristu, a N’wana wa Nungungulu.” (Johani 11:26, 27) Wena ke — xana wa zi lava kuva ni kukholwa ko khwatsi hi loku Marta a nga hi nako xungetano hi kuvuka ka vafileko? A nchumu wo ranga ku gonza u tiva a kungo ga Nungungulu xungetano hi vanhu. (Johani 17:3; 1 Timote 2:4) A wutivi lego gi nga ku nyika kukholwa. Hikuyini u nga kombeliko a Timboni ta Jehova lezaku ti ku komba lezi a Biblia gi zi gonzisako xungetano hi mhaka leyi ke? Ti ta zi tsakela nguvu a ku bhula na wena hi kutsumba loku ko hlamalisa ka kuvuxiwa ka vafileko.