Ti longiselele wutomi ga misava yiswa zalezi

1, 2. a) Makatekwa muni ya xiviri u ma donelako mari misaveni ya paradise? (Wona mufota laha hehla.) b) Makatekwa muni ya moya ma tova kona misaveni yiswa?

“WUTOMI legi gi nga wutomi hizinene.” A kutala ka hina, a magezu lawo ma hi alakanyisa a kutsumba ko hanya kala kupinzuka paradiseni misaveni. Kunene, mupostoli Paule i ecanyisile a “wutomi ga pinzukelwa” ni “wutomi legi gi nga wutomi hizinene.” (Gonza 1 Timote 6:12, 19.) Hi rinzela a wutomi legi gi to pinzuka gi tlhela gi hi nehela litsako la simasima. Za karata ku alakanyela lezi hi to ti zwisa zona a xikhati hi to vuka siku ni siku na hi hanya khwatsi, hi tsakile, hi tlhela hi nga karateki hi nchumu. (Isa. 35:5, 6) Ehleketa hi lezi zi to tsakisisa zona a ku tshama zinwe ni maxaka ya hina zinwe ni vanghana, a ku patsa ni lava va to ngha na va vuxilwe hi ka vafileko! (Joh. 5:28, 29; Miti. 24:15) Hi ta tlhela hiva ni lungelo ga ku engetela wutlhari ga hina ka siensia, wucenje, wumeseri, kutani zilo zinwani.

² Hambu lezi hi rinzelako a zilo lezo za zi nene, a makatekwa yo ranga misaveni yiswa ma tava ya moya. Zi ta tsakisa nguvu ku tiva lezaku a vito ga Jehova gi basisilwe ni lezaku a wuhosi gakwe gi tiyisilwe! (Mat. 6:9, 10) Li tava litsako la hombe a ku wona a kungo go sangula ga Jehova xungetano hi vanhu ni misava na gi tatiseka. Ehleketa kambe hi lezi zi to olovisa zona a ku tshinela ka Jehova a xikhati hi toya hi tshinela ni ku chikela kumbheleleni! — Tis. 73:28; Jak. 4:8.

3. Zini hi faneleko ku longisela zalezi?

³ Ha tsumba lezaku makatekwa lawo hi nga zi kota ku ma kuma, hakuva Jesu i hi tiyisekisa lezaku a “zilo zontlhe za koteka ka Nungungulu.” (Mat. 19:25, 26) Kanilezi loku hi rinzela ku hanya misaveni leyo ya yiswa — hi tlhela hi simama ku hanya anzhako ka Mufumo wa Kristu wa 1.000 wa malembe— hi fanele ku khoma zi tiya zalezi ka wutomi ga pinzukelwa. Hi fanele ku hanya na hi rinzela a kugumesa ka tiko legi go biha, niku hi fanele kuba mazambo ma nene zalezi kasi ku ti longisela lezaku hi hanya misaveni yiswa. Hi nga zi mahisa kuyini lezo na ha hi ka tiko legi go biha?

NDLELA YO TI LONGISELA

4. Hi nga ti longiselisa kuyini zalezi kasi ku hanya misaveni yiswa? Fananisa.

⁴ Hi nga ti longiselisa kuyini zalezi kasi ku hanya misaveni yiswa ya Nungungulu? A hi nge hi kari hi maha makungo yo rura hiya ka tiko ginwani. Hi nga ku longiselisa kuyini a kucica loko? Hi nga ha sangula ku gonza lirimi la vanhu lava va hanyako leyo. A ku gonza hi matshamela yabye zonawu zi nga vuna. Hi ga ha ringa zakuga zo kari za tiko lego. Hi ndlela yo kari, hi wa ta sangula ku hanyisa ku khwatsi hi sina hi hanya tikweni lego. Phela hi zalezo hi rinzelako ku ya hanyisa zona loku hi chikela seyo. Hi kufanana, hi nga ti longisela kasi ku hanya misaveni yiswa hi kuva zalezi hi hanya, kala laha zi kotekako ha kona, kota lezi hi rinzelako ku hanyisa zona misaveni leyo ya yiswa. Xungetano hi mhaka leyi, wona zikombiso zi lanzelako.

5, 6. A ku gonza ku ti veka hasi ka malulamiselo ya moya zi ta hi vunisa kuyini ku ti longisela kasi ku hanya misaveni yiswa ke?

⁵ Misaveni yiswa, a wuhosi ga Jehova gi ta seketelwa hi kumbhelela. Ku nga ta hava ni moya wa kutifuma lowu wu vuvumiswako tikweni legi gi fumelwako hi Satani. A votala va nyika nguvu lisima a kutifuma ni ku lanzela a mawonela ya wena wutsumbu, kanilezi hi gihi wuyelo ga kona? A ku tsika ku lanzela wurangeli ga Nungungulu zi neha kuxaniseka, wusiwana, hambu ni makhombo yo tshisa! (Jer. 10:23) Hi rinzela hi mahlo yo pswhuka a xikhati lexi vanhu vontlhe va to ti koramisa ka wuhosi ga liranzo ga Jehova!

⁶ Li tava litsako la hombe a kuva hasi ka malulamiselo ya Jehova misaveni yiswa a xikhati lexi hi to tira kasi ku sasekisa misava, ku gonzisa lava va to vuxiwa, ni ku maha kuranza ka Jehova hi vanhu. Kanilezi, ahati loku ho nyikwa ntiro wu kalako wu nga hi tsakisi? Hi wa ta ti koramisa ka wurangeli lego hi ku maha zontlhe hi zi kotako kasi ku wu tatisa hi tlhela hi xalala hi wona ke? A kutala ka hina hi wa taku ina! Makunu ahati zalezi, ha ti koramisa ka malulamiselo ya moya ke? Loku hi maha lezo, hi kari hi ti longiselela wutomi ga pinzukelwa hasi ka Mufumo wa Jehova.

7, 8. a) Hikuyini hi faneleko ku hlakulela a moya wa kutirisana? b) Kucica muni loku a maKristu yo kari ma vileko nako? c) Kutiyiseka muni loku hi nga vako nako xungetano hi wutomi misaveni yiswa?

⁷ Ahandle ka ku ti veka hasi ka malulamiselo ya Jehova zalezi, hi nga ti longisela kambe kasi ku hanya misaveni yiswa hi ku hlakulela a litsako ni moya wa kutirisana. Loku hi tirisana ni lava va hi rangelako inyamutlha, kuzilava hi ku xalala ni ku tsaka loku hi nyikwa ziavelo ziswa za ntiro, zi nga hi vuna kuva hi ya maha zalezo ni misaveni yiswa. (Gonza Maheberu 13:17.) Tikweni gi Tsumbisilweko, a vaIsraeli va woya hi ku avelwa xipanze xo tshama kona. (Mitse. 26:52-56; Jox. 14:1, 2) Kunene, inyamutlha, a hi ku tivi laha a munwe ni munwani wa hina a to nyikwa ku tshama kona misaveni yiswa. Hambulezo, a kutirisana ku ta hi maha hi xalala hi tlhela hi tsaka nguvu a xikhati lexi hi to maha kuranza ka Jehova ni kwihi lomu hi to hanya kona laha misaveni xikhatini lexo.

⁸ A lungelo ga ku hanya hasi ka Mufumo wa Nungungulu gi hunza a kutikarata kontlhe loku hi nga ku mahako kasi ku tirisana ni hlengeletano ya Jehova ni ku khatalela ziavelo za moya. Lisine lezaku a ziyimo za hina zi nga tshuka zi cica hi kufamba ka xikhati. Hi xikombiso, a ziro zo kari za ngango wa Beteli le Estados Unidos zi lo nyikwa xiavelo xa kuya sinwini niku zalezi va ti buza hi makatekwa yo tala ka tixaka tinwani ta wutireli ga xikhati xontlhe. Hi kota ya kukhosahala kutani zilo zinwani, a vokari lava va nga hi vawoneleli va fambafambako zalezi va kumile xiavelo xa kuva maphayona yo hlawuleka. Loku hi hlakulela kuxalala, hi kombela xivuno xa Nungungulu hi mukhongelo, hi tlhela hi maha zontlhe hi zi kotako ntirweni wakwe, hi tava ni litsako hi tlhela hi kuma makatekwa yo tala hambu masikwini lawa yo gumesa ya zikarato. (Gonza Mavingu 10:22.) Ahati a kutsumba ka hina ka xikhati xi tako ke? Kuzilava ku kona lomu hi tsakelako ku hanya kona misaveni yiswa, kanilezi hi nga ha kombeliwa ku rura hiya ka wutshamu ginwani. Na ku nga khataliseki lomu hi to tirela kona kutani lezi hi to maha, hi nga tiyiseka lezaku hi tava ni kubonga ni kuxalala hi tlhela hi tala hi litsako. — Neh. 8:10.

9, 10. a) Ziyimo muni zi nga ha lavako lezaku hi kombisa lihlaza-mbilu misaveni yiswa? b) Hi nga kombisisa kuyini lezaku hi na ni lihlaza-mbilu?

⁹ Misaveni yiswa, ku nga hava ni zikhati zi to lava lezaku hiva ni lihlaza-mbilu. Hi xikombiso, hi nga hazwa vanhu na va tsaka hi kuva ku vuxilwe maxaka yabye kutani vanghana hi ka vafileko. Kanilezi, hina ku nga ha laveka lezaku hi rinzela a kuvuxiwa ka varanzekako va hina. Loku lezo zi maheka, hi tava ni lihlaza-mbilu hi tsaka ni vanwani ke? (Rom. 12:15) A ku gonza ku rinzela a kutatiseka ka zitsumbiso za Jehova hi lihlaza-mbilu zalezi zi ta hi vuna ku kombisa lihlaza-mbilu xikhatini lexo. — Mutsh. 7:8.

¹⁰ Hi nga ti longisela kambe kasi ku hanya misaveni yiswa hi ku kombisa lihlaza-mbilu xungetano hi lisine leli hi kombiwako. Xana ha ti nyika xikhati xa ku gonza hi tlhela hiva ni lihlaza-mbilu a xikhati lexi a kuzwisisa ka hina ka lisine la Biblia ku yako ku chukwatiswa nyamutlha ke? Loku zi hi nghaho, kuzilava zi nga ta hi karatela ku kombisa lihlaza-mbilu misaveni yiswa a xikhati lexi Jehova a to hi tivisa lezi a zi lavako ka vanhu.— Mav. 4:18; Joh. 16:12.

11. Zini lezi Jehova a hi gonzisako zalezi xungetano hi kutirisana ka vanhu, niku lezo zi ta hi vunisa kuyini misaveni yiswa?

¹¹ A tshamela ginwani gi to hi longisela kasi ku hanya misaveni yiswa, i moya wa kutsetselela. Kufumeni ka Kristu ka 1.000 wa malembe, zi nga ha teka xikhati kasi a valulamileko ni vangalulamangiko va tsika a matshamela ya kungambheleli. (Miti. 24:15) Xana hi ta zi kota ku tirisana hi liranzo xikhatini lexo? Loku hi gonza ku tsetselela hi matsenya hi tlhela hi potsa kungazwanani zalezi, zi ta hi olovela ku maha lezo xikhatini xi tako. — Gonza Va Le Kolosi 3:12-14.

12. Tlhamusela a kuyelana ku nga kona xikari ka lezi hi zi rinzelako ni lezi hi hanyisako zona zalezi.

¹² Za koteka ku a ku hanya misaveni yiswa zi nga wuli ku kuma ni xihi hi xi lavako hi xikhati lexi hi zi lavako hi xona. Zi nga ha wula kuva vanhu va bongako ni ku xalala ni ka xihi xiyimo, na hi kari hi vuneka hi ku ti veka hasi ka wuhosi ga liranzo ga Jehova. Zi ta wula ku tirisa a matshamela yalawa Jehova a hi gonzisako ku ma hlakulela zalezi. Loku zalezi hi gonza ku hanyisa lezi hi rinzelako ku hanyisa zona misaveni yiswa, ho hlakulela matshamela lawa ku to laveka lezaku hi ma kombisa kala kupinzuka. Ho tiyisa a kukholwa ka hina mayelano ni “tiko legi gi tako.” (Maheb. 2:5; 11:1) Tlhatakumbiri, hi komba lezi hi ma xuvisako zona a matshamela yo lulama lawa ma tova kona misaveni ka xikhati lexo. Kunene, hi kari hi ti longiselela a wutomi ga pinzukelwa misaveni yiswa ya Nungungulu.

VEKA KUPIMA KA MIXUVO YA MOYA ZALEZI

13. Mitiro muni yi tova yo ranga misaveni yiswa?

¹³ Wona ndlela yinwani ya ku ti longiselela a wutomi ga lisine legi gi tako. Hambu lezi hi tsumbisiwako zakuga zo tala ni zilo zinwani misaveni yiswa, hi ta kuma litsako la hombe hi kuva ku tatiswa a xilaveko xa hina xa moya. (Mat. 4:4) A mitiro ya moya yi tava yona yo ranga, niku hi ta kombisa lezaku ha xalaliswa ha Jehova. (Tis. 37:4) Loku hi rangisa zilo za moya zalezi, hi ti longiselela wutomi ga lisine legi gi tako. — Gonza Mateu 6:19-21.

14. Mixuvo muni ya moya leyi yi nga vunako vaswa lezaku va simama va rinzela a wutomi ga pinzukelwa?

¹⁴ Hi nga engetelisa kuyini a litsako la hina mitirweni ya moya ke? A yinwe ya tindlela ku ti vekela mixuvo ya moya. Loku u hi muswa a xuvako ku tirisa wutomi gakwe kasi ku tirela Jehova, hikuyini u nga kambisisiko timhaka to kari ti humesilweko mabhukwini ya hina xungetano hi tixaka to hambanahambana ta wutireli ga xikhati xontlhe u tlhela u ti vekela mixuvo ka linwe la tona ke?a U nga ha bhula ni vokari va nga ni malembe yo tala ntirweni wa xikhati xontlhe. Hi ku tirisa wutomi ga wena kasi ku tirela Jehova, u ti longiselela ku simama u tirela Nungungulu misaveni yiswa, laha a gonziselelo ya wena ya moya ni wutlhari ga wena zi tova za lisima nguvu.

15. Hi yihi mixuvo ya moya leyi a vahuweleli va Mufumo va nga ti vekelako?

¹⁵ Kota vahuweleli va Mufumo, mixuvo muni ya moya leyi hi nga ti vekelako? Hi nga ti vekela mixuvo ya ku chukwatisa a tshamela go kari ga wutirelini. Kutani hi nga ha ti karatela ku chukwatiswa a mazwisisela ya hina a matshinya ya milayo ya Biblia ni lezi hi nga ma tirisisako zona. Ahati ku engetela a wutlhari ga hina ga ku lera ni ku kanela kutani ku nyika mihlamulo mitlhanganweni ke? Handle ko kanakana zi kona zinwani u zi alakanyelako. A mhaka hi leyi: A ku ti vekela mixuvo ya moya zi ta engetela a kuhiseka ka wena mitirweni ya moya, niku lezo zi ta ku vuna ku ti longisela kasi ku hanya misaveni yiswa.

A MAKATEKWA YA HINA MA SINA MA SANGULILE

16. Hikuyini a ku tirela Jehova gi nga gona hanyela ga chukwana ka wontlhe?

¹⁶ Xana a ku tirisa xikhati xa hina kasi ku ti longiselela wutomi ga misava yiswa ya Nungungulu zi wula ku luza wutomi ga chukwana ni go tsakisa nyamutlha ke? Ne ni kutsongwani! A ku tirela Jehova hi yona ndlela ya chukwana yi nga kona ya ku hanya. A hi mu tireli hi kukurumetwa kutani hi ku lava ku pona kuxanisekeni ka hombe ntsena. Hi zalezo hi mahelweko ku hanyisa zona — lezi zi nehako litsako la hombe. A kuva ni wurangeli ga Jehova ni ku wona a liranzo lakwe lo tsumbeka zi chukwana nguvu ku hunza ku ti hanyela ga wena. (Gonza Tisimu 63:1-3.) Hi lisine, a zi lavi ku rinzela misava yiswa kasi ku ti buza hi makatekwa ya moya lawa ma tako hi ku tirela Jehova hi mbilu yontlhe — hi nga ti buza hi wona hambu zalezi! Kunene, a vokari va hina va kari va ti buza hi makatekwa lawo hi makume ya malembe, niku va zi wona lezaku a ku na hanyela ginwani gi nehako litsako la hombe lo kota lelo. — Tis. 1:1-3; Isa. 58:13, 14.

17. Wutshamu muni legi a ku ti hungata ni ku tsakisa mbilu zi tova nago paradiseni?

¹⁷ A ku ti hungata ni ku maha zilo hi zi ranzako zi tava ni xikhati xa zona misaveni yiswa ya Nungungulu. A kuva Jehova a hi vangile na hi hi ni ndlala ya ku ti mahela zilo zi hi tsakisako ni ku ti hungata zi komba ku i lava lezaku hi tatisa mixuvo leyo? (Mutsh. 2:24) Hi ndlela leyi ni tinwani, Jehova xontlhe xikhati i ta “xurisa zontlhe lezi zi hanyako.” (Tis. 145:16) A ku ti hungata ni ku humula zi na ni xikhati xa zona, kanilezi a litsako la zona la engeteleka loku hi rangisa a wuxaka ga hina na Jehova. Zi tava zalezo kambe ni misaveni ya Paradise. Gi wa tava wutlhari a kuva hi gonza ku veka mixuvo ya timbilu ta hina ka wutshamu ga yona na hi kari hi rangisa Mufumo hi tlhela hi veka kupima ka makatekwa ya moya lawa ma kumiwako zalezi hi vanhu va Jehova!— Mat. 6:33.

18. Hi nga kombisa kuyini lezaku hi kari hi ti longiselela wutomi ga pinzukelwa paradiseni?

¹⁸ Paradiseni legi gi tako, hi ta kuma litsako laku cima a hi se tshuka hiva nalo. Ngha hi kombisa lezaku ha gi xuva nguvu a wutomi legi gi nga wutomi hizinene hi ku ti longisela zalezi kasi ku gi hanya. Ngha hi hlakulela a matshamela ma nene hi tlhela hi kuma litsako la hombe hi ku hiseka ntirweni wa ku xumayela a Mufumo lowu hi nyikilweko ku wu maha. Ngha hi kuma litsako la hombe hi ku rangisa a zilo za moya wutomini ga hina. Niku na hi hi ni kukholwa ko mbhelela hi zitsumbiso za Jehova, a hi hanyeni zalezi na hi rinzela wutomi ga misava yiswa!