A ku tshinela ka Nungungulu zi nene ka mina
A XIKHATI nzi nga hi ni 9 wa malembe nzi lo nyima ku kula. Lezo zi mahekile 34 wa malembe nzhako le Costa do Marfim, kanilezi kala nyamutlha nzo va ni metro yinwe basi. A xikhati lexi a xiyimo xa mina xi nga sangula ku woneka, a vapswali va mina va lo nzi kuca ku tira nguvu kasi nzi nga tshami hi ku alakanyela a xiyimo xa mina. Nzi lo veketela mihanzu mahlweni ka muti wa hina nzi tlhela nzi yi hlayisa khwatsi. Lezo zi wa koka a kupima ka vanhu vo tala.
Hambulezo, a ku tira nguvu a zi cicangi zontlhe. Nzi wa ha komile niku nzi wa ha fanele kulwa kasi ku maha zilo zi tsongwani za wutomi, zo kota ku teka nchumu wu nga le hehla. A zilo zontlhe zi wa wonekisa ku khwatsi zi mahelwe vanhu va nzi hunzako kumbiri hi kuleha. Nzi wa tshama hi ku ti tsetsa, kanilezi a zilo zi lo cica a xikhati nzi nga hi ni 14 wa malembe.
Ka siku go kari, a vavasati vambiri va Timboni ta Jehova va lo ta xava mihanzu, va guma va sangula xigonzo xa Biblia na mina. Na zi nga se teka masiku, nzi lo zi zwisisa lezaku a ku tiva Jehova ni kungo gakwe zi wa hi za lisima ku hunza a matshamela ya mina. Lezo zi lo nzi vuna. Tisimu 73:28 wu lo maha mutsalo wa mbilu ya mina. A xipanze xo sangula xa mutsalo lowo xi ngalo: “Zi nzi sasekele a ku tshama kusuhi ni Nungungulu.”
A ngango wa hina wu lo rura hi xitshuketi wuya Burkina Faso, niku a wutomi ga mina gi lo cica nguvu. Lomu nzi nga hanya kona le Costa do Marfim, a vanhu va wa tolovele ku nzi wona laha nzi nga xavisa kona mihanzu. Kanilezi ka wutshamu lego ga giswa, nzi wa nga tiviwi hi munhu niku a votala va wa nzi hlamala. A vanhu va wa nzi cuwuka nguvu. Kasi ku potsa ku cuwukiwa, nzi wa tshuka nzi mbheta maviki na nzi nga humi lomu ndlwini. Nzi lo alakanya lezi nzi nga vunekisa zona hi ku tshinela ka Jehova. Nzi lo tsalela hofisa ya ravi ya Timboni ta Jehova, zonake nzi enzelwa hi munhu a faneleko — ku nga murumiwa a vitwako Nani, loyi a nga famba hi mota.
A maruwa ya misava ka wutshamu lego ma wa retemuka, niku loku kuna vula, ma wa tala hi madhaka. Nani i wile makhati yo tala hi mota wakwe na ata hi ta gonza, kanilezi a nga mbhelangi ntamu. Hi kulanzela i lo nzi ramba kuya mitlhanganweni. Nzi lo zi zwisisa lezaku a ku maha lezo zi wula ku huma nzi timisela matihlo ya vanhu. Tlhatakumbiri, a ku khilela mota wakwe zi wa ta wu engetela kubinza kuveni lezo wu wa sina wu mu karatela ku fambisa. Hambulezo nzi lo vumela na nzi alakanya xipanze xa wumbiri xa mutsalo lowu nzi wu ranzako xi nge: “Nzi mahile Hosi Jehova a kuva wuchavelo ga mina.”
Ka zikhati zo kari Mina na Nani hi wawa lomu madhakeni kanilezi a kuwa na hiya mitlhanganweni zi wa hi chukwana ku hunza ku tshama kaya. A kunwayitela ka vamakabye Salawini ya Mufumo ku wa hambene nguvu ni lezi a vanhu va nga nzi cuwukisa zona le handle! Anzhako ka ntlhanu wa tihweti nzi lo bapatizwa.
A xipanze xa wunharu xa mutsalo lowu nzi wu ranzako nguvu xi ngalo: “Kasi nza fela ku tlhatlhambutela a mitiro ya wena yontlhe.” Nzi wa zi tiva lezaku a wutireli gi wa ta maha xikarato xa hombe ka mina. Nzi alakanya a khati go sangula nzi nga xumayela hi muti ni muti. A vanana ni vanhu va hombe va lo nzi cuwuka nguvu, va nzi lanzelela va tlhela va pimanyisa mafambela ya mina. Lezo zi wa bayisa nguvu, kanilezi xontlhe xikhati nzi wa ti alakanyisa lezaku vonawu va na ni xilaveko xa paradise a ku fana na mina; hikwalaho nzi lo simama nzi xumayela.
Kasi ku ti olovisela zilo, nzi lo xava bhasikeni wa maroda manharu wa ku nyavela hi mandla. A munghana wa mina wa simu i wa nzi chova lomu ka mitsunga a guma a khilela loku a bhasikeni wu sangula ku relela ha woce lomu ka minzhelelo. A wutireli, legi gi nga hi xikarato kusanguleni, gi lo nzi nehela litsako la hombe laha kuza nzi ti tsalela kota phayona ga xikhati xontlhe hi 1998.
Nzi lo fambisa zigonzo zo tala za Biblia, niku a mune wa vona va lo bapatizwa. Tlhatakumbiri, a munwe wa tinzisana ta mina i lo vumela lisine na yenawu! A kuzwa lezi a vanwani va nga kulisa zona hi tlhelo ga moya zi wa nzi nyika ntamu hi xikhati xi faneleko. Ka siku go kari na nzi babya hi dzedzedze, nzi lo amukela papilo ga kuta hi Costa do Marfim. Nzi wa sangulile xigonzo xa Biblia xo koma ni xigonzani xa universidade le Burkina Faso, nzi gumesa nzi xi nyikela ka makabye wa xinuna. A xigonzani lexo xi lo guma xi rura xiya Costa do Marfim. A nzi no ku tsaka hi ku tiva lezaku i wa hi muhuweleli a nga bapatizwangiko!
A za ku ti hanyisa ke, nzi zi kumisa kuyini? A hlengeletano yo kari ya ku vuna zilema yi lo ti nyiketela kasi ku nzi gonzisa ku runga. A mugonzisi wo kari i lo wona matirela ya mina aku: “Hi fanele ku ku gonzisa ku maha sabawu.” Va lo nzi gonzisa. Nzi maha sabawu ya ku hlaza ni ya ku hlamba na nzi hi kwalaha kaya. A vanhu va yi ranza nguvu a sabawu ya mina va tlhela va kuca vanwani. Nzi heleketa hi nzoce hi ku tirisa mota wa mina wa maroda manharu.
Lexi xi nga tsakisiko hi lezaku hi 2004, a kubayisa ka longo ku wa engetele nguvu laha kuza nzi zi wona zi hi chukwana ku nyima ku phayona. Hambulezo, nzi simama nzi tira hi kuhiseka wutirelini.
A vanhu ve ngalo nza tiveka nguvu hi kunwayitela ka mina ko thapelisana. Nzi na ni zigelo zontlhe za kuva nzi tsaka hakuva a ku tshinela ka Nungungulu zi nene ka mina. — Ma hlawutelwa hi Sarah Maiga.